8-11-2022, 20:29
Çin Şarl Mişelin çıxışına icazə vermədi
Çin Avropa İttifaqı Şurasının Prezidenti Şarl Mişelin müraciətinin televiziyada yayımlanmasına icazə verməyib. Bu barədə "Reuters" agentliyi öz mənbələrinə istinadən məlumat yayıb. Mişelin müraciəti Çində keçirilən sərginin açılış hissəsində yayımlanmalı idi. O, sözügedən çıxışında Rusiyanın Ukraynada apardığı qanunsuz müharibəni kəskin şəkildə tənqid edib. Məlumata görə, bu səbəbdən onun çıxışına Çində qadağa qoyulub. Mişel isə Çini müharibənin tənzimlənməsində nüfuzundan istifadə etməyə çağırıb.
8-11-2022, 20:28
“İrəli” gəncləri Zəfər Gününü silsilə tədbirlərlə qeyd ediblər
8 Noyabr – Zəfər Günü “İrəli” İctimai Birliyi tərəfindən silsilə tədbirlərlə qeyd olunub.
Birliyin Mətbuat xidmətindən Butov.az-a məlumat verilib ki, təşkilatın nümayəndə və üzvlərinin iştirakı ilə II Fəxri xiyabanda Vətən müharibəsində ölkəmizin ərazi bütövlüyü uğrunda canından keçmiş qəhrəmanlarımızın əziz xatirəsi dərin ehtiramla yad edilib.
Tədbirlər planı çərçivəsində “İrəli” İctimai Birliyinin təşkilatçılığı, Azərbaycan Respublikası Müdafiə Nazirliyinin dəstəyi ilə “N” saylı hərbi hissədə Zəfər Gününə həsr olunmuş tədbir keçirilib.
Tədbirə başlamazdan öncə “İrəli” gəncləri hərbi hissədə əsgərlər üçün yaradılmış şərait və hərbi texnikalarla tanış olublar.
Rəsmi hissə Azərbaycan Respublikasının Dövlət Himninin səsləndirilməsi, habelə şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Tədbirdə çıxış edən “N” saylı hərbi hissənin İdeoloji iş və mənəvi-psixoloji təminat şöbəsinin rəis müavini, mayor Nəcəf Xurşudov bildirib ki, 44 günlük Vətən müharibəsi Azərbaycanın hərb tarixinə öz adını qızıl hərflərlə yazdı. Müzəffər Ali Baş Komandan, cənab Prezident İlham Əliyevin rəhbərliyi altında torpaqlarımızın işğaldan azad edilməsi bu gün hər bir azərbaycanlı üçün böyük qürur və fəxarət mənbəyinə çevrilib.
“İrəli” İctimai Birliyinin sədri Şahin Rəhmanlı çıxışı zamanı ikinci Qarabağ müharibəsində qazanılan şanlı qələbəyə görə dövlətimizin başçısına öz təşəkkürünü bildirib. Vətən müharibəsinin ikinci ildönümü çərçivəsində “İrəli” İctimai Birliyi tərəfindən bir sıra tədbirlərin keçirdiyini bildirən təşkilat rəhbəri diqqətə çatdırıb ki, 44 günlük müharibədə şəhidlik zirvəsində ucalmış qəhrəmanlarımızın xatirəsinin əbədiləşdirilməsi məqsədilə həyata keçirilən “Müzəffər Əsgərimiz” layihəsinin buraxılışları indiyədək 45 rayon və şəhərdə 5000-ə yaxın gəncin iştirakı ilə nümayiş etdirilib.
Hərbi qulluqçulara Zəfər Günü münasibətilə təbriklərini çatdıran Şahin Rəhmanlı qeyd edib ki, “İrəli” İctimai Birliyi tərəfindən ordumuzun şəxsi heyətinin ruh yüksəkliyinin artırılması, həmçinin dövlətimizin bu istiqamətdə həyata keçirdiyi fəaliyyətlərə töhfələr verməyə bundan sonra da davam edəcək.
Rəsmi hissənin sonunda “İrəli” İctimai Birliyi tərəfindən öz xidməti vəzifələrini və hərbi hissənin qarşısında qoyulmuş tapşırıqları yerinə yetirərkən fərqləndiklərinə görə Azərbaycan Silahlı Qüvvələrinin bir qrup əsgərə təltifnamələr təqdim olunub.
