İyunun 14-də Tovuz rayonunun Yuxarı Öysüzlü kəndində itkin düşən iki uşaq anası 27 yaşlı Aytəkin Quliyevadan hələ də xəbər yoxdur. Polis qadının gedə biləcəyi bütün ehtimal olunan yerləri axtarır.

Butov.az xəbər verir ki, bu barədə virtualaz.org saytına Tovuz rayon polis idarəsindən məlumat verilib.

İdarədən həmçinin qadının qayınatası tərəfindən öldürülməsi ilə bağlı yayılan ittihamlar da rədd olunub:

“Ortada heç bir ölüm faktı yoxdur. Qadın itkin düşüb, barəsində axtarış elan olunub və polis tərəfindən axtarılır. Öldürülməsi ilə bağlı yayılan fikirlər əsassızdır”.

Kəndin bələdiyyə sərdi Rüstəm Yusifov da virtualaz.org-a açıqlamasında itkin düşən gəlinin ailəsini uzun müddətdir tanıdığını deyib:

“Mən A.Quliyevanın ailəsini uzun illərdir tanıyıram, M.Əhmədov rayonda meşəbəyi işləyir. Bu günlərdə onunla görüşdüm. Dedi ki, həmin gün evdə olmayıb. Gəlin evdən 5 manat pul da götürüb çıxıb gedib. Hazırda axtarışdadı, başqa bir məlumat yoxdur”.

Qeyd edək ki, itkin düşən qadının atası Məzahir Quliyev mətbuata açıqlama verərək qızının qayınatası tərəfindən öldürülməsini iddia edib. O, bildirib ki, qızının azyaşlı uşaqlarını çağırıb ayrı-ayrılıqda danışdırıb və onlar bildiriblər ki, həmin gün analarını babası başından vurub və sonra da başından qan axa-axa maşına qoyub aparıb.

M.Əhmədov isə azvisiona.az-a açıqlamasında qudasının dediklərini təkzib edib və bildirib ki, gəlini öz istəyi ilə evdən qaçıb. O, həmçinin qeyd edib ki, Aytəkin evdən çıxanda bütün paltarlarını yığıb, şəxsiyyət vəsiqəsi və doğum haqqında şəhadətnaməsini də özü ilə götürüb. M.Əhmədovun sözlərinə görə, kənd sakinləri həmin gün Aytəkini çayxananın qarşısından keçərkən və rayon avtovağzalında görüblər.

Qayınata iddia edir ki, Aytəkinin danışdığı oğlan olub, o, ərinə xəyanət edib. Bəlkə də, həmin oğlana qoşulub qaçıb.