30-03-2023, 23:41
Rusiya və Belarus idmançılarının Avropa Oyunlarına girişi qadağan edildi
Rusiya və Belarus idmançıları Polşanın Krakov şəhərində keçiriləcək Avropa Oyunlarına buraxılmayacaq. Bu barədə BBC oyunun təşkilatçılarına istinadən məlumat yayıb. Avropa Oyunlarının təşkilat komitəsinin sədri Marçin Novak deyib ki, Rusiya Federasiyasını və Belarusu təmsil edən idmançılar yarışda olmayacaq. "Diplomatik prosedurlara baxmayaraq, biz buna icazə verməyəcəyik", - açıqlamada bildirilir. Avropa Oyunları iyunun 21-dən iyulun 2-dək keçiriləcək, yarışlarda 7000-ə yaxın idmançı iştirak edəcək.
30-03-2023, 23:32
ABŞ vətəndaşlarını Rusiyanı tərk etməyə çağırdı
Dövlət Departamenti ABŞ vətəndaşlarını Rusiyanı tərk etməyə çağırıb. Bu barədə Departamentin açıqlamasında qeyd olunub. Buna səbəb ABŞ vətəndaşı olan jurnalistin Rusiyada saxlanılmasıdır. “Rusiyada olan və ya bu ölkəyə gedən ABŞ vətəndaşları dərhal ölkəni tərk etməlidirlər”, - Dövlət Departamentinin bəyanatında deyilir. Qeyd edək ki, bu gün "Wall Street Journal" qəzetinin jurnalisti Evan Qerşkoviçi Rusiyada casusluq ittihamı ilə həbs olunub.
30-03-2023, 23:30
Moldovada fövqəladə vəziyyət rejimi uzadıldı
Moldovada fövqəladə vəziyyət rejimi 60 gün uzadılıb. Müvafiq qərar ölkə parlamenti tərəfindən qəbul edilib. Bildirilir ki, parlament hökumətin fövqəladə vəziyyətin 60 gün müddətinə uzadılması ilə bağlı təklifini qəbul edib. Qərarın qəbul edilməsinin səbəbi kimi Ukraynadakı müharibə, qaz və elektrik enerjisi çatışmazlığı ilə bağlı enerji böhranı göstərilir.
30-03-2023, 23:27
Putin hərbi xidmətə çağırış haqqında sərəncam imzalayıb
Rusiya Prezidenti Vladimir Putin hərbi xidmətə çağırış haqqında sərəncam imzalayıb. Bu barədə Kremlin mətbuat xidməti məlumat yayıb. Sərəncamla aprelin 1-dən iyulun 15-dək 147 min nəfər hərbi xidmətə çağırılacaq. Qeyd edək ki, Rusiyada hərbi xidmət yaşı 18-27-dir.
30-03-2023, 23:23
XİN başçısı Fələstinin Baş naziri ilə görüşüb
Azərbaycanın xarici işlər naziri Ceyhun Bayramov Fələstin Dövlətinin Baş naziri Məhəmməd Ştayte ilə görüşüb. Bu barədə Ceyhun Bayramov tvitter hesabında paylaşım edib. Görüşdə ikitərəfli münasibətlər, müxtəlif platformalarda çoxtərəfli əməkdaşlıq, regional və beynəlxalq məsələlər ətrafında əsaslı müzakirələr aparılıb.
30-03-2023, 23:21
İran Ermənistana yeni səfir təyin edir
İran Ermənistana yeni səfir təyin edəcək. Bu barədə İranın "Isna" agentliyi məlumat yayıb. Bildirilib ki, ölkənin Suriyadakı keçmiş səfiri Mehdi Subhani Ermənistana göndəriləcək. Ermənistandakı hazırkı səfir Abbas Bədəxşan Zohurinin hansı ölkəyə göndəriləcəyi açıqlanmayıb.
