31-03-2026, 17:46
ABŞ-də benzinin qiyməti 4 dolları ötüb
ABŞ-də benzinin 1 qallonu 2022-ci ilin avqust ayından bəri ilk dəfə olaraq 4 dollardan çox bahalaşıb.
Bu barədə ABŞ Avtomobil Assosiasiyasının məlumatında deyilir.
Bildirilir ki, ölkə üzrə benzinin 1 qallonunun pərakəndə satış qiyməti 4,02 dollara yüksəlib. Yaxın Şərqdəki münaqişənin başlanğıcından bəri ABŞ-də benzin qiymətləri 1 dollardan çox artıb. ABŞ və İsrailin İrana hücumlarından bir gün əvvəl Birləşmiş Ştatlarda benzinin 1 qallonunun qiyməti 2,98 dollar idi.
Ekspertlərə görə, ABŞ-də benzin qiymətlərinin 1 dollar artması, digər iqtisadi təsirlər nəzərə alındıqda belə, istehlakçı etimad indeksini 4,5 bənd və ya daha çox aşağı salır. Həmçinin qiymətlərinin 1 dollar artması ilə insanların iqtisadiyyata baxışı təxminən 5 faiz pisləşir.
Qeyd edək ki, ABŞ xam neftinin bir barelinin qiyməti 2022-ci ildən bəri ilk dəfə olaraq 100 dollardan çox artıb. Həmçinin ABŞ-nin neft etalon indeksi mart ayında 50 faizdən çox artaraq 2020-ci ilin may ayından bəri ən böyük artımı qeydə alıb. Bu artım benzin və dizel yanacağı kimi istehlak mallarında daha çox özünü göstərir. Belə ki, dizelin 1 qallonunun qiyməti 5,4 dollardan yuxarı qalxıb və bu da ümumi iqtisadiyyat üçün ciddi problem yaradıb.
31-03-2026, 17:41
ABŞ İrana quru qoşunları göndərməyi istisna etmir - Pentaqon rəhbəri
Vaşinqton İranla müharibədə quru qoşunlarının yerləşdirilməsi də daxil olmaqla heç bir variantı istisna etmir.
Bunu ABŞ-ın müharibə naziri Pit Heqset bildirib.
Heqset mətbuat konfransında deyib:
"Heç bir variantı istisna etməyəcəyik. Düşmənə nə etmək istədiyinizi və nə etmək istəmədiyinizi, o cümlədən quru qoşunlarının yerləşdirilməsini söyləsəniz, döyüşüb qalib gələ bilməzsiniz. Əsas məsələ gözlənilməz olmaq və heç kimə nə etmək istədiyinizi və nə etmək istəmədiyinizi bildirməməkdir".
Pit Heqsetin sözlərinə görə, ABŞ prezidenti Donald Tramp İranla razılığa gəlməyə hazırdır və Tehran hakimiyyəti onun şərtlərindən xəbərdardır.
"Əgər İran kifayət qədər müdrik olarsa, razılaşma əldə edəcək",- Pentaqon rəhbəri brifinqdə bildirib.
ABŞ-ın müharibə naziri deyib ki, Vaşinqton Rusiya və Çinin İranla bağlı nə etdiyini dəqiq bilir və bu problemi həll etmək üçün addımlar atır.
"Müdafiə sənaye bazamız bu gün İkinci Dünya Müharibəsindən bəri ən canlı dövrlərdən birini yaşayır və sürətlə böyüyür".
Heqset əlavə edib ki, ABŞ qüvvələrinin yerdəki "işi bitirmək" üçün "daha çox bomba"ya ehtiyacı var.
O əlavə edib ki, qarşıdakı günlər həlledici olacaq və İran bunu bilir.
31-03-2026, 17:30
“Fənərbağça”nın prezidenti qəzaya düşdü
Türkiyənin “Fənərbağça” klubunun prezidenti Sadettin Saran qəzaya düşüb.
Hadisə funksioner avtomobili ilə evindən stadion istiqamətində hərəkət edərkən baş verib.
