23-12-2021, 17:41
Vətən müharibəsinin şəhidi baş leytenant Valeh Məmiyevin ailəsi Türkiyənin milli müdafiə naziri Hulusi Akarın dəvəti ilə Ankaraya səfərə gedib.
Bu barədə Türkiyənin Milli Müdafiə Nazirliyi məlumat yayıb.
Şəhidin ailəsi Ankarada Türkiyə dövlətinin qurucusu Mustafa Kamal Atatürkün anıt qəbrini ziyarət edib.
Səfər davam edir.
Qeyd edək ki, V.Məmiyev ötən il avqustun 13-də Azərbaycanda təşkil edilən Azərbaycan-Türkiyə quru qoşunları və hərbi hava qüvvələrinin birgə döyüş atışlı taktiki və taktiki-uçuş təlimlərində uğurla iştirak edən hərbçilərdən biri olub.
Təlimlərdən sonra H.Akar Məmiyevə mükafat təqdim edib, şəkil çəkdirib və söhbət edib. Türkiyəli nazir hərbçilərə üz tutaraq bunu söyləyib: “Təlimlərdə gücünüzü və peşəkarlığınızı göstərməyiniz çox yaxşıdır. Ancaq əsas vəzifəniz 30 ildir işğal altındakı torpaqlarınızı azad etməkdir. Buradakı uğurlarınızı döyüş meydanında da sübut etməlisiniz”.
V.Məmiyevin cavabı isə belə olub: “Biz Ali Baş Komandanın əmrini gözləyirik. Əmir gələn kimi ərazilərimizi işğaldan azad edəcəyik və sizin istəyinizi yerinə yetirəcəyik”. Qubadlı uğrunda döyüşdə yaralanan hərbçi yerləşdirildiyi xəstəxanada məqsədinə çatdığını söyləyib: “Mən artıq məqsədimə çatmışam. Mən qardaş Türkiyənin müdafiə naziri Akara verdiyim sözü tutdum. Vətən sağ olsun”. Bir müddət sonra yaralı hərbçi şəhid olub.
Bütöv.az
23-12-2021, 17:28
"Nə Ənvər Seyidəliyevin vaxtında, nə də indi - Rövşən Bağırovun vaxtında biz Ağsu camaatının üzü gülmədi ki, gülmədi. Bu gün başdan-başa problemlər içində olan Ağsuda icra başçısı əməlli-başlı rejim qurub".
DİA.AZ bildirir ki, bu barədə ağsulular adından edilən müraciətdə qeyd olunur.
Sakinlər yazır ki, Rövşən Bağırov gəldiyi gündən sahibkarları açıq-aşkar hədəfə alıb:
"Ağsu elə bir rayondur ki, burda təsərrüfatla məşğul olanların əksəriyyəti kənardan gəlmələrdir. Yerli camaat da məcbur olub müxtəlif iaşə obyektləri hesabına ailəsini dolandırırdı. Amma Rövşən Bağırov gələndən Ağsuda yolkənarı biznesi qadağan etdi. Dedilər ki, guya bu obyektlər turistlərin gəlişinə mane olur. Təklif verdik ki, hansı formada istəyirsinizsə, obyektlərimizi müasirləşdirə bilərik. Amma razılaşmadılar.
Məlum oldu ki, turstlər bəhanə imiş. Başdan-başa yamaq içində olan Ağsudan turistləri qaçıran bizim obyektlər idimi?"
Sakinlər adından yazılan müraciətdə ölkə başçısından Ağsuya yeni başçının göndərilməsi də xahiş edilir:
"Sənab Prezident. Biz hər zaman Sizi dəstəkləmişik. Bundan sonra da Sizin siyasətə sadiqik. Amma Ağsu camaatı artıq yorulub. İcra başçısının qəbuluna da düşə bilmirik. Bizə xalqı eşidən bir başçı göndərməyinizi xahiş edirik".
İddia olunanlarla bağlı dia.az olaraq qarşı tərəfi də dinləməyə hazırıq...
Bütöv.az
23-12-2021, 17:24
Artıq Yeni ilin gəlişinə 10 gündən az vaxt qalıb. Hər kəs bu bayramı bir qayda olaraq, müxtəlif yerlərdə, fərqli mühitdə keçirir. Kimisi bayramı evində - ailəsi və qohumları ilə birgə qeyd edir, kimisi isə xaricə üz tutur. Bir sözlə, hamının bayramla bağlı müxtəlif planları var.
