Ali məktəblərə qəbul imtahanlarında zəif nəticə göstərən abituriyentlər əksər hallarda psixoloji təzyiqlərə məruz qalırlar. Bunun başlıca səbəbi valideynlərin yersiz basqılarıdır. Əlbəttə, övladının tələbə adını qazanması hər ata-ananın arzusudur. Lakin imtahan nəticələri gözlənilməz olanda bir çox valideynlər onsuz da sarsıntı keçirən övladına dəstək olmaq əvəzinə, onlara təzyiq göstərirlər.

Nəticə faciəli olur... Üzləşdikləri psixoloji təzyiqlərə tab gətirə bilməyən bəzi gənclər sonda çıxış yolunu intiharda görürlər. Təəssüflər olsun ki, belə hallar hələ də davam edir.

Əslində valideyn imtahandan kəsilən övladına necə davranmalıdır?

Butov.az xəbər verir ki, bu barədə Modern.az-a danışan tanınmış psixoloq Elmir Əkbər bildirib ki, imtahanda az bal toplayan abituriyentlərin intihar etməsi ölkənin ən böyük problemidir:

“Hər il belə halla rastlaşırıq. Deməkdən yoruldum ki, valideynlər övladlarının qədrini bilsinlər. Nə qədər abituriyent evdən qaçır, intihar edir. Evdən qaçıb gedib pis adamların təsiri altına düşür, orada sağlamlığını itirir. Səbəb valideynlərin mənasız, əsassız yerə onları sıxmasıdır. Axı uşaq özü də istəyirdi ki, ali məktəbə qəbul olsun. Düzdür, səhv edib, ya ciddi hazırlaşmayıb, ya həyəcan keçirib yaza bilməyib. Bunun da səbəbkarı valideyndir, onlar anlamırlar ki, imtahan öncəsi birinci növbədə düzgün psixoloji hazırlıq vacibdir. Doğru psixoloji hazırlıq keçmiş abituriyent bəzən məntiq əsasında cavabı bilmədiyi suala belə doğru cavabı verir. Amma psixoloji hazırlığı olmayan abituriyent bildiyi suallara belə tərəddüd edir, cavabı düz yazmır. Valideyn imtahandan qabaq, ilin ortasında övladını psixaterapiya seanslarına aparmalıdır ki, uşaq imtahanda özünü itirməsin. Valideynlər öz səhvlərinin nəticəsini uşağın üstünə yükləyirlər. Başa düşmürlər ki, həyatda insanın cansağlığından üstün heç nə ola bilməz”.

E.Əkbər valideynlərə çağırış edərək övladlarına sevgi göstərmələri və onlarla dost kimi davranmalarının vacib olduğunu söyləyib:

“İmtahandan öncə və sonra övladlarıyla söhbət etsinlər, sevgilərinin təmənnasız olduğunu desinlər: Bu il olmasa da, gələn il universitetə daxil olmağın mümkün olduğunu aşılasınlar. Universitetə daxil olmasan həyat bitmir, amma intihar edib həyatını bitirirsən. Düşünürəm ki, intihar etmiş uşaqların valideynləri mütləq cinayət işinə cəlb olunmalıdır.

Əvvəl fikirləşirdim ki, övladı intihar edən valideyn onsuz da dərd içindədir, amma fakt onu göstərir ki, valideyn cinayət məsuliyyəti daşımayanda başqa digərlərinə dərs olmur. Onlar öz uşaqlarını sıxır, intihar həddinə çatdırırlar. Çox heyif ki, valideynlər övladlarını intihara sürükləyirlər. İnsanı intihar həddinə çatdırmaq isə öldürmək deməkdir, bunun üçün valideynlər cinayət məsuliyyəti daşıyır. Ona görə də valideynlər övladlarının, onların sağlam canının qədrini bilməlidirlər. Bir valideyn övladının yüksək nəticə toplamasını istəyirsə, onu düzgün yönləndirməlidir, övladının istəklərinə sayğıyla yanaşmalıdır. Valideynlər çox vaxt həyata keçməyən arzularını övladlarının üzərində həyata keçirməyə çalışırlar. Bu da acınacaqlı nəticə ilə sonlanır”.