Klub rəhbərinin vəziyyətinin yaxşı olduğu bildirilib. Sürücüsü isə yüngül xəsarət alıb. Hadisə nəticəsində avtomobilə müəyyən zərər dəyib. Məlumata görə, qəzadan sonra Sadettin Saran ayağında, qolunda və boynunda ağrı hiss etməsinə baxmayaraq, klub binasına gedib və orada rəhbərliklə keçirilən toplantıda iştirak edib.
31-03-2026, 17:22
Bəzi yaşayış məkanlarının sakinləri hotellərə yerləşdirilib - RƏSMİ
Bakıda və qəsəbələrdə bir neçə gün ərzində yağan aramsız yağışlar nəticəsində təhlükəli vəziyyətdə olan bəzi yaşayış məkanlarının sakinləri müvəqqəti olaraq hotellərə yerləşdirilib.
Bu barədə Baki Şəhər İcra Hakimiyyətinin (BŞİH) Mətbuat xidməti məlumat yayıb.
Məlumata görə, Bakının qəsəbələrində yağış fəsadlarının aradan qaldırılması davam etdirilir.
Qeyd edilib ki, Bakıda və qəsəbələrdə bir neçə gün ərzində yağan aramsız yağışlar nəticəsində bəzi ərazilərdə subasma halları müşahidə edilmişdir, bir çox yerlərdə yığılan sular artıq təmizlənsədə bəzi ərazilərdə bu iş davam etdirilir.
Mövcud vəziyyətlə bağlı sakinlər tərəfindən rayon icra hakimiyyətlərinə müraciətlər daxil olub. Müraciətlər əsasında Sabunçu, Xəzər, Binəqədi rayonlarında təxliyə işləri aparılıb.
Bildirilib ki, hazırda sözügedən rayonların qəsəbələrində xüsusi texnikalar vasitəsilə suyun çəkilməsi işləri davam etdirilir.
31-03-2026, 17:15
Əraqçi Fidanla danışdı - Trampın təhdidlərini cinayət adlandırdı
İranın xarici işlər naziri Abbas Əraqçi türkiyəli həmkarı Hakan Fidanla telefon danışığı aparıb.
Əraqçi ABŞ hökumətinin İranın enerji və sənaye infrastrukturuna hücum təhdidlərini cinayət adlandırıb.
İran Xarici İşlər Nazirliyinin mətbuat xidməti onun Telegram kanalında dediyi sözləri sitat gətirib:
"ABŞ hökumətinin İranın enerji və sənaye infrastrukturuna hücum təhdidlərini ehtiva edən ritorikası özlüyündə cinayətdir; bu, beynəlxalq hüququn fundamental prinsiplərinə və humanitar normalara açıq şəkildə etinasızlıqdır”.
Əraqçi vurğulayıb ki, "beynəlxalq ictimaiyyət buna qətiyyətlə cavab verməlidir".
Nazir İrandan Türkiyəyə ballistik raket atılması ilə bağlı iddiaları da əsassız adlandırıb.
Əraqçi qeyd edib ki, İran qonşuluq prinsiplərinə riayət etməyə, Türkiyənin suverenliyi və ərazi bütövlüyünə hörmət göstərməyə sadiqdir və mümkün iddiaların araşdırılması üçün birgə texniki əməkdaşlığa hazırdır.
Daha əvvəl ABŞ prezidenti Donald Tramp atəşkəs razılaşması "tezliklə əldə edilməsə" və Hörmüz boğazı açılmasa, ABŞ-ın İranın bütün elektrik stansiyalarını, neft quyularını və Fars körfəzindəki Xarq adasını məhv edəcəyi ilə hədələyib.
31-03-2026, 17:11
Rasim Balayevin yerinə onlardan biri seçiləcək
Xalq artisti Rasim Balayevin 40 mərasimindən sonra onun rəhbərlik etdiyi Azərbaycan Kinematoqrafçılar İttifaqına yeni sədr seçkisi keçiriləcək.
