17-10-2023, 22:49
Jurnalist intihar edən həyat yoldaşıyla bağlı yayılan xəbərlərə rəy bildirdi
Tanınmış jurnalist Türkan Məmmədli ötən gün intihar edən həyat yoldaşı Orxan Məmmədli ilə bağlı yayılan xəbərlərə münasibət bildirib.
O, bu barədə özünün instaqram hesabında paylaşım edib.
“Faciəmdən reytinq tutanlara haqqımı halal etmirəm. Orxanı sevib ailə qurmuşam, gözəl ailəm olsun deyə daima çabalamışam. İki gözəl oğlumuz var, rəsmən boşanmamışdıq. Onun vəfatı mənə çox ağır gəlir. İnsanlığınız olsun, qoyun dərdimi çəkim. Dünyam uçub, siz şər-böhtan, reytinq hayındasınız. Orxanın ruhunu incitməyin” - T.Məmmədli yazıb.
17-10-2023, 21:16
18 yaşım olanda Xaçaturyanın işgəncələrinə məruz qalmışam - Xocalı sakini
Hələ 18 yaşım olanda Vaqif Xaçaturyanın işgəncələrinə məruz qalmışam.
Bunu Xocalı rayonunun Meşəli kənd sakini Məmməd Kazımov deyib.
M.Kazımov fikirlərinə belə davam edib: “Xankəndidə sürücülük məktəbini bitirmişəm. Meşəlidən olan tanışlarımla imtahan verməyə getmişdik. Qəfildən yolumuzu 50-60 nəfər kəsdi, bizi Xankəndi şəhər polis şöbəsinə apardılar. Orada amansız işgəncələrə məruz qaldıq. Şöbədə olduğumuzun səhəri günü Vaqif Xaçaturyan da gəldi. Elə bildim ki, Meşəlidən olduğu üçün bizə kömək edə bilər. Polislərdən birindən bizim kim olduğumuzu soruşdu. Dedilər ki, Meşəlidəndirlər. Polis məni göstərib dedi ki, bu uşağı nə qədər döyürük xeyri yoxdur, elə Qarabağ bizimdir qışqırır. Bundan sonra Vaqif Xaçaturyan mənə işgəncə verməyə başladı. Axırda biçaqla ayaq damarımı kəsdi ki, qanaxmadan ölüm. Növbəti gün bizi rus mayor xilas elədi. Bizi Xankəndi şəhərinin Kərkicahan qəsəbəsinə qoyub qayıtdılar”.
1991-ci ilin dekabrında baş verən Meşəli hadisələrindən danışan həmsöhbətim deyib: “O zaman özünümüdafiə dəstəsində döyüşçü idim. Bilirdim ki, Xaçaturyan qarşı tərəfin dəstə rəhbəridir. Biz onların rabitə aparatlarına qoşulurduq, Xaçaturyanı səsindən tanıyırdıq. Onlar bundan əvvəl rayonun Cəmilli kəndinin sakinlərinə divan tutmuşdular. Bizi təhdid edirdi ki, Meşəlini Cəmillidən də betər edəcəyik. Azərbaycan dilində deyirdi ki, əlilləri, qocaları, qadınları kənddən çıxarın. Biz Vaqifi səsindən tanıyırdıq, həm də qarşı tərəfdən girov götürüb onlardan söz alırdıq. Etiraf edirdilər ki, qruplardan birinin rəhbəri Vaqif Xaçaturyandır. Ümumilikdə, Xocalı hadisələrində 46 nəfər yaxınımı itirmişəm. Danmağına baxmayaraq, Vaqif Xaçaturyan təkcə Meşəlidə deyil, digər ərazilərdə də insanlara işgəncə verib”.
17-10-2023, 20:32
Ermənistan və İranın XİN Başçıları telefon danışığı apardı
Ermənistan xarici işlər naziri Ararat Mirzoyan və İran xarici işlər naziri Hüseyn Əmir Abdullahian arasında telefon danışığı olub.
