12-03-2023, 16:00
Türkiyədə seçkilərə buraxılacaq partiyaların siyahısı açıqlandı
14 mayda Türkiyədə keçiriləcək seçkilərdə iştirak hüququ qazanan siyasi partiyalar məlum olub. Bu barədə ölkənin Ali Seçki Komissiyasının sədri Ahmet Yener məlumat verib. Bildirilib ki, ümumilikdə 36 siyasi partiya seçkilərə buraxılıb. Həmin partiyaların yer aldığı tam siyahı ilə aşağıdakı infoqrafikada tanış olmaq mümkündür:
12-03-2023, 15:39
Müharibə iştirakçısı jurnalistlər Prezidentə müraciət etdilər
Qarabağ müharibəsi iştirakçısı və şəhid ailəsi üzvü olan jurnalistlər Prezidentə müraciət ediblər. Müraciətdə deyilir: "Möhtərəm Prezident. Ümummilli Lider Heydər Əliyevin əsasını qoyduğu və Sizin böyük uğurla davam etdirdiyiniz daxili və xarici siyasətin, o cümlədən ordu quruculuğunun labüd nəticəsi olaraq, 44 günlük Vətən müharibəsi nəticəsində Qarabağ azadlığına qovuşdu. Biz media nümayəndələri də informasiya cəbhəsində mübarizə apararaq, Sizin rəhbərliyiniz altında görülən işlərin bütün dünyaya çatdırılmasına, kütləvi dezinformasiya hücumlarının qarşısının alınmasına, cəmiyyətimizin operativ və düzgün məlumatlandırılmasına töhfə verməyə çalışdıq. Qarabağ müharibəsi veteranları olan bir qrupumuz isə müxtəlif dövrlərdə döyüş əməliyyatlarında iştirak edib və yaralanlar da olub. Bizlər Sizin sərəncamınızla döyüşlərdə göstərdiyimiz şücaətlərə görə müxtəlif meallarla təltif olunmuşuq. Biz Sizin Ali Baş Komandanlığınız ilə bundan sonra da istənilən döyüşlərdə iştirak etməyə hazırıq! Cənab Ali Baş Komandan
Sizin sərəncamınızla inşa edilən, jurnalistlər üçün tikilmiş ikinci binada Milli Mətbuat Günü münasibətilə 20 iyul 2017-ci ildə mənzillərin paylanması mərasimində Siz də iştirak etmişdiniz. O zaman bizim sosial problemlərimizin həllinə dövlətimizin daim dəstək olacağını vurğulayaraq bildirmişdiniz: “Jurnalistlərin məişət problemlərinin həlli üçün bundan sonra da biz öz addımlarımızı atacağıq. Çünki mən yaxşı başa düşürəm ki, jurnalist biznesmen, iş adamı deyil. Jurnalistika ilə məşğul olan insan üçün mənzil almaq o qədər də asan məsələ deyil və dövlət burada həmişə sizin yanınızdadır”. Bu sözlərinizlə bizim sosial problemlərimizin həllinə dövlətimizin dəstək olacağına inamımızı daha da gücləndirmisiniz. Ölkəmizin ərazi bütövlüyünün təmin olunmasında xidməti olan müharibə veteranlarının sosial problemlərini hər zaman diqqətdə saxlamağınız, media nümayəndələrini özünüzün köməkçiləriniz hesab etməyiniz Sizə bu müraciəti ünvanlamağa bizdə inam yaratdı. Ölkəmizdə “Heydər Əliyev İli” elan olunmuş bu 2023-cü ildə müharibə iştirakçısı və şəhid ailəsindən olan jurnalistlərin mənzil problemlərinin həlli istiqamətində dövlətimiz tərəfindən növbəti addımın atılmasını xahiş edir, bunun bizlərin sonsuz sevincinə səbəb və fəaliyyətimizdə böyük stimul olacağına Sizi əmin etmək istəyirik. Sizin sərəncamınızla inşa edilən, jurnalistlər üçün tikilmiş üçüncü binada mənzillər bölünərkən Qarabağ müharibəsi veteranı, əlili və şəhid ailəsi üzvü olan jurnalistləri də nəzərə almağınızı xahiş edirik. Hörmətlə,