İttifaqdan bildirilib ki, İdarə Heyətinin məsələ ilə bağlı iclasını mayın 8-dən sonra keçirmək planlaşdırılıb.
Yeni sədrin İdarə Heyətinin üzvləri arasından seçiləcəyi gözlənilir.
Hazırda Azərbaycan Kinematoqrafçılar İttifaqının İdarə Heyətində 37 nəfər təmsil olunur. Onlar aşağıdakılardı:
Anar – Xalq yazıçısı, AKİ katibi
Nizami Abbas - Operator, rejissor, Əməkdar incəsənət xadimi
Adil Abbasov - Kinooperator, Əməkdar incəsənət xadimi
Suğra Bağırzadə - Aktrisa, Əməkdar artist
Nadir Bədəlov - Sənətşünas, ssenarist, AKİ katibi
Əli İsa Cabbarov - Kinorejissor, prodüser
Akif Əli - Filoloq alim, AKİ katibi
Tahir Əliyev - kinorejissor, AKİ katibi
Şamil Əliyev - Kinorejissor
Azər Əsgərov - Bəstəkar
Əmir Hacılı - Ssenarist, jurnalist
Türkan Hüseynova - Kinorejissor, prodüser, AKİ katibi
Fatimə İbrahimbəyova – Prodüser
Mahirə İsgəndərova - Aktrisa
Kamran Qasımov - Kinorejissor, ssenarist
Arzu Qulamov - Kinoejissor, prodüser
Cəmil Quliyev - Kinorejissor, Əməkdar incəsənət xadimi
Eldəniz Quliyev - Ssenarist
Xalidə Quliyeva - Aktrisa, Əməkdar artist
Firəngiz Qurbanova - Rejissor, Əməkdar incəsənət xadimi
Rəfail Qəmbərov - Kinooperator, Əməkdar incəsənət xadimi
Cahangir Mehdiyev - Kinorejissor, Əməkdar incəsənət xadimi
Məbud Məhərrəmov - Aktyor, Xalq artisti
Rövşən Məmmədov - Rejissor, ssenarist, aktyor
Şəfiqə Məmmədova - Xalq artisti, professor
Amil Məmiyev - Kinorejissor
Baba Məsimov - Şair, Əməkdar incəsənət xadimi, AKİ katibi
Mirbala Səlimli - Rejissor, ssenarist, Əməkdar incəsənət xadimi, aki katibi
Oktay Mir-Qasım - Xalq artisti, professor
Ramiz Mirzəyev - Xalq artisti, AKİ katibi
Vaqif Mustafayev - Xalq artisti, professor, AKİ katibi
Həmidə Ömərova - Xalq artisti, AKİ katibi
Oleq Səfərəliyev - Rejissor, AKİ katibi
Sevda Sultanova - Kinotənqidçi
Ziya Şıxlinski - Rejissor, Əməkdar incəsənət xadimi, AKİ katibi
Şükufə Yusupova - Aktrisa, Xalq artisti
31-03-2026, 17:00
Dəmiryol vağzallarında elektron siqaretlərdən istifadə edənlər cərimələnəcək
"Tütün və tütün məmulatları haqqında Qanun"la 1 aprel 2026-cı il tarixindən Azərbaycanda elektron siqaretlərin istifadəsi qadağan edilir.
"Azərbaycan Dəmir Yolları" QSC-dən verilən məlumata görə, inzibati Xətalar Məcəlləsinə əsasən, qeyd edilən tarixdən qatarlarda, dəmiryol vağzallarında, yerüstü qapalı və yeraltı piyada keçidlərində elektron siqaretlərin istifadəsinə görə 30 manat məbləğində cərimə tətbiq ediləcək.
"Elektrik qatarları ətraf mühitin qayğısına qalır, amma elektron siqaret sağlamlığa zərər vurur. Elektrik qatarlarından istifadə edin - təbiətə və özünüzə qayğı göstərin", - məlumatda qeyd olunur.
