Hirkan Milli Parkının yaradılması ilə əlaqədar milli parkda "Açıq qapı” günü və maarifləndirici tədbirlər keçirilir.

Butov.az xəbər verir ki, Ekologiya və Təbii Sərvətlər Nazirliyinin mətbuat xidmətindən AZƏRTAC-a bildiriblər ki, bu gün ziyarətçilər milli parka giriş haqqından azaddır. Ziyarətçilər parkda hirkan tipli meşələrin zəngin biomüxtəlifliyi ilə tanış ola və unikal göl mənzərəsini seyr edə bilərlər.

Lənkəran, Astara və Lerik rayonlarının ərazisini əhatə edən Hirkan milli parkı 2004-cü il fevralın 9-da yaradılıb və əsrarəngiz təbiət abidəsi hesab olunur.

“Açıq qapı” günündə Hirkan Milli Parkındakı bitkilərdən hazırlanmış herbari sərgisi nümayiş etdirilir, yerli əhali tərəfindən yetişdirilmiş orqanik məhsulların, dərman bitkilərinin satışı təşkil edilir.

Qeyd edək ki, fevralın 8-də Abşeron Milli Parkında da milli parkın yaranması günü ilə əlaqədar “açıq qapı” günü və maarifləndirici tədbirlər keçirilib, parkın ərazisində Qızılqaz quşları (flaminqolar) müşahidə olunub.

Abşeron yarımadasının cənub-şərq qurtaracağında, Şah Dili adlanan ərazidə yerləşən və üç tərəfdən dənizlə əhatə olunan Abşeron Milli Parkı 2005-ci il fevralın 8-də yaradılıb.