Ermənistan konstitusiya islahatını 2027-yə saxladı - İrəvan sülh sazişini sabotaj edir

Azərbaycan sülh müqaviləsi ilə bağlı Ermənistanın qarşısında konkret şərtlər qoyub. Əsas şərtlərdən biri də Ermənistan Konstitusiyasına dəyişikliyin edilməsidir. Buna səbəb Ermənistan Konstitusiyasında beynəlxalq hüquqa zidd olaraq, ölkəmizə qarşı ərazi iddialarının yer almasıdır. Ermənistan tərəfi ilk vaxtlarda buna müsbət yanaşırmış kimi görünsə də, sonradan məsələni sabotaj etdilər və yubatdılar.
Nəhayət ötən gün Ermənistanın ədliyyə naziri Qriqor Minasyan ölkədə konstitusiya islahatları ilə bağlı keçiriləcək referendumun tarixini açıqlayıb.
O, bildirib ki, konstitusiya islahatları ilə bağlı referendumun 2027-ci ildə keçirilməsi planlaşdırılır.
Məsələ ilə bağlı sabiq xarici işlər naziri Tofiq Zülfüqarov bildirib ki, 2027-ci ilədək Ermənistanla Azərbaycan arasında ilkin çərçivə sənədi imzalana bilər:
“İndiki mərhələdə müzakirə olunan sənəd fərqlidir. Bu sənəd prinsiplərdən ibarətdir. Artıq prinsiplərin 90 faizi razılaşdırılıb. Bəzən onu "sülh sazişi" adlandırırlar. Ermənistan beynəlxalq hüquqa zidd olaraq daxili qanunvericiliyində təsbit etdiyi başqa ölkələrin ərazilərinə qarşı iddiaları çıxarmağı öhdəlik kimi götürə bilər. Bir sözlə, ilk olaraq çərçivə sənədi imzalanacaq. Elə 2021-ci ildə də imzalanacaq sənəd çərçivə sənədi adlandırılmışdı. Sadəcə olaraq, bunu sadə dillə "sülh sazişi" adlandırırlar. Hələ ki yekun sülh sazişi ola bilməz. Çünki həllini gözləyən problemlər var. Sərhədlərin, kommunikasiyaların açılması bir-iki aya həll olunacaq məsələ deyil”.
Sabiq xarici işlər naziri 2027-ci ildə sülh sazişinin imzalanmasının gözlənilib-gözlənilmədiyindən də danışıb:
“Onların sülh imzalamaqdan başqa yolu yoxdur. Ermənistan tərəfi ictimaiyyətin buna hazır olmadığını söyləyir. Lakin ictimaiyyətin hazır olub-olmaması bizim yox, Ermənistanın problemidir. Mən necə səninlə sazişə qol çəkim ki, sən səhvlərini düzəltmirsən. Bunlar səhv də deyil. Bu bir başqa ölkəyə qarşı ərazi iddiasıdır ki, beynəlxalq qanunlarda məsələ cinayət kimi qəbul olunur. Bu cinayətləri düzəltmək iqtidarında deyilsənsə, deməli, sənə sülh də lazım deyil”.
T.Zülfüqarov vurğulayıb ki, artıq sülhlə bağlı məsələnin geridönüşü yoxdur:



“Bilirsiniz, baş nazir Paşinyanın əsas marağı Ermənistanın problemlərini həll etmək deyil, müzakirələri uzatmaqdır. Bundan öncəkilər kimi, Ermənistanın indiki rəhbərləri də ölkə üçün əsas olan problemlərinin həllində maraqlı deyillər. Burada ictimai razılığın olmaması bəhanə sayıla bilməz. Özləri yalanı ictimaiyyətə o qədər təbliğ ediblər ki, cəmiyyət də elə bilir həqiqətən də Ermənistan "dənizdən-dənizə" çata bilər.
Paşinyan hökuməti hakimiyyətdən getsə belə, heç nə olmayacaq. Azərbaycanın mövqeyi beynəlxalq qanunlara uyğun olduğundan dəyişən deyil. Bu, artıq Ermənistanın problemidir. Ermənistan sülh istəmirsə, biz onun yerinə sülh istəməyəcəyik ki... Əslinə qalsa, bizim aramızda heç bir sənəd qüvvədə deyil. Sadəcə olaraq, atəşkəs sazişi var ki, 2020-ci ildə ona qol çəkmişik. Onlar deyirlər ki, "bizi vuracaqlar". Vurulmaq istəmirsinizsə, sülhə görə hansısa addımlar atın. Bir tərəfdən guya qorxurlar, digər yandan da normal qanunvericilik yaratmaq istəmirlər. Biz onların yerinə nə edə bilərik? Bizə təhlükə yaransa, yenə də, başlarından "dəmir yumruq"la vuracağıq”.