Tədbir bir sıra müğənnilərin iştirakı ilə konsert proqramı və əsgərlərlə birgə naharla davam edib.
Zəfər Gününə həsr olunmuş tədbirlər planına uyğun olaraq “İrəli” İctimai Birliyinin İntellektual mərkəzinin təşkilatçılığı ilə “Zəfər Tarixi” adlı intellektual turnir keçirilib. “Nə? Harada? Nə zaman?” formatında, ümumilikdə 100-dək gəncin iştirakı ilə baş tutan intellektual turnirdə 8 komanda birincilik uğrunda mübarizə aparıb.
8-11-2022, 20:25
Çavuşoğlu Ermənistana mesaj ünvanladı: Sülh üçün...
“Cənubi Qafqazda barış və rifah üçün Ermənistanla normallaşma prosesi aparırıq”. Bunu Türkiyənin xarici işlər naziri Mövlud Çavuşoğlu Böyük Millət Məclisinin (TBMM) komitə iclasında deyib. XİN başçısı qeyd edib ki, Türkiyənin Azərbaycanla koordinasiyalı şəkildə Ermənistanı regionda sülhdə maraqlı olan tərəfə çevirmək cəhdləri davam edəcək. Nazir, həmçinin Azərbaycanla müdafiə, enerji, logistika, nəqliyyat sahələrində, eləcə də işğaldan azad edilmiş ərazilərin bərpasında hərtərəfli əməkdaşlığın davam etdiyini vurğulayıb.
8-11-2022, 20:23
Fransa dünya çempionatını ərəblərə satıbmış - Gözlənilməz etiraf
Beynəlxalq Futbol Federasiyasının (FİFA) keçmiş prezidenti Yozef Blatter Qətərin 2022-ci il dünya çempionatına ev sahibliyi etmək hüququnu almasını səhv addım adlandırıb. O, dünya çempionatının ev sahibi ölkəsinin seçiminin təfərrüatlarından, o cümlədən Yaxın Şərq ölkəsi ilə Fransa arasındakı gizli razılaşmadan danışıb. Blatterin fikirlərini İsveçrənin “Tages-Anzeiger” qəzeti yayıb. Blatterin sözlərinə görə, 2010-cu ildə çempionatın keçiriləcəyi məkanı seçməzdən əvvəl FİFA icraiyyə komitəsi faktiki olaraq razılaşıb ki, Rusiya 2018-ci ilin, ABŞ isə 2022-ci ilin dünya çempionatına ev sahibliyi edəcək. Təşkilatın eks-prezidentinin fikrincə, “uzun müddətdir siyasi rəqiblər olan iki ölkə dünya çempionatlarını ard-arda keçirsəydilər, bu, sülh jesti olardı”. Lakin seçimdən bir həftə əvvəl Blatterə UEFA-nın o vaxtkı rəhbəri Mişel Platini zəng edib və planın baş tutmayacağını bildirib. O, Yelisey sarayında Qətərin vəliəhdi ilə nahar edən Fransa prezidenti Nikola Sarkozi ilə görüşdüyünü söyləyib. "Sarkozi Platiniyə deyib: "Dünya çempionatının ev sahibinin seçilməsi zamanı görün, siz və UEFA-dakı həmkarlarınız Qətər üçün nə edə bilər"”, - Blatter əlavə edib. Onun sözlərinə görə, sonda 2022-ci il dünya çempionatının ABŞ-a yox, Qətərə verilməsində Platini və tərəfdarlarının 4 səsi həlledici rol oynayıb. Eyni zamanda, Blatter bunun həm Fransa prezidentinin istəyi, həm də pul müqabilində baş tutduğunu qeyd edərək, “6 ayda Qətərin fransızlardan 14,6 milyard dollara qırıcı təyyarələr aldığını” bildirib. Bundan əlavə, Yozef Blatter Qətəri futbol üzrə dünya çempionatının keçirilməsi üçün çox kiçik ölkə adlandırıb. Blatter 1998-ci ildən FİFA prezidenti vəzifəsində çalışıb. 2015-ci ildə korrupsiya qalmaqalına görə tutduğu vəzifədən uzaqlaşdırılıb. Bu ilin iyulunda Blatter bəraət qazanıb.