31-03-2026, 16:54
Sirkə turşusu, siçan dərmanı - Bayram günləri zəhərlənənlər
Bayram günləri ilə əlaqədar qeyri-iş günlərində (20.03.2026-30.03.2026) Kliniki Tibbi Mərkəzin Toksikologiya şöbəsinə zəhərlənmə səbəbilə 31 müraciət daxil olub.
Bu barədə TƏBİB-dən məlumat verilib.
Bildirilib ki, müraciət edənlərdən 12-si dərman, 1-i siçan dərmanı (rodensit), 1-i dəm qazı, 2-si fosfor üzvi birləşmələrdən, 3-ü anafilaktik şokdan, 3-ü allergik reaksiyadan, 9-u isə sirkə turşusundan zəhərlənən şəxslər olub.
Pasiyentlərə zəruri tibbi xidmətlər göstərilib və onlar ambulator müalicə üçün evə buraxılıblar.
31-03-2026, 16:44
Azərbaycanda sabahdan balıq ovu qadağan edilir
Sabahdan Azərbaycanın daxili su hövzələrində sənaye məqsədilə balıq və digər su bioresurslarının ovu qadağan edilir.
Bu barədə Kənd Təsərrüfatı Nazirliyi məlumat yayıb.
Belə ki, Nazirlər Kabinetinin 2 iyun 2017-ci il tarixli qərarı ilə təsdiq edilmiş "Balıq və digər su bioresursları ovunun Qaydaları"na əsasən kürüləmə dövrü ilə əlaqədar sənaye məqsədi ilə balıq və digər su bioresurslarının ovu Kür çayında, Sarısu gölündə, Mingəçevir, Şəmkir, Araz, Yenikənd su anbarlarında aprelin 1-dən sentyabrın 1-nə qədər qadağan edilir.
Sentyabrın 1-dən adları çəkilən daxili su obyektlərində balıq və digər su bioresurslarının sənaye ovuna balıqovlama bileti almış şəxslər Qaydalarla müəyyən edilmiş şərtlər əsasında ovu davam etdirə bilərlər.
Qanunvericiliyə əsasən idman və həvəskar balıq ovu üçün balıqovlama biletinin alınması tələb olunmur və Qaydalarla müəyyən edilmiş şərtlər daxilində həyata keçirilə bilər.
Balıq və digər su bioresurslarının ov qaydalarının pozulmasına, o cümlədən qanunsuz ovlanmasına görə təqsirkar şəxslər müvafiq olaraq, İnzibati Xətalar Məcəlləsi və Cinayət Məcəlləsində nəzərdə tutulmuş qaydada məsuliyyət daşıyırlar.
31-03-2026, 16:36
Şəkidə evdə partlayış - 2 nəfər xəsarət alıb
Fövqəladə Hallar Nazirliyinin (FHN) “112” qaynar telefon xəttinə Şəki şəhəri, Aydın Məmmədov küçəsində yerləşən fərdi yaşayış evində partlayış baş verməsi barədə məlumat daxil olub.
FHN-in mətbuat xidmətindən bildirilib ki, məlumatla əlaqədar dərhal nazirliyin Dövlət Yanğından Mühafizə Xidməti Şəki Rayon Yanğından Mühafizə Hissəsinin qüvvələri əraziyə cəlb olunub.
Hadisə yerində əməliyyat şəraiti qiymətləndirilərkən vətəndaşa məxsus ümumi sahəsi 320 kvadratmetr olan ikimərtəbəli fərdi yaşayış evinin birinci mərtəbəsindəki mətbəxdə yanğınla nəticələnən partlayışın baş verdiyi müəyyən edilib.
Yanğın yanğınsöndürənlərin operativ müdaxiləsi sayəsində genişlənməsinə imkan verilmədən qısa müddətdə söndürülüb.
Partlayış dalğasının təsirindən evə ziyan dəyib, mətbəxdə təxminən 5 kvadratmetr sahə yanıb.
Mənzilin böyük hissəsi yanğından mühafizə olunub.
Partlayış zamanı 2 nəfər xəsarət alıb.
Faktla bağlı aidiyyəti qurumlar tərəfindən araşdırma aparılır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!