30-03-2023, 23:18
Ermənistanın bu addımı Rusiyada etiraz doğurub - Zaxarova
"Bu mövzu ən yüksək səviyyədə təmaslar zamanı müzakirə olunmalı mövzudur". Bunu Rusiya Xarici İşlər Nazirliyinin (XİN) sözçüsü Mariya Zaxarova Ermənistan Konstitusiya Məhkəməsinin Beynəlxalq Cinayət Məhkəməsinin (BCM) Roma Statutu ilə bağlı qərarını şərh edərkən deyib. Zaxarova danışıqların təfərrüatlarını açıqlamayıb və brifinq zamanı bildirib ki, Moskva bu məsələnin müttəfiqliyə uyğun və qarşılıqlı olaraq məqbul variantda həllinə ümid edir. Qeyd edək ki, Ermənistan Konstitusiya Məhkəməsi ötən həftə Beynəlxalq Cinayət Məhkəməsi (BCM) haqqında Roma Statutunda təsbit olunmuş öhdəlikləri konstitusiyaya uyğun hesab edib. Ermənistanın bu addımı Rusiyada etiraz doğurub. Belə ki, Roma Statutuna əsasən Rusiya Prezidenti Vladimir Putin Ermənistana səfər edərsə, bu ölkədə həbs olunmalıdır. Əks halda Ermənistanın özünü ağır cəza gözləyəcək.
30-03-2023, 23:14
Çin yerdəki dəyişiklikləri izləmək üçün fəzaya peyklər buraxıb
Çin yer qabığındakı dəyişiklikləri izləmək üçün istifadə olunan InSAR peykini fəzaya buraxıb. 4 belə peykin buraxılması "Long March" raketi ilə Saanşi əyalətindəki mərkəzdən həyata keçirilib. Sözügedən peyklər radar dalğaları ilə yer qabığının hərəkətlərini yüksək dəqiqliklə təsbit edir. Qurğu zəlzələlər, vulkan püskürmələri, buzlaqların əriməsi, sürüşmə və çökmə nəticəsində yaranan deformasiyaları öyrənmək üçün istifadə olunur.
30-03-2023, 23:08
Deputatın partiyası terror aktıyla bağlı bəyanat yaydı
Böyük Quruluş Partiyası (BQP) partiya başqanı, millət vəkili Fazil Mustafaya qarşı həyata keçirilən terror aktı ilə bağlı bəyanat yayıb. Bəyanatda deyilir: “Böyük Quruluş Partiyasının üzvləri mart ayının 29-da BQP başqanı, Azərbaycan Respublikası Milli Məclisinin deputatı Fazil Mustafaya qarşı həyata keçirilən acımasız, alçaq, vəhşi terror aktı ilə bağlı xəbəri böyük sarsıntı və dərin hiddət hissi ilə qarşılayıb. Bu qanlı cinayəti törədən şəxsin və ya şəxslərin, arxasında duran mərkəz və ya qrupların, sifarişçilərin və icraçıların hüquq-mühafizə orqanları tərəfindən ən qısa zamanda aşkara çıxarılaraq ədalət məhkəməsinə təhvil veriləcəyinə və layiq olduqları ən ağır cəzaya məhkum ediləcəyinə ümid edirik. BQP hesab edir ki, bu sui-qəsdin siyasi səbəblərlə icra edilməsi şübhə doğurmur. Terror hadisəsində məhz Fazil bəyin - Azərbaycanın istiqlalı uğrunda mübarizənin təməlindən ona öncüllük edənlərdən birinin, istedadlı alimin, fəal ictimi-siyasi xadimin, cəmiyyətin problemlərinə, onun eybəcərliklərinə dözümsüz yanaşan istedadlı yazarın, görkəmli siyasətçinin, parlamentin ən fəal deputatının, Azərbaycanın dövlətçiliyinə, müstəqilliyinə sədaqəti ilə seçilən Vətəndaşın hədəf seçilməsi təsadüfi deyil. Fazil bəyə qarşı törədilən terror hadisəsi, əslində milli müstəqilliyimizə, azad fikirliliyə, çağdaşlığa, daxili birliyimizə yönəlmiş ağır cinayət hadisəsidir. Sivil müzakirələrdən qorxan nadanların mədəniyyətə, ağıla, biliyə, tərəqqiyə, elmə, təhsilə qarşı yönələn vandallıq