7-02-2026, 11:50
4 yaşlı uşağın ayağı velosipedin pedalına ilişdi - VİDEO
Bakıda 4 yaşlı uşağın ayağı velosipedin pedal hissəsində sıxılıb qalıb.
Bu barədə Fövqəladə Hallar Nazirliyi (FHN) məlumat yayıb.
Bildirilib ki, nazirliyin “112” qaynar telefon xəttinə paytaxtın Nizami rayonu, Xəlil Rza Ulutürk küçəsində azyaşlının köməyə ehtiyacı olması barədə məlumat daxil olub. Məlumatla əlaqədar dərhal FHN-in Xüsusi Riskli Xilasetmə Xidmətinin xilasediciləri çağırış üzrə cəlb olunub.
Xilasedicilər tərəfindən həyata keçirilmiş tədbirlər sayəsində ayağı velosipedin pedal hissəsində sıxılıb qalmış 2022-ci il təvəllüdlü azyaşlıya müvafiq köməklik göstərilib.
7-02-2026, 11:37
Həkimlərə verilən bonuslar niyə dayandırılıb? - AÇIQLAMA
Dövlət tibb müəssisələrində həkimlərin əməkhaqqına əlavə olaraq verilən bonusların ödənilmədiyinə dair xəbərlər yayılıb. Həkimlər deyirlər ki, maaşdan əlavə verilən müəyyən məbləğdə bonuslar 2025-ci ilin sentyabr-oktyabr aylarından indiyə kimi ödənilmir. Bunun isə tibb işçiləri arasında narazılığa səbəb olduğu bildirilir.
Maraqlıdır ki, İcbari Tibbi Sığorta üzrə Dövlət Agentliyi həkimlərin narazılığına fərqli cavab verib.
Məsələ ilə bağlı İcbari Tibbi Sığorta üzrə Dövlət Agentliyindən bildirilib ki, bonusların ödənilməsi davam etdirilir:
“Bonusların ödənilməsi "“Tibbi Ərazi Bölmələrini İdarəetmə Birliyi” publik hüquqi şəxsin tabeliyindəki tibb müəssisələrində çalışan səhiyyə işçilərinin əməyinin ödənilməsi Qaydası”na uyğun olaraq davam edir".
Qeyd edək ki, tibb işçilərinin əməkhaqlarına vəzifə (tarif) maaşları, əmək şəraitinə görə ödənilən əlavələr, həvəsləndirici əlavələr və Əmək Məcəlləsində nəzərdə tutulmuş digər ödənişlər daxildir.
Tibb işçilərinə həvəsləndirici əlavələr vəzifədən və yerinə yetirilən işin xüsusiyyətindən asılı olaraq sabit və ya işin nəticələrinə görə aylıq həvəsləndirici əlavələr şəklində verilir.
7-02-2026, 11:26
40 yaşlı qadında 6 kiloqram narkotik aşkarlandı
Siyəzəndə 6 kiloqram narkotik vasitə aşkarlanıb.
Siyəzən Rayon Polis Şöbəsinin əməkdaşları tərəfindən keçirilən əməliyyat nəticəsində narkotiklərin qanunsuz dövriyyəsini təşkil etməkdə şübhəli bilinən əvvəllər məhkum olunmuş 40 yaşlı Ş.Bayramova saxlanılıb.
Ondan 6 kiloqrama yaxın marixuana, külli miqdarda heroin, psixotrop maddə olan metamfetamin, həmçinin psixotrop tərkibli 120 ədəd preqabalin həbi maddi sübut kimi götürülüb.
Faktla bağlı cinayət işi başlanılıb, məhkəmənin qərarı ilə saxlanılan şəxs barəsində həbs qətimkan tədbiri seçilib.
7-02-2026, 01:01
Milyardlarla dollar ziyan: Ukraynanın enerji sektoruna ağır zərbə
Rusiyanın hücumları nəticəsində Ukrayna elektrik enerjisinin istehsal gücünün yarısını itirib və ölkənin enerji şəbəkəsinin böyük hissəsi zədələnib və ya dağıdılıb.
36 yaşlı elektrik mühəndisi Oleksandr Zinçenko Rusiyanın təkrar hücumlarından sonra Ukraynanın elektrik şəbəkəsini işlək vəziyyətdə saxlamaq üçün çalışanlardan biridir.