8-11-2022, 20:21
Şəhid övladından atası ilə bağlı təsirli paylaşım
Milli Qəhrəman, şəhid polkovnik İlqar Mirzəyevin oğlu Elvin Mirzəyev 8 Noyabr - Zəfər Günü ilə bağlı təsirli paylaşım edib. Butov.az şəhid övladının atası haqqında yazdığı statusu olduğu kimi təqdim edir: "Canım, gözüm, fəxrim atam. Ata sən mənim, Azərbaycanın qəhrəmanı, qürur mənbəyisən. Ata sənin üçün çox darıxmışıq, səni görmək, səninlə söhbət etmək üçün nələrimi verərdim bir bilsən. Amma, bu gün həm kədərli, həm qürurluyam. Çünki ata, bu gün sənin və sənin kimi bu Zəfər yolunda canından, qanından keçmiş, şərəfli Vətən övladlarının günüdür. Atam, sən bizdən narahat olma heç vaxt sənin övladların, görmək istədiyin yerlərdədir. Bizim borcumuz sənin adını uca tutmaqdır və uca tutacağıq daima. Atam, bu gün Şəhidlər Xiyabanına ziyarətinə gəlmişdik, hiss etdinmi? Gördünmü bizi? Azərbaycan xalqı orada idi, qürurlandın, fəxr etdin, əminəm. Çünki sən əminsən ki, əbəs yerə can verməmisən. Çünki bu xalq səni unutmadı, unutmayacaq və unutmağa qoymayacaq. Azaddır torpaqlarımız, azaddır həsrətində olduğun Şuşa. Artıq, yerli sakinlər ora əmin amanlıqla gedir və gedəcək. Bunu siz bacardınız, öz qanınız və canınızla. Haqq uğrunda savaşdın, yorulmadın, bezmədin üzündə hər zaman Vətən gülüşü var idi. Son tapşırığını şərəfli, peşəkar zabit kimi fəxrlə yerinə yetirərək şəhid oldun. Zəfəriniz mübarək olsun, əziz şəhidlər, zəfəriniz mübarək olsun, əziz həmvətənlərim, Zəfərin mübarək olsun Azərbaycan, Zəfərin mübarək olsun ATAM!”
Xatırladaq ki, polkovnik İlqar Mirzəyev 14 iyul 2020-ci ildə Tovuz istiqamətində baş verən döyüşlər zamanı qəhrəmancasına şəhid olub.
8-11-2022, 20:18
Avropa İttifaqından Ermənistana məsləhət: buna hazır olun!
Avropa İttifaqının Cənubi Qafqaz və Gürcüstan böhranı üzrə xüsusi nümayəndəsi Toivo Klaarın bugünlərdə gerçəkləşən İrəvan səfəri kifayət qədər hadisəli olub. Bu barədə Ermənistanın “Past” qəzeti yazıb. “Diplomatik mənbəmizin bildirdiyinə görə, Avropa İttifaqı Klaara danışıqlarda iştirak edən tərəflərlə Ermənistan-Azərbaycan münasibətlərinin nizamlanmasına dair “Brüssel paketi” üzərində işləmək səlahiyyəti verib və regional səfər də məhz bu mövzuya aid idi. Əldə etdiyimiz məlumata görə, Toivo Klaar Ermənistan hakimiyyətinə “Brüssel paketi”nə müəyyən dəyişikliklərin istisna edilmədiyini çatdırıb. Lakin söhbəti konkret nədən getdiyini açıqlamayıb”, - deyə adıçəkilən nəşr qeyd edib. Qəzetin bildirdiyinə görə, Aİ-nin xüsusi nümayəndəsi parlamentin hakim fraksiyası ilə ayrıca müzakirə aparıb və qeyd edib ki, Ermənistan-Azərbaycan razılaşması ərəfəsində bu mövzu ətrafında “ictimai konsensus” üçün parlament dinləmələrinin keçirilməsi zərurəti yarana bilər. Məlumata əsasən, bu məsələ hakim iqtidarın nümayəndələri tərəfindən birmənalı qarşılanmayıb. Deputatlar Klaara bunun çox həssas mövzu olduğunu çatdırıblar, ictimai reaksiyanın kifayət qədər sərt olduğuna və bu mövzuda müzakirələrin çətinlik yarada biləcəyinə eyham vurublar. Bununla belə, avropalı diplomat qeyd edib ki, o, mövzunun həssaslığından xəbərdardır, lakin demokratiya nöqteyi-nəzərindən bu, vacib prosesdir, ona görə də onlar mümkün müzakirələrə hazır olmalıdırlar.
