1-09-2023, 22:14
Bayden təbii fəlakətlərin vurduğu zərərin ödənilməsiylə bağlı Konqresə müraciət etdi
ABŞ Prezidenti Co Bayden ölkədə bu yaxınlarda baş vermiş təbii fəlakətlərin vurduğu zərərin ödənilməsinə daha 4 milyard dolların ayrılması xahişi ilə Konqresə müraciət edib.
Bayden dəfələrlə bildirib ki, son həftələr meşə yanğınları və daşqınlardan zərər çəkənlər bərpa işləri üçün lazım olan qədər federal yardım alacaqlar.
Müraciətdə qeyd olunan məbləğ administrasiyanın daha öncədən bu ay bir sıra dövlət proqramlarının maliyyələşdirilməsi çərçivəsində tələb etdiyi 12 milyard dollara əlavədir.
ABŞ ölkənin müxtəlif yerlərində, Havayda meşə yanğınları, “İdalia” qasırğası və Vermont ştatında daşqınlar da daxil olmaqla, qeydə alınan təbii fəlakətlərlə üzləşib.
Co Bayden həmçinin vəd edib ki, “İdalia” qasırğasının güclü ziyan vurduğu Florida, Corciya, Şimali Karolina və Cənubi Karolina ştatlarına yardım ediləcək.
1-09-2023, 21:31
Quranın yandırılmasıyla bağlı aksiyalar polisə 23 min dollara başa gəlib
İsveçdə Quranın yandırılması ilə bağlı aksiyalar polisə təxminən 23 min dollara başa gəlib.
Bu barədə "Sveriges Radio" kanalı Stokholm polisinə istinadən məlumat yayıb.
Qeyd olunur ki, yanvarın 1-dən avqustun 29-dək polis 13 aksiyaya icazə verib.
Qeyd edək ki, iyunun 28-də Stokholm polisi şəhərdəki məscidin yaxınlığında Quranım yandırılması ilə müşayiət olunan nümayişə icazə verib.
İsveçin baş naziri Ulf Kristerson müvafiq qərarın qanuni, lakin əhəmiyyətsiz olduğunu bildirib.
1-09-2023, 20:43
Qarabağda DOST Mərkəzi vətəndaşlara xidmət göstərəcək
Bərdə şəhərində yerləşən Qarabağ Regional DOST Mərkəzində vətəndaşlara xidmət göstərilməsinə başlanılıb.
Bu barədə Əmək və Əhalinin Sosial Müdafiəsi Nazirliyinindən (ƏƏSMN) məlumat verilib.
Bildirilib ki, vətəndaşlar həftənin 5 günü saat 9:00-dan 18:00-dək mərkəzin xidmətlərindən yararlana bilərlər.
Qarabağ Regional DOST Mərkəzində məşğulluq, əmək, əlillik və sosial müdafiə sahələrində “bir pəncərə” prinsipi ilə 15 istiqamət üzrə 159 xidmət göstərilir. Bu gün ərzində Qarabağ Regional DOST Mərkəzində 208 nəfər vətəndaşa xidmət göstərilib.
Prezident İlham Əliyevin iştirakı ilə bu günlərdə açılışı olan Mərkəzin dördmərtəbəli binası ən yüksək tələblərə cavab verir. Burada 123 işçi çalışır, “Könüllü DOST” proqramı üzrə 50 könüllü fəaliyyət göstərir. Mərkəzdə gün ərzində orta hesabla 650-700 vətəndaşın qəbulu nəzərdə tutulur.
Qarabağ Regional DOST Mərkəzinin əhatə dairəsinə 9 inzibati rayon daxildir. Burada ümumilikdə 900 mindən çox əhaliyə xidmət göstəriləcək. Onlardan 170 mini bilavasitə sosial müdafiəyə cəlb olunan şəxslərdir.
1-09-2023, 19:54
Prezident Qafqaz Müsəlmanları İdarəsinə 1 milyon manat ayırdı
Azərbaycan Prezidentinin ehtiyat fondundan
Qafqaz Müsəlmanları İdarəsinə 1 milyon manat ayrılıb.
Bu barədə Prezident İlham Əliyev Sərəncam imzalayıb.
Vəsait Azərbaycan Respublikasında dini dəyərlərin qorunması və daha da inkişaf etdirilməsi üçün nəzərdə tutulmuş Prezidentinin ehtiyat fondundan ayrılıb.