Onun fikrincə, müharibəni bitirmək üçün danışıqlarla bağlı yazın ortalarına, hətta yayın əvvəlinə qədər heç bir konkret addım olmayacaq:
"Çünki ruslar bizim enerji infrastrukturunu atəşə tuturlar və nədənsə elə hesab edirlər ki, bununla bizi sındıra və özləri üçün sərfəli olan şərtləri qəbul etdirməyə məcbur edə bilərlər".
Kiyev İqtisadiyyat Məktəbinin hesabatında Ukraynanın enerji sektoruna dəyən ümumi ziyanın təxminən 56 milyard ABŞ dolları ətrafında olduğu bildirilir. Bu rəqəm 2022-ci ilin fevralından 2024-cü ilin mayına qədərki dövrü əhatə edir.
Hesabatda bildirilir ki, tam bərpa üçün təxminən 50-51 milyard dollar əlavə vəsait tələb olunacaq.
Ziyan görmüş obyektlərə termoelektrik stansiyalar, hidroelektrik qurğular, paylama və ötürmə şəbəkələri daxil edilib.
Energetika naziri və dövlət rəsmiləri dəfələrlə bildiriblər ki, Rusiyanın Ukraynanın enerji obyektlərinə 30-dan çox böyük kütləvi hücumu olub.
Bu hücumlar raketlər, pilotsuz uçuş aparatları və digər silahlarla aparılır, nəticədə, enerji təsərrüfatının kritik hissələri sıradan çıxır.
7-02-2026, 00:37
Fransada gözəllik salonuna qumbara atılıb - Yaralananlar var
Fransanın Qrenobl şəhərində yerləşən gözəllik salonunda qumbaranın partlaması nəticəsində altı nəfər xəsarət alıb.
Bu barədə “ici” radiostansiyası məlumat yayıb.
Məlumata görə, bir kişi cinayət yoldaşı ilə birlikdə salona daxil olduqdan sonra qumbaranı atıb. Partlayışdan sonra onlar hadisə yerindən qaçıblar. Hadisə nəticəsində vitrinin şüşələri qırılıb, altı nəfər yaralanıb. Xəsarət alanlar arasında beş yaşlı uşaq da var.
“Franceinfo” radiosunun Qrenobl prokuroru Etyen Mantoya istinadən verdiyi məlumata görə, istifadə olunan partlayıcı qurğu insanları öldürmək deyil, qorxutmaq məqsədi daşıyıb. Özəl hazırlanmış qumbarada güclü partlayıcı maddə və çoxlu metal zədələyici elementlər olmayıb.
6-02-2026, 23:30
Ekrem İmamoğlunun qaynı həbs edilib
Türkiyədə hüquq-mühafizə orqanlarının məşhurlara qarşı keçirdiyi antinarkotik əməliyyatlar çərçivəsində İstanbul bələdiyyəsinin həbsdə olan sabiq rəhbəri Ekrem İmamoğlunun qaynı Ali Kaya həbs edilib.
İstanbul Baş Prokurorluğunun keçirdiyi əməliyyat zamanı saxlanılan daha 14 nəfər də həbs olunub.
Qeyd edək ki, Ali Kaya Ekrem İmamoğlunun həyat yoldaşı Dilek İmamoğlunun qardaşıdır.
6-02-2026, 22:56
Yolumuzu gözləyən var...
Bəzən düşünürdüm ki, bu dünyada heç sevənim olmadı. Amma indi anlayıram ki, yanılmışam. Dərd məni çox sevirmiş. Ömrüm uzandıqca dərd sevgim də çoxalır, üst- üstə qalaqlanır. 1988-ci ildən bəri yurd həsrəti, sonra Qarabağ dərdi, 20 yanvar qırğınları, müharibələr, məcburi köçkün dalğaları, şəhid məzarlıqları, dəmir vaqonlarda, çadır düşərgələrdə zillət çəkənlərin ah-naləsi ruhumu, cismimi qarsalaya-qarsalaya mənə bir qərinə yaşatdı. Yaşım artdıqca dərddaşlarım da artdı. İllər uzunu Şəhid analarının oğul dərdilə qolboyun gəzdim.