Maraqlıdır bəs, Milli Məclisin deputatları Yeni ili harada və necə keçirməyi planlaşdırır?
Modern.az saytının əməkdaşı bu sualla bir neçə deputata müraciət edib:
Məlahət İbrahimqızı deyib ki, fərqli bir planı yoxdur, evdə qeyd edəcək:
“Yeni ili evdə ailə üzvlərimlə bir yerdə qeyd etməyi düşünürəm. Tətil günlərində isə şəhid, qazi ailələri ilə görüşməyi planlayıram”.
Fazil Mustafa yeni ili Azərbaycanın rayonlarında qarşılayacaq:
“Yeni ili ölkə daxilində qeyd edəcəm. Çox güman ki, evdə ya da Azərbaycanın rayonlarının birində ailə üzvlərimlə birgə bayram edəcəyik. Düşünürəm ki, Şamaxıda və ya İsmayıllıda olacam”.
Arzu Nağıyev də həmkarı kimi rayonda olacaq. O bildirib ki, Tovuza ata ocağına yığışıb, bayramı ailə üzvləri ilə birgə qeyd edəcək:
“Mən bayramları hər zaman ənənəvi olaraq ailə çərçivəsində qeyd edirəm. Bu il də Yeni ili ailəmlə bir yerdə Tovuz rayonunda atamın başına yığışıb, qeyd edəcəm. Eyni zamanda, bu tətildən istifadə edərək həm Tovuzda, həm də Gədəbəydə öz seçicilərimlə görüşəcəm.
Elman Məmmədov da bayram gününü ailə üzvləri ilə birgə evdə qeyd edəcək:
“Hər zaman olduğu kimi Azərbaycanda qeyd edəcəm. Bayram günlərində Azərbaycanın bir neçə rayonlarında olacam. Ağdam, Goranboy, Xocavənd rayonlarına səfər edəcəm”.
Aydın Mirzəzadənin sözlərinə görə, ənənəvi olaraq bayramları evində keçirir:
“Ailəmlə, öz evimdə övladlarımı ətrafıma toplayaraq Yeni İlin gəlişini qeyd edəcəm. Mən düşünürəm ki, bayramı hər kəs öz evində qeyd etməlidir”.
Hikmət Babaoğlu da həmkarları kimi bayram günlərində Bakıda olacaq:
“Mən Yeni ilin gəlişini Bakıda evimdə qeyd edəcəm. Bayramı öz evimdə olmağı üstün tuturam. Bayramdan sonra isə Şimal bölgəsində səfərdə olacam”.
Aqil Abbas da bayramı evində qeyd edən deputatlar sırasındadır:
“Bayramı insan evində olar. Mən ailəmlə birgə Yeni ilin gəlişini evimdə qeyd edəcəm”.
Əziz Ələkbərli hər zaman bayramı evində qeyd etdiyini deyib:
“Mənim fikrimcə, insan bayramı evində olmalıdır. Buna görə də hər bayram gecəsi ailəmi ətrafıma yığıb bayramı qeyd edirəm”.
Bütöv.az
23-12-2021, 17:11
Fövqəladə hallar naziri general-polkovnik Kəmaləddin Heydərov polkovniki təqaüdə göndərib.
“Qaynarinfo”nun əldə etdiyi məlumata görə, nazirin müvafiq əmri ilə Fövqəladə Hallar Nazirliyinin (FHN) Xüsusi Riskli Xilasetmə Xidmətinin rəisinin maddi-texniki təminat üzrə müavini polkovnik Rəhimov Arzu Hüseyn oğlu bir müddət əvvəl vəzifəsindən azad olunub. Arzu Rəhimov öz istəyi ilə təqaüdə göndərilib.
Qeyd edək ki, Arzu Rəhimov 1960-cı ildə Naxçıvan Muxtar Respublikasının Naxçıvan şəhərində anadan olub.
Naxçıvan Dövlət Pedaqoji İnstitutunu bitirib.
Ailəlidir, iki övladı var.
Bütöv.az
23-12-2021, 17:06
“Ermənilər 30-dan artıq azərbaycanlını qətlə yetirmiş, 3 ailənin evindən heç kəs çıxa bilməmiş, 12 nəfər qadın, uşaq, qoca diri-diri yandırılmışdır...”
Xocalı rayonunun hələ də faktiki olaraq Rusiya “sülhməramlı” kontingentinin himayəsindəki separatçı və işğalçı erməni rejiminin nəzarətində qalan Meşəli kəndindəki qətliamdan 30 il keçdi....