1-09-2023, 19:33
AZAL Qapalı Səhmdar Cəmiyyətinin prezidenti vəzifəsindən azad edildi
Cahangir Calal oğlu Əsgərov “Azərbaycan Hava Yolları” (AZAL) Qapalı Səhmdar Cəmiyyətinin prezidenti vəzifəsindən azad edilib.
Bununla bağlı Prezident İlham Əliyev sərəncam imzalayıb.
Sərəncamla “Azərbaycan Hava Yolları” Qapalı Səhmdar Cəmiyyətinin prezidenti təyin olunanadək həmin vəzifənin müvəqqəti icrası “Azərbaycan Hava Yolları” Qapalı Səhmdar Cəmiyyətinin birinci vitse-prezidenti Samir Musa oğlu Rzayevə həvalə edilib.
1-09-2023, 19:06
Erməni tərəfinin məqsədi mümkün qədər vaxt udmaqdır - Prezidentin nümayəndəsi
“Ermənistan rəhbərliyi danışıqlar prosesini süni surətdə ləngidir. Vaxt udmaq və regionda formalaşmış mövcud status-kvonu möhkəmləndirmək məqsədilə əvvəllər götürdüyü öhdəlikləri yerinə yetirməkdən qəsdən yayınır”.
Bu barədə bu gün Fransanın "L'Opinion" nəşrində Laçın yolu ətrafındakı vəziyyətlə bağlı dərc olunan məqalədə deyilir.
Məqalənin müəllifi Jan-Dominik Merşe Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyovdan sitat gətirərək yazır: “Erməni tərəfinin məqsədi mümkün qədər vaxt udmaq və mövcud status-kvonu möhkəmləndirməkdir”.
J.Merşe yazır ki, erməni separatçılar Azərbaycan hakimiyyətinin göndərdiyi un karvanını Qarabağda ermənilərin yaşadığı yaşayış məntəqələrinə buraxmamaq üçün bu həftə Ağdam-Xankəndi yolunu bağlayıblar. Onlar bu davranışı Azərbaycanın bu ərazilər üzərində suverenliyini tanımaq istəməməsi ilə izah edirlər.
Bakı isə öz növbəsində məsələnin siyasiləşdirilməsini yolverilməz hesab edir. Əhalinin ərzaq və digər zəruri mallarla təmin olunmasının müxtəlif yolları ilə bağlı hər hansı ayrı-seçkiliyi rədd edir.
Müəllif yazır ki, Azərbaycan da Ağdamdan keçən yolun açılmasından sonra Laçın yolunun açılmasını təmin etməyə hazır olduğunu bəyan edib.
“Azərbaycan və Ermənistan arasında sülh sazişi üzrə danışıqlarda konkret irəliləyiş olmadığı halda hərbi qarşıdurma riski artır”, - Elçin Əmirbəyov qeyd edib.
1-09-2023, 18:21
Şoyqu türkiyəli həmkarıyla taxıl sazişini müzakirə etdi
Rusiyanın müdafiə naziri Sergey Şoyqu Türkiyə xarici işlər naziri Hakan Fidan ilə görüşüb.
Bu barədə Rusiya Müdafiə Nazirliyi məlumat yayıb.
Məlumata görə, Şoyqu Fidan ilə taxıl müqaviləsi və Suriyada birgə işi müzakirə edib.
Şoyqu bildirib ki, Rusiya Türkiyə ilə ikitərəfli strateji tərəfdaşlığı davam etdirmək niyyətindədir.
1-09-2023, 17:18
XİN Şarl Mişelin bəyanatıyla bağlı açıqlama verdi
Azərbaycan Avropa İttifaqı Şurasının Prezidenti Şarl Mişelin mətbuat katibinin bölgədəki vəziyyətlə bağlı 1 sentyabr 2023-cü il tarixli bəyanatı tərəfimizdən qeydə alınıb.
Bu barədə Xarici İşlər Nazirliyindən məlumat verilib.
Avropa İttifaqı tərəfindən bildirildiyi kimi, 15 iyul 2023-cü il tarixində Brüsseldə Azərbaycan Respublikasının Prezidenti İlham Əliyev, Avropa İttifaqı Şurasının Prezidenti Şarl Mişel və Ermənistanın baş naziri Nikol Paşinyan arasında keçirilmiş üçtərəfli görüşdəki müzakirələrin nəticəsi olaraq aparılmış danışıqlardan sonra, Azərbaycanın Qarabağ bölgəsinə yüklərin müxtəlif marşrutlarla çatdırılması, habelə Ağdam-Xankəndi yolunun açılmasına parallel olaraq Laçın yolundan istifadənin intensivləşməsi məsələləri razılaşdırılmışdı.