1. Məmmədli Bəxtiyar Feruz oğlu - Şəhid ailəsi (“Kaspi” qəzeti, müxbir)
2. Ağayev İlham Əli oğlu (İlham Tumas) - Müharibə veteranı (İctimai Televizya, redaktor)
3. Bəbirov Rza İmran oğlu - Müharibə əlili (ATV, koordinator-prodüser)
4. Eyvazov Şöhrət Qulam oğlu- Müharibə veteranı (İctimai Televizya, müxbir)
5. Salayev Nahid Mirsamid oğlu - Müharibə əlili ("Bakı-Xəbər" qəzeti, jurnalist, "Aria.az", redaktor)
6. Məmmədli Yelmar Valeh oğlu - Müharibə veteranı (Baku TV, redaktor)
7. Əliyev Müseyib Siyasət oğlu - Müharibə veteranı (Space TV, texnik)
8. Əzizov Daşqın Mehdi oğlu - Müharibə veteranı (Offside Sport Media, direktor)
9. Məmmədov Mahal Şahniyar oğlu - Müharibə veteranı (Azərbaycan Futzal Federasiyasının mətbuat katibi)
10. Məmmədov Səbuhi Ədalət oğlu - Müharibə veteranı (“Report" İnformasiya Agentliyi, montajçı)
11. Məcidli Bəxtiyar İftixar oğlu - Müharibə veteranı (ATV, redaktor )
12. Cəfərzadə Orxan Azat oğlu - Müharibə veteranı (“Kəpəz TV”, müxbir)
13. Şərəfxanlı Nəsimi Çərkəz oğlu - Müharibə veteranı (Cumhuriyyet.az, baş redaktor)
14. Baxşəliyev Rəşad Fizuli oğlu - Müharibə veteranı ("Azərbaycan" qəzeti, redaktor)
15. Rəşidov Rəşad Valeh oğlu - Müharibə veteranı (İctimai Televiziya, müxbir)
16. Məmmədov Zaur Əhməd oğlu - Şəhid ailəsi (“Unikal Media Qrup”, baş redaktor)
12-03-2023, 15:33
Xızı rayonunda hərbi sursat aşkarlanıb
Fövqəladə Hallar Nazirliyinin “112” qaynar telefon xəttinə Xızı rayonu, Giləzi qəsəbəsi ərazisində hərbi sursat aşkar edilməsi barədə məlumat daxil olub. Fövqəladə Hallar Nazirliyindən verilən məlumata görə, məlumatla əlaqədar dərhal FHN-in Xüsusi Riskli Xilasetmə Xidmətinin (XRXX) minalardan təmizləmə üzrə çevik qrupu hadisə yerinə cəlb edilib. Hüquq-mühafizə orqanı əməkdaşları ilə birgə ərazidə müvafiq təhlükəsizlik tədbirləri görüldükdən sonra hadisə yerinə baxış zamanı aşkar edilmiş sursatın döyüş tətbiqinə yararlı 125 mm-lik 40 ədəd OF26 tank, 120 mm-lik 1 ədəd minaatan və 100 mm-lik 1 ədəd top mərmisi olduğu müəyyən edilib. Sursat XRXX-nin çevik qrupunun mütəxəssisləri tərəfindən zərərsizləşdirilməsi üçün ərazidən götürülərək kənarlaşdırılıb. Hadisə yerində və ona yaxın ətraf ərazidə əlavə axtarış zamanı başqa hər hansı təhlükəli və ya şübhəli əşya aşkar edilməyib.