Moderator.az xəbər verir ki, “Facebook” sosial şəbəkəsindəki “Laçın” profilində yayılmış paylaşımda belə deyilir:
“1991-ci il dekabrın 23-də Xocalı rayonunun Meşəli kəndində erməni terrorçuları tərəfindən amansızlıqla qətlə yetirilmiş əslən Laçın rayonunun Fərraş və Arduclu kəndlərindən olan şəhidlərimiz:
1.Kazımov Xəlil Mahmud oğlu - Fərraş kəndi.
2.Allahverdiyev Vidadi Müsül oğlu.
3.Orucov Miryusif Kərim oğlu.
4.Novruzov Novruz Məhərrəm oğlu.
5.Novruzova Adilə Məhəmməd qızı.
6.Novruzov Allahverdi Novruz oğlu.
7.Novruzova Rahilə Novruz qızı.
8.Novruzova Rübabə Novruz qızı.
9.Quliyev Qənimət Əbi oğlu.
10.Quliyeva Ruba Hacı qızı.
11.Quliyev Mətləb Qənimət oğlu.
12.Quliyev İsmayıl Qənimət oğlu.
13.Nurməmmədov Hüseyn İrza oğlu.
14.Nurmmədova Pakizə İslam qızı.
15.İbadullayev Əli Nəbi oğlu.
16.Mehrəliyev Əli Mürsəl
17.Hümbətov Bəhlul Müseyib oğlu.
18.Mahmdova Sürəyya Alış qızı.
19.Qasımov Ənvər Bahadır oğlu - Arduşlu kəndindəndir.
Öz füsunkar təbiəti, buz bulaqları, yaşıl ormanları, azman meşələri ilə dağlar qoynunda binə tutmuş Meşəli kəndi yer üzündən silindi. Dekabrın 23-də (1991-ci il) səhər saat 7 radələrində erməni qüvvələri kəndi mühasirəyə almış və son evədək yandırmışlar. Çox böyük insan tələfatı olmuşdur. İlkin məlumata görə, ermənilər 30 nəfərdən artıq azərbaycanlını (qocaları, qadınları, uşaqları) qətlə yetirmiş, bir çoxunu isə vəhşicəsinə yandırmışdır. İtkin düşənlər olmuşdur. Kənd sakinlərindən 3 ailənin evindən heç kəs çıxa bilməmiş, 12 nəfər qadın, uşaq, qoca diri-diri yandırılmışdır.
Meşəli faciəsi bir daha göstərdi ki, ermənilər keçmiş Dağlıq Qarabağı azərbaycanlılardan tam təmizləmək üçün Moskvadan və İrəvandan xüsusi göstəriş alıblar...
Meşəlidə faktiki genosid törədildi. Günahsız adamların meyitləri iki gün ərzində vertolyotlar vasitəsilə daşındı.
Allah bütün şəhidlərə rəhmət eləsin!..”
Zəruri arayış:
Meşəli — Azərbaycan Respublikasının Xocalı rayonunun Meşəli kənd inzibati ərazi dairəsində kənddir.
1992-ci ildən 2020-ci ilə kimi Ermənistan Silahlı Qüvvələrinin işğalı altında olub. İkinci Qarabağ müharibəsinin nəticələrinə əsasən imzalanmış 10 Noyabr 2020-ci il tarixli üçtərəfli bəyanata uyğun olaraq Meşəli kəndi Rusiya sülhməramlı qüvvələrinin nəzarətinə keçmişdir.
Tarixi. Coğrafi mövqeyi...
Meşəli kəndinin adı türk dilində izah olunur və meşəlik yerdə yerləşdiyinə görə belə adlandırılmışdır.
Kənd Qırxqız dağlarının ətəyində, Badara çayının yaxınlığında, Qırxqız zirvəsinsən hava xətti ilə 10-15 km məsafədədədir. Palıd, fıstıq və cır meyvə ağaclarından ibarət mənzərəli meşəlik ərazidə yerləşdiyi üçün belə adlanmışdır. Uzun müddət ermənilərin millətçi rəhbər orqanları tərəfindən yaşayış məntəqələrinin rəsmi siyahisına salınmamışdır. Yalnız 1990-ci ildə kənd statusu verilib. Kəndin ərazisində qədim qəsr, imarət, kurqan və s. maddi mədəniyyət nümunələrinin nişanələri var. 1991-ci ildə ermənilər tərəfindən yandırılmış, əhalisi didərgin düşmüşdür...
