Böyük Britaniya hökuməti ABŞ ilə transatlantik ticarət barədə danışıqlara başlayır.
Böyük Britaniyada əvvəl də anlayırdılar ki, brexit-dən sonra yeni şəraitdə Avropa İttifaqı ilə ticarət əlaqələrinin qaydaya salınmasına xeyli vaxt lazım olacaq, koronavirus pandemiyası və onun ölkə iqtisadiyyatı üçün nəticələri başlananda isə Ülyahəzrətin hökuməti təcili surətdə dünyanın ən böyük iqtisadiyyatı olan ABŞ iqtisadiyyatı ilə sərbəst transatlantik ticarət körpüləri yaratmağı qərara aldı.
Butov.az AZƏRTAC-a istinadən xəbər verir ki, Böyük Britaniyanın beynəlxalq ticarət məsələləri üzrə naziri Liz Trassın sözlərinə görə, videoformatda danışıqlar başlanıb.
Mütəxəssislərin hesablamalarına əsasən, sərbəst ticarət başlanandan sonra ilk üç ay ərzində Böyük Britaniyada ÜDM-in həcmi 0,15 faiz artacaq, sonrakı 15 il ərzində isə hər növbəti rübdə orta hesabla 0,16 faiz artım müşahidə olunacaq.
L.Trass deyib: “ABŞ bizim ən böyüyümüz ticarət tərəfdaşımızdır və sərbəst transatlantik ticarətin artırılması Böyük Britaniyaya koronavirus pandemiyasının neqativ nəticələrinin öhdəsindən gəlməkdə kömək edəcək”.
Eyni zamanda qeyd etmək lazımdır ki, Britaniya Maliyyə Nazirliyinin hesablamalarına görə, əgər karantin müddətini daha 12 həftə uzatmaq lazım gələrsə, Böyük Britaniya öz ÜDM-inin 35 faizini müvəqqəti də olsa itirəcək.