Buna baxmayaraq, Ermənistanın qondarma rejimi vasitəsilə qeyri-qanuni şərtlər və müxtəlif bəhanələr irəli sürməsi ilə əldə olunmuş razılıqdan boyun qaçırması sözügedən razılığın icrasına maneə törətdi.
Həmçinin, xatırlatmaq istərdik ki, cari ilin avqust ayının əvvəlində Azərbaycanın xüsusi nümayəndəsi ilə yerli erməni sakinlərinin nümayəndələri arasında görüşün təşkili ilə bağlı razılıq əldə edilməsinə baxmayaraq, son anda erməni tərəfi bu görüşdən imtina etdi.
Təəssüflər olsun ki, 15 iyul tarixindən bugünədək Ermənistan və onun qondarma rejimi, sözügedən üçtərəfli görüş çərçivəsində razılaşdırılmış bu gündəliyin icrasına və irəli aparılmasına mane olmaqda davam edərək, bu istiqamətdə Avropa İttifaqı və digər beynəlxalq tərəfdaşların səylərini heçə endirir.
Azərbaycan Ermənistana iki ölkə tərəfindən bir-birinin suverenliyinin, ərazi bütövlüyünün və sərhədlərinin toxunulmazlığının qarşılıqlı tanınması və hörmət edilməsi əsasında sülh təklif edib. Digər istiqamətdə isə, Azərbaycan Qarabağ bölgəsində yaşayan erməni əsilli sakinlərin Azərbaycan Konstitusiyasında nəzərdə tutulmuş hüquq və azadlıqlarını təmin etməklə bərabərhüquqlu vətəndaşlar kimi reinteqrasiyasında qərarlıdır.
Azərbaycan, bütün bu istiqamətlərə sadiqliyini nümayiş etdirməklə yanaşı, Ermənistan tərəfinin davam edən hərbi-siyasi təxribatları kontekstində, öz suverenliyini və ərazi bütövlüyünü BMT Nizamnaməsi və beynəlxalq hüququn digər universal sənədləri ilə təmin edilmiş bütün qanuni vasitələrlə müdafiə etmək hüququnu da özündə saxlayır.
1-09-2023, 16:52
Müdafiə naziri Uçuş Tədris İli Açılış Mərasimində iştirak etdi
Azərbaycanın müdafiə naziri general-polkovnik Zakir Həsənov türkiyəli həmkarı Yaşar Gülərlə birlikdə Eskişəhərdəki 1-ci Baş Reaktiv Baza Komandanlığında 2023-2024-cü Uçuş Tədris İli Açılış Mərasimində iştirak edib.
Bu barədə Türkiyə Milli Müdafiə Nazirliyi məlumat yayıb.
Açılış mərasimində çıxış edən Yaşar Gülər türk ordusunun terrorçulara qarşı uğurla əməliyyatlar keçirdiyini vurğulayıb:
“Ordu eynilə Kipr, Azərbaycan, Liviya, Kosovo, Bosniya və Herseqovina, Qətər, Somali və bir çox başqa ölkələrdəki qardaş, dost və müttəfiq ölkələrin haqlı işlərinə dəstək verir”.
1-09-2023, 16:26
Ermənistan ordusunun 4 hərbçisi zərərsizləşdirildi
Xəbər verdiyimiz kimi, Ermənistan silahlı qüvvələri Azərbaycan Ordusunun Kəlbəcər istiqamətində yerləşən mövqelərini müxtəlif çaplı atıcı silahlar, minaatanlar, artilleriya qurğuları və zərbə PUA-larından atəşə tutub.
Azərbaycan ordusunun qətiyyətli cavab tədbirləri nəticəsində Ermənistan ordusunun 4 hərbçisi zərərsizləşdirilib.
Məlumatı Ermənistan Müdafiə Nazirliyi də təsdiq edib. Qeyd olunur ki, cavab tədbirləri nətiəsində daha bir erməni hərbçi yaralanıb. Sosial şəbəkələrin erməni seqmentində ölü və yaralıların daha çox olduğu bildirilir.
Qeyd edək ki, bundan əvvəl iki erməni hərbçinin - Andranik Antonyan və Arsen Mkrtçyanın zərərsizləşdirilməsi barədə məlumat yayılmışdı. Ermənistanın təxribatı nəticəsində 3 hərbçimiz yaralanıb.
Azərbaycan Müdafiə Nazirliyi bildirib ki, yaranmış gərginliyə və onun fəsadlarına görə bütün məsuliyyət Ermənistanın hərbi-siyasi rəhbərliyinin üzərinə düşür.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!