11-03-2023, 23:37
Gürcüstanda yenidən iğtişaşlar baş qaldırır
Gürcüstan parlamentinin binası qarşısında Müdafiə Məcəlləsinə edilən dəyişikliklərə qarşı etiraz aksiyası keçirilir. Aksiya liberal hesab edilən "Girçi" partiyası tərəfindən təşkil olunub. Aksiyaçılar Gürcüstanda hərbi xidmətin məcburi olmasına etirazlarını bildirir. Müxalifət nümayəndələri hərbi xidmətin könüllü əsaslarla olmasını tələb edir. Qeyd edək ki, Gürcüstanın Müdafiə Nazirliyi tərəfindən hazırlanmış “Müdafiə Məcəlləsi” fevralın 6-da parlament komitəsinə təqdim edilib. Yeni qanun layihəsi din xadimlərinin də məcburi hərbi xidmətə cəlb edilməsini nəzərdə tutur. Dəyişikliyə əsasən, din xadimləri qeyri-hərbi, alternativ əmək xidmətinə çağırılacaq. Bundan əvvəl Gürcüstan parlamenti birinci oxunuşda Rusiya qanunvericiliyinin analoqu olan “Xarici agentlər haqqında” qanun layihəsini dəstəkləyib. Sənəddə KİV-ə və xaricdən maliyyə alan ictimai təşkilatlara “xarici təsir agenti” statusunun verilməsi təklif edilib. Bundan sonra Tbilisidə qanun layihəsinə qarşı genişmiqyaslı etiraz aksiyaları başlayıb. Hakim partiya qanun layihəsini geri götürdüyünü elan edib. Ardınca Gürcüstan parlamentində layihə ikinci oxunuşda rədd edilib.
11-03-2023, 23:34
Fransada 1 milyon insan etirazçı kimi toplanacaq
Fransada pensiya yaşının 62-dən 64-ə qaldırılmasını nəzərdə tutan pensiya islahatına qarşı ümummilli mitinq və yürüşlər keçirilir. Fransa polisi ölkə ərazisində keçirilməsi planlaşdırılan 230 nümayişdə 800 min -1 milyon insanın iştirak edəcəyini, təkcə Parisdə 100 min etirazçının toplanacağını bildirib. Qeyd olunun ki, bugünkü etiraz həftə ərzində ikinci, ilin əvvəlindən bəri isə yeddinci aksiyadır. Bundan əvvəlki aksiya martın 7-də keçirilib və ölkə üzrə 1 milyondan çox şəxs iştirak edib. Bu gün Parisdə yürüşün başlamasından iki saat sonra etirazçılar polislə toqquşub. Hüquq-müharizə orqanları aksiyaçılara qarşı gözyaşardıcı qazdan istifadə edib. BFMTV-nin bu gün dərc etdiyi rəy sorğusu göstərir ki, fransızların 63%-i pensiya qanunu əleyhinə etirazları bəyənir.
11-03-2023, 23:27
İran Rusiyadan Su-35 döyüş təyyarələri aldı
İran Rusiyadan Su-35 döyüş təyyarələrinin satınalma prosedurlarını tamamlayıb. Məlumatı İranın BMT-dəki Daimi Nümayəndəliyi təsdiqləyib. Bildirilib ki, 1988-ci ildə baş verən İran-İraq müharibəsindən sonra İran bəzi ölkələrə döyüş təyyarələri almaq üçün müraciət göndərib və Rusiya bu müraciətə müsbət cavab verib. Qeyd olunub ki, BMT-nin 2007-ci ildən etibarən İrana qarşı tətbiq etdiyi silah embarqosu 2020-ci ilin oktyabrında qaldırıldıqdan sonra Rusiyadan Su-35 təyyarələrinin alınmasına cəhdlər edilib və nəhayət, döyüş təyyarələrinin satınalma prosedurları yekunlaşıb. Ölkə mətbuatında yer alan xəbərə görə, İran ilk mərhələdə Rusiyadan 24 döyüş təyyarəsi alacaq.