aktıdır. Terror hadisəsəni törədənlərin başlıca məqsədi Azərbaycanın cəhalət girdabında qalmasını istəyənlərə, təhrif olunmuş dini inanc əsarətinə salanlara, məzhəbçi dini ekpansiyaçılara ölkəni təslim edənlərə, milli iradəni yox sayanlara qarşı çıxan mübarizlərin, ölkə maraqlarını bütün digər maraqların fövqündə tutan aydınların qarşısını kəsmək və bu yolla da cəmiyyətdə qorxu, panika və xof hissi yaratmaqdan ibarətdir. Böyük Quruluş Partiyası fürsətdən istifadə edərək ölkənin dörd bir yanından zəng edərək Fazil bəyə qarşı dörədilən bu alçaq hücuma görə hiddətlərini ifadə edən, onun tezliklə sağlığına qovuşması üçün öz şəfa diləklərini və dualarını əsirgəməyən və haqqın yanında olduqlarını bəyan edən xalqımızın hər bir duyarlı nümayəndəsinə öz təşəkkürünü çatdırır. Bütün bunlar, həm də gerçəkləşən terror hadisəsinin ictimai rəydə nə qədər böyük hiddət yaratdığını, kütləvi etirazlara səbəb olduğunu və bununla da onu törədənlərin öz hədəflərinə çatmadığını göstəricisidir. BQP ölkədə fəaliyyət göstərən bütün siyasi partiyaları, ictimai-siyasi qurumları, qeyri-hökumət təşkilatlarını, dünya azərbaycanlılarını, qardaş Türkiyə Cümhuriyyəti başda olmaqla İslam ölkələrini və fikir, söz azadlığına dəyər verən bütün sivil dünyanı terroru mübarizə üsulu kimi mənimsəyən, ona himayədarlıq edib, dəstək verən, bu alçaq mübarizə üsulunu öz çirkin niyyətləri üçün vasitə seçən cinayətkar siyasi rejimlərə və ekstremist qruplara qarşı birmənalı mövqedən çıxış etməyə çağırır. İndi Azərbaycan öz tarixinin ən məsuliyyətli, şərəfli, eyni zamanda mürəkkəb və həlledici dövrünü yaşayır. Bu dövr yalnız müstəqilliik əldə etdiyimiz ilk illərlə müqayisə edilə bilər. Hansı ki, həmin illərdə də Azərbaycan müxtəlif dövlətlərin və güclərin iqtisadi, siyasi və hərbi maraqlarının toqquşduğu geopolitik məkana çevrilməklə çoxsaylı terror hücumlarına və sui-qəsdlərə məruz qalmışdı. BQP olaraq ümid edirik ki, xalqımızın müdrikliyi, yaxın tarixi keçmişimizdən əldə etdiyi acı təcrübə imkan verəcək ki, terror rejimlərinin və cinayətkar qrupların qarşısına qoyduqları hədəflərə çatmasına heç vaxt keçid verilməyəcək, ictimai sabitlik və asayiş hər zaman qorunub saxlanılacaq və müstəqlliyimiz möhkəmləndirilərək, əbədi olaraq yaşadılacaq. Qaranlıq və cəhalət güclərinin alçaq hücumuna məruz qalan Fazil bəyin dünən xəstəxanadan verdiyi açıqlamada ifadə etdiyi kimi, bütün bu cəhdlər və törədilən cinayət əməlləri onu doğru bildiyi yoldan döndərə nilməyəcək: “Həmişə olduğu kimi bundan sonra da dövlətçilik ideyalarına sadiq qalacaq və heç nə onu bu yoldan çəkindirə bilməyəcək. Heç bir terror aktı, sui-qəsd Azərbaycan xalqını və dövlətini öz hədəflərindən yayındıra bilməyəcək”. Qəzan mübarək olsun, Alovlu Vətənpərvər! Tezliklə sağlamlığına qovuşub, ailəni, əzizlərini, dostları sevincə, düşmənləri qüssə və kədərə qərq etməni və qaldığın yerdən şərəfli missiyana davam etməni arzulayırıq. Allah şəfanı versin, böyük Vətəndaş! Amansız terrordan qoruyan Allah, İnşallah, hər zaman dayağın olacaq”.