Sultan Laçın
Bütöv.az
23-12-2021, 16:58
Prezident İlham Əliyev Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin həqiqi hərbi xidmət hərbi qulluqçularının aylıq pul təminatının və dövlət qulluqçusu olmayan mülki işçilərinin aylıq vəzifə (tarif) maaşlarının artırılması haqqında fərman imzalayıb.
Bununla bağlı Prezident.az məlumat yayıb.
Fərmana əsasən, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin həqiqi hərbi xidmət hərbi qulluqçularının aylıq vəzifə maaşlarına həmin maaşın 20 faizi məbləğində əlavə müəyyən edilir.
Bundan başqa, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin dövlət qulluqçusu olmayan mülki işçilərinin aylıq vəzifə (tarif) maaşları orta hesabla 20 faiz artırılır.
Bütöv.az
23-12-2021, 16:27
“Fransa prezidentliyinə namizəd Valeri Pekresin Qarabağa səfərinə Rusiya sülhməramlıların hansı əsasla yol verməsi haqlı sual doğurur”.
Bunu “Report”a sabiq xarici işlər naziri, politoloq Tofiq Zülfüqarov bildirib.
Onun sözlərinə görə, Valeri Pekres namizədliyi köklü ənənələrə malik respublikaçılar tərəfindən irəli sürülsə də, son vaxtlar onlardan bir qədər uzaqlaşaraq daha radikal fikirlər səsləndirməyə başlayıb:
“Onun Ermənistana son səfəri qarşıdakı seçkilər ərəfəsində daha çox xal qazanmaq məqsədi daşıyır. Fransada erməni diasporu və onların səsləri 1 faizdən artıq olmasa da, ekspertlərin fikrincə, qarşıdakı seçkilər gərgin keçəcəyi üçün səslərin hər faizi uğrunda mübarizə məkrli vasitələrlə aparılır. Belə ki, Valeri Pekres seçki kampaniyasında daha çox xal qazanmaq ümidilə İrəvandan sonra qanunsuz olaraq Qarabağa səfər edib”.
Sabiq nazir vurğulayıb ki, Rusiya sülhməramlıları həmin namizədə xal qazandırıb: “Bu cür səfərlər Laçın dəhlizini nəzarətə götürməyimiz üçün daha bir tutarlı əsas yaradır. Azərbaycanın suveren hüquqlarına qarşı bu cür oyunlara yol verməmək üçün həmin məsələ həll olunmalıdır”.
Bütöv.az
23-12-2021, 16:26
2021-ci il ərzində Azərbaycan Respublikası vətəndaşlarının intim videogörüntüləri ilə şantaj edilmələri, belə videomaterialların müxtəlif sosial şəbəkələr vasitəsilə yayılmasının təşkil edilməsi barədə daxil olmuş məlumatlar Dövlət Təhlükəsizliyi Xidməti (DTX) tərəfindən araşdırılıb.
DTX-dən verilən məlumata görə, faktlarla bağlı DTX-nin İstintaq baş idarəsində Azərbaycan Respublikası Cinayət Məcəlləsinin 182.3.1, 182.3.2 (mütəşəkkil dəstə tərəfindən zərərçəkmiş şəxslər və onların yaxın qohumları haqqında rüsvayedici məlumatlar yayma hədəsi ilə külli miqdarda pul vəsaitlərinin tələb edilməsi), 272.2.1 və 272.2.2-ci (texniki vasitələrdən istifadə etməklə kompüter məlumatlarının təkrar ələ keçirilməsi) maddələri ilə başlanılmış cinayət işi üzrə istintaq qrupu yaradılmış, kompleks istintaq-əməliyyat və əməliyyat-texniki tədbirləri həyata keçirilib.
Müəyyən edilib ki, mütəşəkkil dəstə üzvləri “Facebook” sosial şəbəkəsində yaratdıqları saxta hesablar vasitəsilə müxtəlif Azərbaycan Respublikasının vətəndaşlarına məxsus hesablara videogörüntülü zənglər edərək intim xarakterli davranışlara sövq etməyə yönələn hərəkətlər edib, texniki vasitələrdən istifadə edilməklə xüsusi proqram təminatları ilə zəng edən və zəng qəbul edən tərəflərin qarşılıqlı əks olunduğu ekran pəncərəsinin videoçəkilişini həyata keçirib, “Facebook Messenger” və “WhatsApp” tətbiqləri vasitəsilə həmin vətəndaşlarla əlaqə yaradıb onların və yaxın qohumlarının barəsində rüsvayedici materialları nümayiş etdirib yayma hədəsi ilə külli miqdarda pul vəsaitləri tələb edərək beynəlxalq pul köçürmə sistemləri vasitəsilə çoxsaylı hesablara göndərilməsini təmin ediblər.