Daşkəsəndə Simuzər Abdullayeva elə şəstlə dedi ki, bala səni Azərimin yerinə qoydum. Bu səsdən, bu şərəfləndirici ifadədən bədənim ürpəşdi. Dedim İlahi, - bu nə sınaqdı?! Bu nə yükdür mənə yüklədin? Bu torpaq üçün gözünü qırpmadan canını fəda edən bir oğulu böyüdüb, muradını görmədən, Vətənə qurban verən Anaya oğul olmaq məsuliyyətini mən necə daşıyaram?! Çəkə bilərəmmi bu ağırlıqda şələni? Dalınca Milli Qəhrəman Məzahir Rüstəmovun anası Rəfiqə xala, sonra gədəbəyli Əziz dayı... İllərlə mənə sarılıb balamın ətrin səndən alıram dedi...
Bu halımla bir tərəfdən şərəflənir, digər yandan yanıb yaxılırdım. Belə-belə bir-birimizin yaralarına söz məlhəmi qoya-qoya 44 günlük Vətən Müharibəsinə qədər yaşaya bildik. Qələbədən sonra qamətimiz düzəldi, qürurumuz bərpa olundu, igid əsgərlərimiz şərəfimizi özümüzə qaytardı. İşğal günlərimiz zəfər günləri ilə əvəz olundu. Elə bu dəfə də “8 Noyabr-Zəfər Günü” idi. Kəndimizin qazilərinin şərəfinə təşkil etdiyim tədbirə tələsirdim. Öz hesablamama görə yarım saat tez çatmalı idim ki, qonaqlarımı qarşılayım. Tərslikdən avtobus gəlmir, tədbirə gecikirdim. Elə bu heydə Mehdiabad qəbiristanlığından çıxan avtomobil qabağımda dayandı. Tanımadığım şəxs maşının şüşəsini endirib, nəzakətlə-əyləşin,- dedi. Yol yoldaşı olaq, mən də tək getməyim. Salam verib əyləşdim. Deyəsən heç vaxt görmədiyim üzünə diqqətlə baxdığımdan kiməsə oxşatdığımı zənn edib,- Rüstəm Behrudinin qardaşıyam, dedi, adım İlhamdı.
Dedim,- Rüstəm 40 ildir hamımızı dara çəkir. Rüstəmin “Salam, Dar ağacı” şeirinə işarə etdiyimə güldü. Bir-birimizdən heç nə soruşmadan aramızda qəribə bir bağ yarandı. Kimliyimizi, nə işə qulluq elədiyimizi bildirmədən xeyli söhbət elədik. Behrudinin Azadlıq Meydanında “qurulmuş” Dar ağacından, Azadlıq Meydanından, Milli Azadlıq Hərəkatından başlayan söhbətimiz Kələkiyə, Elçibəyin ölümünə qədər uzandı. Amma bitmədi. Çünki ayrılmalı idik. O, öz yolundan dönüb mənim yolumu yaxınlaşdırdı, mən də onu vaxtında yetirənə şükr edib mənzilimə vaxtında çatdım. Zəfər günü idi, ürəyimdən keçdi ki, onu da tədbirimizə dəvət edim, süfrə arxasında daha yaxından tanış olaq. Amma məzarlıqdan gəldiyinə görə tərəddüd etdim, fikirləşdim ki, ürəyinə toxuna bilərəm. Ona görə də fikrimi elə öz ürəyimdə saxladım...
Ürəyim də məni hey Mehdiabad qəbiristanlığında salınmış Behrud məzarlığına çəkdi. Dedi atasını məclisinə apara bilmədin, heç olmasa, tanışlığınıza səbəb olan balasını ziyarət elə. Daşına bir sığal çək, hiss eləsin ki, İlham bəy özünə dərddaş tapıb.
Yol boyu bir məsəli xatırladım:
Can üstə olan ata oğlunu yanına çağırıb vəsiyət edir:
-Oğul, mən dünyadan köçürəm. Ehsanımı elə adama verərsən ki, heç dərd görməmiş olsun! Oğul ehsan bişirtdirib yollara düşür. Nə qədər gəzib dolanırsa, dərdsiz adam tapa bilmir. Oğulun bu halını görən qoca onu yanına çağırır. Gəl otur, axtardığın mənəm deyir-gətir atanın ehsanından yeyim. Oğlan süfrə açır, kişi ehsanı yeyib fatihə verəndən sonra deyir:
Ay bala, mənim 7 ərgən oğlum ölüb. Atan sənə ona görə elə vəsiyət edib ki, gəzib görəsən dünyada dərdsiz adam yoxdur, başın qarışa, dərdin dağıla...
