Donald Tramp ABŞ prezidenti seçiləndən sonra Vaşinqton-Bakı xəttində münasibətlərin ciddi irəliləyişi müşahidə olundu, həmçinin, yeni dövr başlandı.

Butov.az Publika.az-a istinadən xəbər verir ki, yeni dövrdə iki əsas faktor diqqət çəkir.

Birinci: Trampın bəyan etdi ki, ABŞ əvvəlki dövrlərdə olduğu kimi öz xarici siyasətini digər ölkələrin daxili işlərinə müdaxilə, onları idarə etməyə çalışmaq prinsipi üzərində qurmayacaq. ABŞ Prezidenti digər ölkələrlə bərabərhüququlu, qarşılıqlı faydalı əməkdaşlıq əlaqələrini inkişaf etdirməyi qarşısına məqsəd qoyur. Əslində ABŞ-ın milli maraqları fonunda bu siyasətin doğru olduğu aydın görünür və bunu əsaslandıran məqamlar da var. Misal üçün, Amerikanın regional maraqlarında Cənubi Qafqazın ən güclü ölkəsi olan Azərbaycanla ikitərəfli və bərabərhüquqlu əməkdaşlıq əhəmiyyətlidir. Trampın sələfi Obama dövründə biz bunun tamam əksini müşahidə edirdik:

Obama Administrasiyası daha çox müdaxiləçi, daxili işlərə qarışmaq və idarə etmək prinsipindən yanaşırdı ki, bu da Bakı-Vaşinqton xəttində ciddi gərginliklərə yol açırdı. Halbuki, bu, ilk növbədə ABŞ-ın milli maraqlarına zidd idi. Trampın apardığı siyasət isə daha praqmatik görünür. Bu siyasət Barak Obama dövründə ABŞ-Azərbaycan əlaqələrində müşahidə olunan neqativ hallar və soyuqluğun aradan qaldırılmasını, iki ölkə arasında faydalı və bərəbərhüquqlu əməkdaşlığın, strateji tərəfdaşlıq əlaqələrinin daha da inkişaf etdirilməsini nəzərdə tutur.

Trampın Azərbaycan Prezidenti İlham Əliyevə ünvanladığı müraciətlərdə əks olunan fikirlər də ölkələr arasında ikitərəfli münasibətlərin yeni dönəminin başlandığına işarə edilir.
Donald Trampın 28 May - Respublika Günü və XXIV Beynəlxalq “Xəzər Neft və Qaz-2017” sərgi və konfransı ilə əlaqədar Prezident İlham Əliyevə təbrik məktublarında bu açıq şəkildə görünür.

Tramp həm Azərbaycan və ABŞ, həm də dünya üçün daha gözəl gələcək naminə Prezident İlham Əliyevlə fəal tərəfdaş kimi işləməyi səbirsizliklə gözlədiyini bildirir. Azərbaycanı Amerika Birləşmiş Ştatlarının dəyərli tərəfdaşı hesab edir və son 25 ildə qurulmuş ikitərəfli münasibətlərin daha da inkişaf etdirilməsi istiqamətində səylərin daha da gücləndirilməsini arzu edir.

ABŞ Prezident İlham Əliyevin Azərbaycan iqtisadiyyatının şaxələndirilməsi və islahatların həyata keçirilməsi istiqamətində gördüyü işləri dəstəkləyir və alqışlayır, habelə iki ölkə arasında yeni faydalı biznes əlaqələrinin qurulmasını istəyir. ABŞ Prezidenti Azərbaycan və Amerika xalqlarının rifahına xidmət edən digər əməkdaşlıq sahələrinin də araşdırılmasını səmimiyyətlə arzulayır.

Bu gün ABŞ və Azərbaycan birgə səylərlə terrorizmə qarşı mübarizə apararaq qlobal təhlükəsizliyi möhkəmləndirmək üçün çalışırlar. ABŞ Azərbaycan xalqının yanındadır və təhlükəsizlik, iqtisadi əməkdaşlıq və demokratik prinsiplər sahəsində dialoq vasitəsilə münasibətlərin daha da möhkəmləndirilməsinə sadiqdir. ABŞ Azərbaycanın liderliyi ilə həyata keçirilən qlobal enerji layihələrini, o cümlədən Cənub Qaz Dəhlizini qəti surətdə dəstəkləməkdə davam edir, Azərbaycanın və beynəlxalq tərəfdaşların onun tamamlanmasına yönəlmiş səylərini alqışlayır. ABŞ Azərbaycanı Avropa üçün yeni enerji mənbəyi hesab edir.
ABŞ qlobal enerji təhlükəsizliyinin gücləndirilməsində, o cümlədən Xəzər regionunda enerji resurslarının işlənilməsi və ixracında da Azərbaycanın oynadığı rolu yüksək dəyərləndirir.