Genişmiqyaslı araşdırma tədbirləri ilə ölkə hüdudlarından kənarda olan cinayətkar şəbəkə üzvlərinin istifadəsində olan cihazların internet şəbəkəsinə qoşulduğu İP-ünvanları və digər abunəçi məlumatları əldə edilib, kibercinayətkarlığa dair beynəlxalq konvensiyaların müddəalarına istinadən həmin İP-ünvanları üzrə məlumatların müvafiq dövlətlərin aidiyyəti strukturları vasitəsilə təxirəsalınmaz mühafizəsi təmin edilib, cinayətkar şəbəkəyə daxil olan 32 nəfərin şəxsiyyəti təsbit edilərək texniki izlər və pul köçürmələri əsasında davam edən cinayət əməllərindən 200 nəfərdən artıq Azərbaycan Respublikası vətəndaşının zərər çəkdiyi məlum olub.
Cinayət işi üzrə beynəlxalq hüquqi yardım prosedurları çərçivəsində cinayət əməllərinin təşkilatçılarının Bolqarıstan Respublikasında məskunlaşdığı müəyyən edilərək Bolqarıstan Respublikasının hüquq mühafizə orqanları ilə birgə həmin ölkənin Silistra əyalətində yerləşən ünvanlarda axtarış, dindirmə və digər intensiv istintaq hərəkətləri keçirilib. Cinayət əməllərinin təşkilatçıları, icraçıları və vasitəçiləri cinayət başında ifşa edilib, Azərbaycan və digər xarici ölkə vətəndaşlarının şantaj edildiyinə dəlalət edən videomateriallar, səsli mesajlar və yazışmaların olduğu çoxsaylı kompüter, mobil telefon və texniki avadanlıqlar götürülməklə DTX-də aparılan cinayət işi materiallarına əlavə edilib, çoxsaylı sosial şəbəkə hesablarındakı videomateriallara kənardan daxilolma imkanları məhdudlaşdırılmaqla davam edən cinayət əməllərinin qarşısı alınıb.
Cinayət əməlləri ifşa edilmiş xarici ölkə vətəndaşları Gyurdzhan Stoyanov, Tezdzhan Stoyanov, Sevinch Niyazi və digərləri təqsirləndirilən şəxs qismində cinayət məsuliyyətinə cəlb edilməklə, barələrində məhkəmə qərarı ilə həbs qətimkan tədbiri seçilmişdir. Hazırda beynəlxalq hüquqi prosedur tədbirlər yerinə yetirilməkdədir.
Cinayət işi üzrə araşdırmalar davam edir.
Bütöv.az
23-12-2021, 16:20
Qazaxıstan Respublikasının birinci Prezidenti – Elbası Nursultan Nazarbayev Azərbaycan Prezidenti İlham Əliyevə təbrik məktubu göndərib.
Prezident.az xəbər verir ki, məktubda deyilir:
“Hörmətli İlham Heydər oğlu,
Altmış illik yubileyiniz münasibətilə səmimi təbriklərimi qəbul edin.
Siz dövlət başçısı kimi atanız – mənim dostum Heydər Əliyevin başlatdığı işi davam etdirərək xalqın rifahının yüksəldilməsində, ölkənin iqtisadiyyatının inkişafında və beynəlxalq aləmdə nüfuzunun möhkəmlənməsində böyük nailiyyətlər əldə etmisiniz.
Ölkənizin ərazi bütövlüyünün bərpası xüsusi sevinc doğurmuşdur. Cənubi Qafqazda uzunmüddətli sülhün bərqərar olmasında Sizin səyləriniz regionda təhlükəsizliyə və sabitliyə töhfə verir.
Azərbaycanın parlaq gələcəyi, 2030-cu ilə qədər sosial-iqtisadi inkişafa dair milli prioritetlərə uyğun olaraq məqsəd və planların uğurla reallaşdırılması üçün məsul işinizdə Sizə uğurlar arzulayıram.
Əminəm ki, Qazaxıstan ilə Azərbaycan arasında qarşılıqlı hörmət və mehriban qonşuluq ənənələrinə əsaslanan hərtərəfli strateji tərəfdaşlıq bundan sonra da xalqlarımızın rifahı naminə dinamik şəkildə yüksələcək və inkişaf edəcəkdir.