8-11-2022, 16:47
Gənc əsgərlər and içdilər
Azərbaycan Respublikasının müdafiə nazirinin təsdiq etdiyi 2022-ci il hazırlıq planına uyğun olaraq noyabrın 8-də Azərbaycan Ordusunda gənc əsgərlərin andiçmə mərasimləri keçirilib. Bu barədə Müdafiə Nazirliyindən məlumat verilib. Mərasimlərdə əvvəlcə Ulu Öndər Heydər Əliyevin, eləcə də Azərbaycanın müstəqilliyi və suverenliyi uğrunda şəhid olanların xatirəsi bir dəqiqəlik sükutla yad edilib, hərbi orkestrin müşayiəti ilə Azərbaycan Respublikasının Dövlət Himni səsləndirilib. Gənc əsgərlər təntənəli surətdə Hərbi andı qəbul edərək Vətənə sadiq olacaqlarına söz veriblər. Müdafiə Nazirliyinin nümayəndələri və hərbi hissələrin komandanlıqları gənc əsgərləri Hərbi andı qəbul etmələri münasibətilə təbrik edib, onlara xidmətlərində nizam-intizamlı, vicdanlı və cəsarətli olmağı, həvalə edilmiş silah və texnikanı dərindən öyrənməyi, Vətənə olan əsgəri borcunu ləyaqətlə yerinə yetirməyi arzulayıblar. Sonda şəxsi heyətin təntənəli marşla tribuna önündən keçidi olub.
8-11-2022, 16:45
Ərdoğan Azərbaycanı təbrik etdi
Türkiyə Prezidenti Rəcəb Tayyib Ərdoğan Azərbaycan xalqını Zəfər Günü münasibətilə təbrik edib. Bununla bağlı Prezidentin Tvitter hesabında paylaşım edilib. Paylaşımda deyilir: “Dastan olacaq bir mücadilənin verildiyi 44 günün ardından Qarabağın yenidən azadlığına qovuşmasının nişanəsi olan Azərbaycanın 8 Noyabr Zəfər Gününü ən səmimi duyğularımla təbrik edirəm. Qarabağ Azərbaycandır və həmişə Azərbaycan olaraq qalacaq”.
8-11-2022, 16:44
Sentyabr döyüşlərindən sonra ordumuzun yerləşdiyi yeni mövqelər açıqlandı
"13-14 sentyabr əməliyyatından sonra Azərbaycan-Ermənistan sərhədi istiqamətində əsas strateji yüksəkliklərdə Azərbaycan Silahlı Qüvvələri yerləşib". Bunu Silahlı Qüvvələrin Müzəffər Ali Baş Komandanı, Prezident İlham Əliyev noyabrın 8-də Şuşada hərbçilər qarşısında çıxışı zamanı deyib. "Ermənistan gözəl anlamalıdır bu, nə deməkdir. Bu gün həmin strateji yüksəkliklərdən Qarakilsə, Qafan, Gorus, İstisu şəhərlərini biz gözlərimizlə görürük. Biz Bala Göyçə gölünün sahilindəyik. Böyük Göyçə gölü də gözümüzün önündədir. Bütün bunlar reallıqlardır. Bu reallıqları biz yaratmışıq, Vətən müharibəsindən sonra. Nə üçün? İlk növbədə, Ermənistanın hərbi təxribatlarına cavab olaraq, digər tərəfdən, özümüzü gələcək hərbi təxribatlardan sığortalamaq üçün. Çünki dediyim yüksəkliklərdən Ermənistanın əksər postları görünür və əgər orada qüvvələrin konsentrasiyası baş verərsə, biz bunu görüb dərhal tədbir görəcəyik", - dövlət başçısı bildirib.
8-11-2022, 16:42
Rus sülhməramlılar Qarabağda müvəqqəti yerləşib - İlham Əliyev
“Qarabağ bizim torpağımızdır”. Bunu Prezident İlham Əliyev Şuşada hərbçilər qarşısında çıxışında deyib. Prezident rus sülhməramlılarının Qarabağda müvəqqəti yerləşdiyini vurğulayıb: “Rus sülhməramlılar orada müvəqqəti yerləşiblər. 2020-ci ilin 10 noyabr Bəyanatında onların müddəti göstərilir və əgər kiməsə bel bağlayırlarsa, yenə də faciə ilə üzləşəcəklər”.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!