Milli Məclis sədrinin müavini Bahar Muradova Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri Elena Aymone Sessera ilə görüşüb.
Bu barədə Milli Məclisdən məlumat verilib.
Qonağı salamlayan Bahar Muradova bildirib ki, Azərbaycan BQXK ilə əməkdaşlığa böyük önəm verir.
“Uzun illərdir ki, bu təşkilat qarşıda dayanan vəzifələrin həyata keçirilməsi üçün şəffaf fəaliyyət göstərir. Əməkdaşlığımız həm təşkilatın dəyərlərinə, həm də Azərbaycanın maraqlarına uyğun şəkildə davam edir”,- o, qeyd edib.
Qarşılıqlı görüşlərin intensivliyinin artırılmasının vacibliyini qeyd edən Milli Məclis sədrinin müavini ermənilərin girov götürdüyü Dilqəm Əsgərov və Şahbaz Quliyev üçün keçirdikləri narahatlığa görə BQXK-nə təşəkkürünü bildirib. Qeyd edib ki, biz əsirlikdə yaşayan bütün insanların azad edilməsinin tərəfdarıyıq.
Söhbət zamanı Bahar Muradova Ermənistanla təmas xəttində yaşayan Azərbaycan vətəndaşlarının problemlərinin həlli, ermənilərin girov götürdüyü Elvin İbrahimovun azad edilməsi üçün BAXK-nin Azərbaycandakı nümayəndəliyi ilə birgə göstərilən səylərin daha da artırılmasının vacib olduğunu vurğulayıb.
Xoş sözlər üçün təşəkkürünü bildirən BQXK-nin Azərbaycandakı nümayəndəliyinin rəhbəri Elena Aymone Sessera qurumun ölkəmizlə yaxşı əməkdaşlıq qurduğunu, parlamentlə də qanunvericilik istiqamətində uğurlu əməkdaşlıq etdiyini diqqətə çatdırıb. O, bu faydalı əməkdaşlığın bundan sonra da davam edəcəyinə əminliyini bildirib. Qonaq onu da diqqətə çatdırıb ki, onlar girov götürülmüş şəxslərə mütəmadi olaraq baş çəkir, onların sağlamlıqları ilə maraqlanır və ailələrinə məlumat verirlər.