Sizinlə görüşlərimizi həmişə səmimiyyətlə xatırlayıram, münasibətlərimizin gələcəkdə də davam edəcəyinə ümidvaram.
Hörmətli İlham Heydər oğlu, yubileyiniz münasibətilə Sizə möhkəm cansağlığı, ailə səadəti, məsul dövləti fəaliyyətinizdə uğurlar, qardaş Azərbaycan xalqına isə sülh və firavanlıq diləyirəm”.
Bütöv.az
23-12-2021, 11:33
“Zərdab Mərkəzi Rayon Xəstəxanası” Publik Hüquqi Şəxsin elan etdiyi kotirovka müsabiqələrinin qalibləri məlum olub.
Müsabiqələrin qalibləri “Gülay 2012” MMC və “Hikmət-2000” MMC olub. 12.10.2021-ci il tarixdə start götürən hər iki lot üzrə müsabiqə 6 gün sonra-18.10.2021-ci ildə yekunlaşıb.
“Gülay 2012” MMC “Zərdab Mərkəzi Rayon Xəstəxanası”nın sifarişi əsasında nəqliyyat vasitələrinin cari təmirini həyata keçirəcək və qarşılığında 14774 manat alacaq.
“Hikmət-2000” MMC isə “Zərdab Mərkəzi Rayon Xəstəxanası”nın sifarişi əsasında nəqliyyat vasitələrinin əsaslı təmirini həyata keçirəcək və qarşılığında 15790 manat alacaq.
Məlumat üçün bildirək ki, kotirovka müsabiqəsinin qalibi olan şirkətlərin təkcə adlarında bənzərlik yoxdur. Araşdırmalarımızla məlum oldu ki, bu şirkətlərin hər ikisinin hüquqi ünvanı Ağcabədi rayonunun Aşağı Avşar kəndi olaraq göstərilir. Nizamnamə kapitalları 10 manat olan MMC-lərdən birinin (“Gülay 2012”) qanuni təmsilçisi Məmmədov Həbib Müslüm oğlu, digərinin (“Hikmət-2000”) qanuni təmsilçisi isə Mamedov Rafil Müslüm oğludur.
Qeyd edək ki, “Hikmət-2000” MMC bugünə kimi yalnız “Zərdab Mərkəzi Rayon Xəstəxanası” tərəfindən keçirilən müsabiqənin qalib olmayıb və fərqli xidmətlər (avtomobil təmiri, dam örtüyünün sökülməsi, radiatorun sökülməsi) göstərib.
Bu arada diqqəti çəkən “Zərdab Mərkəzi Rayon Xəstəxanası” Publik Hüquqi Şəxsin nəqliyyat vasitələrinin təmirinin iki mərhələdə- cari və əsaslı olaraq icra olunmasıdır(?) Nəqliyyat vasitələrinin cari təmiri nə, əsaslı təmiri nədir? Amma, cavablandırılası suallar bununla bitmir. Biz Yenixeber.org olaraq bu mövzu ilə bağlı “Zərdab Mərkəzi Rayon Xəstəxanası” Publik Hüquqi Şəxsin direktoru cənab Ruslan Nemətova bu ayın 19-da online sorğu ünvanlamışıq. Təəssüf ki, hələ də cavab yoxdur.
Kotirovka müsabiqələrinin qalibləri olan “Gülay 2012” MMC və “Hikmət-2000” MMC-lərin isə heç bir əlaqə vasitəsini əldə edə bilmədik (?)
***
“Dövlət xətti ilə aparılan layihələrin, dövlət alışlarının icrası ilə əlaqədar tenderlərdə adətən bir neçə icra başçısına, ya da ki, onların müavininə yaxın olan şirkətlər qalib gəlirdilər. Nə üçün? Çünki burada da rüşvətxorluq və mənimsəmə halları kütləvi xarakter alırdı və bu da dövlət büdcəsinə böyük ziyandır. Əgər korrupsiya, rüşvətxorluq halları olmasaydı, baxın, bizim dövlət büdcəmiz nə qədər artardı, bizim imkanlarımız nə qədər genişlənərdi…”
Bu sözləri isə cənab prezident İlham Əliyev sentyabrın 14 də Cəlilabad və Şəmkir rayonlarına təyin etdiyi yeni icra başçılarını videoformatda qəbul edərkən söyləyib. Mövzu ilə bağlı geniş yazımız olacaq (yenixeber.org)
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!