Məni xatirədən eynək arxasından boylanan civanəzənin gülümsər baxışı ayırdı. Yaxşı ki, bu yalan dünyaya gülərək baxırdı. Elə ziyarətçilərini də gülərək qarşılayır. Tanış olduq:
Alməmmədli İsa İlham oğlu...
İlham özünü ovutmaq üçün dərdini daşlara yazıb: 26.01.2004. Bu İsanın doğum tarixidir. Qabağına sonsuzluq işarəsi qoyulub...
Gecə...Sükut...Yalnızlıq...
Hər yer uçurum, mən duman.
Vaxtsız gələn xəbərdi,
Gecəyə çökən duman.
Gecə... Hüzün, kədər-qəm...
Göylər susub, Ay batıb.
Bəlkə elə İsadı
Duman olub qayıdıb!
Gecəyə çökən duman,
Görən kimin ruhudur?!
Kaş oyanam yuxudan,
Görəm hər şey yuxudu.
Duman olub qayıdıb,
Kim bitirər bu yası.
Bir gün dönüb gələcək,
Gedənlərin hamısı...
Əziz dərddaşım İlham, Allah sizlərə səbr versin! Özünü də bizi də yalan yuxularınla aldatma qardaş! Gedən gəlməz, biz gedərgiyik...Gəldim ki, dərdindən dərddaş payımı götürəm, bəlkə dərd şələn yumullaşar. Çünki birgə gedəcəyimiz yol var... İsa sənin, Şərəfxanla Məhsəti mənim yolumu gözləyir...
Nakam balamız İsanın ruhuna sevgi və sayğılarla:
Tamxil Ziyəddinoğlu
6-02-2026, 22:11
Sabiq nazir müavininin meyiti tapıldı
Rusiyanın sabiq ədliyyə nazirinin müavini Sergey Tropinin cəsədi Moskvanın mərkəzindəki mənzildə tapılıb.
Bu barədə Daxili İşlər Nazirliyi məlumat yayıb.
Hüquq-mühafizə orqanlarının əməkdaşları Tropinin ölümünün cinayət xarakteri daşımadığını bildiriblər.
6-02-2026, 21:29
Bakıda şagird reanimasiyaya yerləşdirildi
Fevralın 6-da Bakının Nizami rayonunda yerləşən 10 nömrəli tam orta ümumtəhsil məktəbinin şagirdi məktəbdə yıxılıb.
Hadisə ilə bağlı 10 nömrəli tam orta ümumtəhsil məktəbindən bildirilib ki, 8-ci sinif şagirdi (müvafiq səbəblərə görə şagirdin adı açıqlanmır) fevralın 6-da məktəbin fövqəladə hallar zamanı çıxış üçün nəzərdə tutulan qapısının üzərinə dırmaşmaq istəyərkən yıxılıb.
Qeyd olunub ki, məktəb rəhbərliyi tərəfindən dərhal təcili tibbi yardım çağırılıb.
"Şagirdə ilkin tibbi yardım göstərilib və müayinə üçün səhiyyə müəssisəsinə aparılıb. Hazırda onun vəziyyətinin normal olduğu bildirilir.
Məsələ ilə əlaqədar şagirdin valideynlərinə və aidiyyəti qurumlara da məlumat verilib.
Məktəbdaxili araşdırma çərçivəsində şagirdin sinif yoldaşları və müəllimlərlə söhbət aparılıb, nizam-intizam qaydalarına əməl olunmasının vacibliyi bir daha diqqətə çatdırılıb", - deyə məlumatda bildirilib.
Klinik Tibbi Mərkəzdən isə qeyd edilib ki, bu gün saat 16:30-da 2012-ci il təvəllüdlü kişi cinsli şəxs Təcili tibbi yardım şöbəsinə hospitalizasiya olunub.
"Kəllə-beyin travması diaqnozu təyin edilən pasiyentə zəruri tibbi xidmətlər göstərilib. Hazırda onun müalicəsi Reanimasiya şöbəsində davam etdirilir, vəziyyəti stabil qiymətləndirilir", - deyə məlumatda vurğulanıb.
6-02-2026, 21:25
ABŞ İrana qarşı hərəkətə keçdi
Amerika Birləşmiş Ştatlarının (ABŞ) Dövlət Departamenti tərəfindən İrana qarşı yeni sanksiyalar tətbiq olunub.
Sanksiyalar İran nefti, neft məhsulları və neft-kimya məhsullarının ticarəti ilə əlaqəli 15 qurumu, 2 şəxsi və 14 kölgə donanması gəmisini əhatə edir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!