Bu barədə Ermənistan XİN-in mətbuat xidməti məlumat yayıb.
İran XİN rəhbərinin təşəbbüsü ilə baş tutan telefon danışığında iki ölkə liderləri səviyyəsində müzakirə olunan istiqamətlər və formatlar üzrə əməkdaşlıq, eləcə də Ermənistan-İran ikitərəfli gündəliyinin təşviqi müzakirə olunub.
Telefon danışığı zamanı tərəflər Cənubi Qafqaz və Yaxın Şərqdəki mövcud vəziyyətlə bağlı fikir mübadiləsi də aparıblar.
17-10-2023, 20:07
Gürcüstan hərbi aviasiyasını modernləşdirib - Müdafiə naziri
Gürcüstan hərbi aviasiyasının əhəmiyyətli hissəsi bərpa olunub və modernləşdirilib.
Bu barədə Gürcüstanın müdafiə naziri Cuanşer Burçuladze parlamentdə çıxışı zamanı bildirib.
Nazir deyib ki, hərbi təyyarə və helikopterlərin əhəmiyyətli hissəsi artıq yenilənib. Onun sözlərinə görə, ölkədə hərbi aviasiyanın bərpası və modernləşdirilməsi baxımından mühüm addımlar atılıb. Bu proses hazırda fəal şəkildə davam edir və gələcəkdə də davam etdiriləcək.
Bu gün Gürcüstanın hərbi aviasiyasında SU-25, UH-1H helikopterləri, həmçinin Mİ-8, MTV və Mİ-24 tipli helikopterlər saz vəziyyətdədir.
Həmçinin L39 və AN-2 döyüş təlimçilərinin hazırlanmasına, təlim təyyarələrinin bərpasına başlanılıb və yaxın vaxtlarda işlər başa çatdırılacaq.
17-10-2023, 19:37
Ukrayna ilk dəfə Rusiyaya qarşı bu raketlərdən istifadə etdi
Oktyabrın 17-də Ukrayna ilk dəfə Rusiya ordusuna qarşı ABŞ istehsalı ATACMS raketlərindən istifadə edib.
Bu barədə "The Wall Street Journal" (WSJ) qəzeti məlumat yayıb.
Məsələ ilə yaxından tanış olan məmurların nəşrə verdiyi məlumata görə, bir neçə gün əvvəl gizli şəkildə Ukraynaya təxminən 160 km mənzilli ATACMS raketləri göndərilib. Bildirilir ki, ötən gecə Ukrayna silahlı qüvvələri bu raketlərlə Berdyansk aerodromunda və Luqanskda rus hərbçilərinə zərbə endirib.
“Biz Rusiya ilə birlikdəyik” hərəkatının sədri Vladimir Roqov "Telegram"da bildirib ki, Zaporojye vilayətinin Berdyansk şəhərində Amerika ATACMS operativ-taktiki raketinin M74 kasetli sursatları aşkar edilib. Onun sözlərinə görə, Berdyanskı vurmaq üçün GLSDB raketlərindən də istifadə edilib.
Rusiya Federasiya Şurasının Zaporojye vilayəti üzrə üzvü Dmitri Roqozin də bölgədə tapılan ATACMS raketinin elementləri barədə məlumat verib və onların fotoşəkillərini dərc edib. Onun sözlərinə görə, ötən gecə Ukrayna hərbçiləri bu raketlərlə Berdyansk ətrafına hücum ediblər.
Bu gün səhər saatlarında Ukrayna prezidenti Volodimir Zelenski Berdyanska zərbə endirərkən yeni növ silahdan istifadə edilməsinə eyham vurub və Rusiya qoşunlarının “logistikasını və bazalarını məhv edən” hər kəsə təşəkkür edib. “Bəzi tərəfdaşlarımıza təşəkkür edirəm. Razılaşdığımız kimi effektiv silahdır”, - o qeyd edib.