11-03-2023, 23:07
Qərbi Azərbaycan İcması Ermənistanın baş nazirinə məktub göndərib
Məlum olduğu kimi, Qərbi Azərbaycan İcması beynəlxalq hüquqa əsaslanmaqla təhlükəsiz və ləyaqətli şəkildə qayıdışa dair konsepsiya hazırlamışdır. İcma qayıdış prosesinə sülh yolu ilə nail olmaq əzmindədir və onun yerinə yetirilməsi üçün dialoq yolunu seçmişdir. Bu müstəvidə, İcma öz mövqeyini siyasi-diplomatik kanallarla beynəlxalq təşkilatlara və aidiyyəti dövlətlərə izah edir.
Şübhəsiz ki, qayıdış prosesi üzrə siyasi müstəvidə aparılmalı prosesin mühüm bir hissəsini Ermənistan hökuməti ilə dialoq təşkil etməlidir. Ermənistan tərəfinin bizə qarşı törətdiyi böyük müsibətləri tarixi yaddaşımızda saxlamaqla bərabər qəbul edirik ki, sülh və inkişafın təmin edilməsinin yolu dialoq və barışıqdan keçir.
Bu barədə Qərbi Azərbaycan İcmasının mətbuat xidmətindən məlumat verilib.
Bildirilib ki, bu məramla İcmamız Ermənistan Respublikasının baş naziri Nikol Paşinyana məktub göndərərək, onu qayıdış məsələsi üzrə dialoqa başlamağa çağırıb. İcma məktubunda Ümumdünya İnsan Hüquqları Bəyannaməsində, Mülki və Siyasi Hüquqlar üzrə Beynəlxalq Paktda və digər mühüm beynəlxalq aktlarda təsbit olunmuş geriyə qayıtmaq hüququna əsaslanmaqla, Ermənistan hökumətini Ermənistan ərazisindən qovulmuş azərbaycanlıların öz evlərinə təhlükəsiz və ləyaqətli şəkildə qayıtmalarına şərait yaratmağa çağırır. Məktubda, həmçinin azərbaycanlıların öz yurdlarına qayıtmalarından sonra onların fərdi və kollektiv hüquqlarının təmin edilməli olduğu vurğulanır.
Məktubda azərbaycanlıların öz evlərinə sülh yolu ilə geri qayıtmaq tələblərinin Ermənistanın ərazi bütövlüyü və ya suverenliyinə xələl gətirə biləcək şəkildə qələmə verilməsinin yolverilməz olduğu bildirilir.
İcma məktubunda qarşılıqlı maraq kəsb edən məsələlərə dair Ermənistan hökuməti ilə dialoqa hər zaman hazır olduğunu qeyd etməklə bərabər, vurğulayır ki, azərbaycanlıların qayıdış prosesi və qayıdışdan sonrakı mərhələdə fərdi və kollektiv hüquqlarının təmin edilməsi müvafiq beynəlxalq mexanizm çərçivəsində baş verməlidir.
Ədalət və barışıq naminə biz insan haqları və reinteqrasiyaya əsaslanan sülhpərvər yanaşma seçdik və dialoq çağırışı ilə birbaşa Ermənistan hökumətinə müraciət etdik. İndi Ermənistan hökuməti buna qarşılıq verərək, bizimlə xoş niyyətlə dialoqa başlamalı və azərbaycanlıları öz evlərindən didərgin salaraq onları onilliklər ərzində düçar etdiyi ədalətsizliyə son qoymalıdır.
İcma qovulmuş azərbaycanlıların qayıdış hüququnun təmin edilməsi istiqamətində beynəlxalq hüquq əsasında sülhpərvər səylərini əzmlə davam etdirəcək.
11-03-2023, 17:46
Kahramanmaraş şəhərində Azərbaycan məhəlləsi yaradılacaq
Türkiyənin Kahramanmaraş şəhərində 200 konteynerlik Azərbaycan məhəlləsi yaradılacaq. Bu barədə Azərbaycan Sahibkarlar Federasiyasının Türkiyə təmsilçisi Asif Qurban deyib. Onun sözlərinə görə, layihə Azərbaycan vətəndaş cəmiyyətinin dəstəyi ilə reallaşacaq. Qeyd edək ki, fevralın 6-da ocağı Türkiyənin Kahramanmaraş şəhərinin Pazarcık rayonunda olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ baş verib. Təbii fəlakət Türkiyə və Suriyada böyük dağıntıya və on minlərlə insan itkisinə səbəb olub.