30-03-2023, 17:03
İlham Əliyev Dövlət Xidmətinin binasının açılışında iştirak edib
İqtisadiyyat Nazirliyi yanında Əmlak Məsələləri Dövlət Xidmətinin paytaxt Bakıda yeni inzibati binası istifadəyə verilib. Azərbaycan Respublikasının Prezidenti İlham Əliyev yeni binanın açılışında iştirak edib. Qeyd edək ki, son illərdə paytaxtda modern üslubda tikilən hündürmərtəbəli binalar sırasına daha biri əlavə olunub. Ulu Öndər Heydər Əliyevin adını daşıyan prospektdə ucaldılan yeni bina da müasir memarlığı ilə diqqəti cəlb edir. İqtisadiyyat naziri Mikayıl Cabbarov bina barədə dövlətimizin başçısına məlumat verdi. Bildirildi ki, bina modern və postmodern üslubda layihələndirilib və mürəkkəb konstruktiv quruluşa malikdir. Hündürlüyü 125 metr olan bina 33 mərtəbədən ibarətdir. Yükdaşıyan konstruksiyaları 9 ballıq zəlzələyə davamlı olan binanın hər mərtəbəsi digər mərtəbəyə nisbətdə 2,65 dərəcə dönür və nəticədə fasad müstəvisi 90 dərəcəlik burulma effekti yaradır. Binanın daha bir diqqətçəkən cəhəti isə yuxarıdan baxanda kürsü mərtəbəsinin Azərbaycanın xəritəsi formasında inşa edilməsi və şərq tərəfdən “Xəzər dənizi” dekorativ hovuzu ilə əhatə olunmasıdır. İşçi mərtəbələri 254 otaqdan ibarət olan binada 537 əməkdaşın fəaliyyəti üçün hər cür şərait yaradılıb. Binada müxtəlif tədbirlərin keçirilməsi üçün hər cür şəraitə malik və müasir multimedia vasitələri ilə təchiz olunmuş konfrans və iclas zalları, həmçinin müxtəlif təyinatlı iclas otaqları, yeməkxanalar var. Binadaxili mikroiqlimin təmin olunması, səmərəli enerji sərfiyyatının tənzimlənməsi, işıqlandırma, yanğınsöndürmə və təhlükəsizlik sistemlərinin idarə edilməsi, fövqəladə hallar zamanı mühəndis-texniki sistemlərin tənzimlənməsi üçün İdarəetmə Mərkəzi qurulub. Göründüyü kimi, yeni binada tikintidə müasir çağırışların paytaxtımızın infrastrukturuna inteqrasiyası ilə yanaşı, işçi heyətin daha səmərəli çalışması üçün hər cür şərait yaradılıb. Qeyd edək ki, Prezident İlham Əliyevin rəhbərliyi ilə həyata keçirilən məqsədyönlü islahatlar çərçivəsində əmlak məsələləri sahəsində də bir sıra irəliləyişlərə nail olunub. Belə ki, dövlət əmlakının idarə edilməsi, özəlləşdirilməsi, daşınmaz əmlakın qeydiyyatı və kadastrı, torpaq idarəçiliyi və digər sahələrdə mühüm işlər görülüb. Vətəndaşlara və sahibkarlara göstərilən dövlət xidmətlərində şəffaflığın artırılmasına, elektron xidmətlərin genişləndirilməsinə, vətəndaş məmnunluğunun yüksəldilməsinə xüsusi diqqət yetirilir. Bunun nəticəsidir ki, 2022-ci ildə vətəndaşlardan, sahibkarlardan, bələdiyyələrdən, dövlət qurumlarından Xidmətə 1 milyona yaxın elektron müraciət daxil olub. Xüsusi vurğulayaq ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nda əks etdirilən tədbirlər, o cümlədən həmin ərazilərdə yerquruluşu, torpaqların elektron kadastr uçotu, torpaq tədqiqatları, torpaqların idarə edilməsi və işğal nəticəsində dəymiş ziyanın müəyyənləşdirilməsi ilə bağlı işlər davam etdirilir. Məsələn, işğaldan azad edilmiş ərazilərdə ötən il 390 min hektar sahədə yerquruluşu, 283 min hektarda çöl torpaq tədqiqatı, 309 min hektarda geobotaniki tədqiqat işləri görülüb. Həmçinin azad edilən ərazilərdə indiyədək 14,1 min daşınmaz əmlakın ilkin inventarlaşdırılması işləri tamamlanıb. Bu sahədə uğurlardan biri də işğaldan azad edilmiş ərazilərdəki daşınmaz əmlak və infrastruktur obyektləri barədə toplanmış məlumatların etibarlı surətdə qorunmasının və səmərəli istifadəsinin təmin edilməsi məqsədilə Qarabağ Rəqəmsal Geo-İnformasiya Sisteminin yaradılmasıdır. Bu günədək rəqəmsallaşdırılması mümkün olan 164 minə yaxın tikili və qurğudan təqribən 145 mini təsbit olunub və həmin sistemə daxil edilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!