"Bütövlükdə problemli kreditlərlə bağlı məsələ hələ öz həllini tapmayıb. Ən azı yaxın 2-3 il ərzində də bu problem öz həllini tapmayacaq. Olduğu kimi qalacaq".

Bu sözləri Qaynarinfo.az-a açıqlamasında bank üzrə ekspert Əkrəm Həsənov bankların problemli kreditlərinin faiz dərəcəsini az göstəməsinin səbəbləri haqqında danışarkən deyib.

Əkrəm Həsənov bildirib ki, banklar öz problemləri kreditlərinin faizini az göstərirlər: "Rəsmi statiska da bankın verdiyi məlumat əsasında hesablanır. Banklar Maliyyə Bazarlarına Nəzarət Palatasına məlumatı verirlər və bu qurum da həmin məlumatlara əsaslanır. Banklar da problemli kreditlərin həcmini az göstərirlər. Çünki problemli kreditlərin həcmi çox olanda banklar qanunvericiliyi pozmuş olurlar. Kapitallarına dair tələbləri pozurlar. Buna görə də müxtəlif yollara əl atırlar. Məsələn, ödəniş geciksə də, bunlar onu gecikmiş borc kimi göstərmirlər və ya gecikmə müddətini az göstərirlər. Prinsipcə burda qeyri-adi heç nə yoxdur".



Ekspertin sözlərinə görə, "Moody`s"in yaydığı statistika real göstəricilərə əsaslanır: "Onun statistikasına etibar etmək olar. Bank nəzarəti səlahiyəti Mərkəzi Bankdan alınaraq Maliyə Bazarlarına Nəzarət palatasına verilib. Təəssüf ki, banklar Mərkəzi Bankın dövründəki kimi öz maliyyə göstəricilərini düzgün vermirlər. Ümid edək ki, bəlkə bundan sonra həqiqəti göstərdilər. Tövsiyə edirəm ki, hamı problemli kreditlərlə bağlı "Moody`s"in göstəricisini əsas tutsun".

Əkrəm Həsənov vurğulayıb ki, bütövlükdə problemli kreditlərlə bağlı məsələ hələ öz həllini tapmayıb: "Ən azı yaxın 2-3 il ərzində də bu problem öz həllini tapmayacaq. Olduğu kimi qalacaq. Problemli kredit deyəndə yalnız əhalinin kreditləri düşünülür. Amma bu növ kreditlərin əksəriyyəti biznes kreditləridir. Əgər "Moody`s" 20 faiz göstərirsə, bu yaxın gələcəkdə daha da artacaq. Problemli kreditlərə dair elə bir qərar qəbul olunmayacaq. İnsanlar hər hansı bir güzəşt gözləməsin. Bu ehtimal getdikcə azalır. Bankların ödənilməyən kreditləri az göstərməsinin səbəbi başqadır. Banklardan hamı vəsaitlərini çıxardır, xaricdən vəsait cəlb edə bilmirlər. Hansı bankın problemli krediti çoxdu, təbii ki, o bankın özünə də heç yerdən kredit vermirlər. Bütün bunlar bankın vəziyətinin pis olduğunu göstərir".