Məcburi əməyə görə, 120 tikinti obyekti 454.000 manat həcmində cərimələnib
Butov.az “Ölkə.Az”-a istinadən xəbər verirki, Milli Məclisin İnsan hüquqları, Hüquq siyasəti və dövlət quruculuğu komitələrininbu gün keçirilən birgə iclasında İnsan Alverinə Qarşı Mübarizə üzrə Milli Koordinatorun Azərbaycanda insan alverinə qarşı mübarizəyə dair illik hesabatı dinlənilərək müzakirə olunub.
Hesabat barədə deputatalra DİN İnsan Alverinə qarşı Mübarizə Baş İdarəsinin rəisi Həzi Aslanov məlumat verərək bildirib ki, məcburi əməyin qarşısının alınması, bu əməllərə şərait yaradan halların aradan qaldırılması istiqamətində də lazımi tədbirlər həyata keçirilir: “Hesabat dövründə aparılan monitorinqlər nəticəsində 120 tikinti obyektində 351 nəfərin əmək müqaviləsi olmadan çalışdığı aşkar edilib. Bununla bağlı ümumilikdə 454.000 manat inzibati cərimə tətbiq edilib”.
İdarə rəisi bildirib ki, Azərbaycan Respublikası Prezidentinin rəhbərliyi ilə aparılan sosial islahatlar nəticəsində 2018-ci illə müqayisədə ötən il ölkə üzrə bağlanılan əmək müqavilələrinin sayında 153 min artım qeydə alınıb. “Uşaq əməyinin istismarının qarşısının alınması sahəsində görülən tədbirlər çərçivəsində övladlarının təlim-tərbiyəsi ilə bağlı vəzifələri yerinə yetirməyən 180 valideyn barəsində inzibati tənbeh tədbirləri görülüb”- H.Aslanov qeyd edib.