17-10-2023, 18:42
Elmira Axundova yeni vəzifəyə təyin olundu
Elmira Axundova Bakı Beynəlxalq Multikulturalizm Mərkəzinin Himayəçilik Şurasının üzvü təyin olunub.
Bu barədə Prezident İlham Əliyev sərəncam imzalayıb.
Qeyd edək ki, Elmira Axundova bundan əvvəl Azərbaycanın Ukraynadakı səfiri olub.
17-10-2023, 17:13
Prezident: “İndi ordu xərclərinə biz yenə də vəsait ayırmalıyıq”
"İndi ordu xərclərinə biz yenə də vəsait ayırmalıyıq. Çünki yumruq daim yerində olmalıdır".
Bu fikirləri Prezident İlham Əliyev oktyabrın 17-də “Füzuli Şəhəri Günü”ndə Füzuli şəhərinə köçmüş sakinlər və rayon ictimaiyyətinin nümayəndələri ilə görüşündə səsləndirib.
"Bu gün Füzulidə, Qarabağın digər bölgələrində və Şərqi Zəngəzurda yerləşən şəhərlərdə gedən işlər, doğrudan da genişmiqyaslı işlərdir. Bunun mənbəyi də Azərbaycan mənbəyidir, yəni, biz heç kimdən bir manat kömək istəməmişik. Sağ olsun özbək qardaşlarımız gözəl məktəb tikdirdilər və qazax qardaşlarımız da indi Yaradıcılıq Mərkəzini inşa edirlər. Ondan başqa bizə bir dənə də mismar da hədiyyə edilməyib.
Biz bu illər ərzində həm iqtisadiyyatı qurduq, həm ehtiyatlar yığdıq. Nə üçün? Bilirdik ki, bu gün gələcək, o vəsait bizə lazım olacaq və biz haraya xərcləyirdik - orduya. Birinci yerdə ordu xərcləridir, ikinci təhsil xərcləridir. Həmişə bizim büdcəmizdə, bu iki əsas prioritet var idi. İndi ordu xərclərinə biz yenə də vəsait ayırmalıyıq. Çünki yumruq daim yerində olmalıdır. Ancaq, eyni zamanda, indi vəsaitin əsas hissəsi Qarabağın bərpasına gedir", - dövlət başçısı qeyd edib.
17-10-2023, 17:02
Azərbaycanla Çin arasında Anlaşma Memorandumu imzalandı
Azərbaycan Energetika Nazirliyi və Çinin Milli Enerji Administrasiyası arasında Anlaşma Memorandumu imzalanıb.
Memorandum “Bir kəmər, bir yol” Beynəlxalq Əməkdaşlıq Forumu çərçivəsində Çində səfərdə olan energetika naziri Pərviz Şahbazov Çinin Milli Enerji Administrasiyasının rəhbəri Zhang Jianhua ilə görüşündə imzalanıb.
Görüş zamanı elektrik enerjisi, neft-qaz, neft-kimya və bərpa olunan enerji sahələrində əməkdaşlığın inkişafı və enerji layihələrinə investisiyanın təşviqi məqsədilə “Azərbaycan Respublikasının Energetika Nazirliyi ilə Çin Xalq Respublikasının Milli Enerji Administrasiyası arasında Anlaşma Memorandumu” imzalanıb.
Bu sənəd hər iki ölkənin energetika sektorunda ikitərəfli əlaqələrin genişləndirilməsini, yeni texnologiyaların tətbiqi, enerji infrastrukturunun yenilənməsi üzrə əməkdaşlığı, qarşılıqlı investisiya və biznes fəaliyyətlərinin təşviqini, bərpa olunan enerji mənbələri sahəsində təcrübə mübadiləsini, həmçinin birgə konfrans, forum və təlimlərin keçirilməsini nəzərdə tutur.
Həmçinin, görüşdə “Bir kəmər, bir yol” layihəsi çərçivəsində və ikitərəfli formatda iki ölkə arasında münasibətlərin inkişafına dair müzakirələr aparılıb. “Bir kəmər, bir yol”u ilk gündən dəstəkləyən Azərbaycanın müxtəlif layihələrlə bu qlobal təşəbbüsün reallaşmasına töhfələrindən danışılıb.