11-03-2023, 17:44
İranın ölkəmizdəki səfiri XİN-ə çağırıldı
İşğaldan azad edilmiş Azərbaycan ərazilərinin yaxınlığında yarım saatdan çox müddət ərzində hərbi təyyarənin uçuşu Azərbaycana qarşı təxribat və qeyri-dost davranışdır. Bu barədə Azərbaycan Xarici İşlər Nazirliyi və Müdafiə Nazirliyinin yaydığı birgə bəyanatda qeyd olunub. "Xatırlatmaq istərdik ki, İran tərəfi ötən il də Araz çayı boyunca Azərbaycan sərhədləri yaxınlığında genişmiqyaslı hərbi təlimlər keçirmişdi. İran tərəfini bu cür təhrikçi addımına görə şiddətlə qınayır, müvafiq izahat verməyə və gələcəkdə belə təxribatçı addımlardan çəkinməyə çağırırıq. Martın 11-də İran İslam Respublikasının Azərbaycan Respublikasındakı səfiri Seyid Abbas Musəvi Azərbaycan Respublikası Xarici İşlər Nazirliyinə çağırılıb və ona müvafiq etiraz notası təqdim olunub”, - rəsmi məlumatda deyilir.
11-03-2023, 17:41
İran Zəngilan istiqamətində təxribat törətdi
Azərbaycan Xarici İşlər Nazirliyi və Müdafiə Nazirliyi birgə bəyanat yayıb. Bəyanatda bildirilib ki, 11 mart 2023-cü il tarixində İran İslam Respublikasına məxsus hərbi təyyarə saat 09:44-dən 10:26-dək fasiləsiz olaraq Azərbaycan-İran dövlət sərhədi boyunca, Zəngilan rayonu istiqamətindən Biləsuvar rayonu istiqamətinə və geriyə doğru uçuş həyata keçirib. Təyyarə iki ölkə arasında dövlət sərhədindən 3-5 km məsafədə, bəzi hallarda isə dövlət sərhədinin tam üstü ilə uçub. "Hərbi təyyarələrin dövlət sərhədinə yaxınlaşması ilə bağlı qonşu dövləti əvvəlcədən xəbərdarlıq etməyə dair beynəlxalq aləmdə qəbul olunmuş təcrübəyə zidd olaraq, İran İslam Respublikasının hərbi təyyarəsinin iki ölkə arasında dövlət sərhədinə bu qədər yaxınlaşması və sərhəd xətti üzərindən uçması mülki aviasiyanın təhlükəsizliyinə təhdid törədir və iki ölkə arasında münasibətləri daha da gərginləşdirməyə xidmət edir. İşğaldan azad edilmiş Azərbaycan ərazilərinin yaxınlığında yarım saatdan çox müddət ərzində hərbi təyyarənin uçuşu Azərbaycana qarşı təxribat və qeyri-dost davranışdır. Xatırlatmaq istərdik ki, İran tərəfi ötən il də Araz çayı boyunca Azərbaycan sərhədləri yaxınlığında genişmiqyaslı hərbi təlimlər keçirmişdi. İran tərəfini bu cür təhrikçi addımına görə şiddətlə qınayır, müvafiq izahat verməyə və gələcəkdə belə təxribatçı addımlardan çəkinməyə çağırırıq. Martın 11-də İran İslam Respublikasının Azərbaycan Respublikasındakı səfiri Seyid Abbas Musəvi Azərbaycan Respublikası Xarici İşlər Nazirliyinə çağırılıb və ona müvafiq etiraz notası təqdim olunub", - deyə birgə məlumatda qeyd olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!