“Dövlət başçılarının dostluğu və strateji baxışlarının münasibətlərimizin hərtərəfli inkişafını təşviq etdiyi, əməkdaşlığın genişləndirilməsi üçün böyük imkanların olduğu bildirilib. Çinə Azərbaycan Dövlət Neft Şirkəti (SOCAR) tərəfindən Azərbaycan və digər mənşəli xam neft, neft məhsulları, neft-kimya məhsullarının, eləcə də mayeləşdirilmiş qazın (LNG) təchizatı, ölkəmizin apstrim, daunstrim layihələrində və elekroenergetika sektorunda Çin şirkətlərinin iştirakı uğurlu enerji əməkdaşlığının nümunələri kimi qeyd edilib.
Enerji sahəsində Çin şirkətləri ilə uzunillik əlaqələrin “yaşıl enerji” layihələri və “yaşıl texnologiya”lar üzrə əməkdaşlıqla yeni inkişaf mərhələsinə daxil olduğu bildirilib. Bu xüsusda, 230 MVt gücündə “Qaradağ” Günəş Elektrik Stansiyasının inşasında “Dongfang” şirkətinin iştirakından, “China Gezhouba Group Overseas Investment” şirkəti ilə Azərbaycanda 2 QVt gücündə bərpa olunan enerji layihələri üzrə əməkdaşlıqdan bəhs edilib. “SOCAR Trading” şirkətinin Çin bazarında fəaliyyətini genişləndirmək perspektivləri ilə bağlı müzakirələr aparılıb.
17-10-2023, 16:52
Bizim başqa ölkələrin torpağında gözümüz yoxdur - İlham Əliyev
Biz haqq yolundayıq. Bizim başqa ölkələrin torpağında gözümüz yoxdur.
Bunu Prezident İlham Əliyev oktyabrın 17-də “Füzuli Şəhəri Günü”ndə Füzuli şəhərinə köçmüş sakinlər və rayon ictimaiyyətinin nümayəndələri ilə görüşdə deyib.
“Zəngəzura da, əlbəttə ki, qayıdacağıq, amma sülh yolu ilə. Mən demişəm, məni bəziləri ittiham etməyə çalışırlar, mən dedim ki, biz oraya tanklarla yox, minik maşınları ilə qayıdacağıq”, - dövlət başçısı vurğulayıb.
17-10-2023, 16:46
Serj Sarkisyanın işi üzrə növbəti məhkəmə iclası keçirilir
Bu gün İrəvanda Ermənistanın 3-cü prezidenti Serj Sarkisyanın işi üzrə növbəti məhkəmə iclası keçirilir.
İclas Yerevan ümumi yurisdiksiya məhkəməsində qurulub.
Xatırladaq ki, Serj Sarkisyan dövlət büdcəsindən təxminən yarım milyard dramın mənimsənilməsini təşkil etməkdə ittiham olunur.
Sarkisyan ittihamı qəbul etmir və vəkilləri keçmiş prezidentin siyasi təqib edildiyini iddia edirlər. Bu iş üzrə digər təqsirləndirilən şəxslər “Flash” şirkətinin sahibi Barseq Beqlaryan və Kənd Təsərrüfatı Nazirliyinin bitkiçilik şöbəsinin keçmiş rəisi Gevorq Arutyunyan da ittihamı qəbul etmirlər.
Xüsusi İstintaq Xidmətinin məlumatına görə, Serj Sarkisyan 2013-cü ildə Barseq Beqlaryanın təhriki, Samvel Qalstyan və Gevorq Arutyunyanın köməyi ilə 15 milyon litr yanacaq üçün nəzərdə tutulmuş təxminən yarım milyard dram büdcə vəsaitinin israfını təşkil edib. Barseq Beqlaryan iclas zalına gəlib. Sessiyada Sarkisyan da prosesdə iştirak edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!