İctimai Birliyin fəalları

şəhidlərimizin xatirəsini yad ediblər

"Vətənə Xidmət və Hüquqi-Sosial İnkişaf Maarifləndirmə" İctimai Birliyinin rəhbərliyi və fəalları 13 iyul 2026-cı il tarixində Bakı şəhərində yerləşən 2-ci Fəxri Xiyabanı ziyarət edərək Azərbaycanın qəhrəman oğulları – general-mayor Polad Həşimovun, polkovnik İlqar Mirzəyevin və digər şəhidlərimizin məzarlarını ziyarət edib, önünə gül dəstələri düzüb, onların əziz xatirəsini dərin ehtiramla yad edib və ruhlarına dualar oxuyublar.
Anım mərasimi zamanı şəhidlərimizin Vətən uğrunda göstərdikləri misilsiz qəhrəmanlıq və fədakarlıq hissi xüsusi ehtiramla xatırlanıb. Bildirilib ki, Azərbaycan xalqı hər zaman öz qəhrəman övladlarının xatirəsini uca tutur və onların müqəddəs amalını yaşatmağı özünə mənəvi borc hesab edir. Qeyd olunub ki, Azərbaycanın ərazi bütövlüyü və dövlət müstəqilliyi uğrunda canlarından keçən şəhidlərimizin şərəfli həyat yolu gələcək nəsillər üçün əsl vətənpərvərlik məktəbidir.
Ziyarətdə birliyin sədri Əziz İsmayılov, həmtəsisçisi Rüstəm Həsənov, müavinlər Cavanşir Rzazadə və Çingiz Bayramov, Qadınlar Şurasının sədri Arzu Musayeva, Qadınlar Şurası sədrinin müavini Aysel Yusifova, İdarə Heyətinin üzvü Natiq Kərimov, birliyin fəxri İdarə Heyətinin üzvü, şəhid Rasim Məmmədovun anası Xuraman Məmmədova və Qarabağ Regional İctimai Birliyinin Qadınlar Şurasının sədri Ayna Allahyarqızı iştirak ediblər.
Tədbirdə çıxış edənlər vurğulayıblar ki, şəhidlərimizin müqəddəs xatirəsinin daim uca tutulması, onların keçdiyi şərəfli döyüş yolunun öyrənilməsi və gənc nəslə aşılanması hər bir vətəndaşın üzərinə düşən mənəvi məsuliyyətdir. Xüsusilə qeyd olunub ki, Azərbaycan Ordusunun qəhrəman zabitləri və əsgərləri tariximizə qızıl hərflərlə yazılmış şanlı Zəfərin əldə olunmasında misilsiz şücaət göstəriblər. Bu qəhrəmanlıq salnaməsi xalqımızın milli qürur mənbəyi olaraq hər zaman yaşayacaq.
Birliyin sədri Əziz İsmayılov bildirib ki, şəhid ailələrinin yanında olmaq, onların xatirəsini yaşatmaq və gənclərdə milli-mənəvi dəyərlərə, dövlətçiliyə və vətənpərvərliyə bağlılıq hissini gücləndirmək "Vətənə Xidmət və Hüquqi-Sosial İnkişaf Maarifləndirmə" İctimai Birliyinin əsas fəaliyyət istiqamətlərindən biridir. Onun sözlərinə görə, belə ziyarətlər cəmiyyətimizdə milli birlik və həmrəyliyin möhkəmlənməsinə, şəhidlərimizin qəhrəmanlıq irsinin gələcək nəsillərə çatdırılmasına mühüm töhfə verir.
Sonda bütün şəhidlərimizin ruhuna dualar oxunub, onların əziz xatirəsi bir dəqiqəlik sükutla yad edilib. İştirakçılar Allahdan bütün şəhidlərimizə rəhmət, qazilərimizə möhkəm can sağlığı diləyərək bildiriblər ki, Azərbaycan xalqı öz qəhrəman övladlarını heç zaman unutmayacaq və onların əziz xatirəsi daim uca tutulacaq.

Mina RƏŞİD

Rumıniya Senatının nümayəndə

heyəti Xankəndiyə səfər edib - FOTO

İyulun 13-də Rumıniya Senatının Maramureş vilayətindən seçilmiş üzvü, Rumıniya-Azərbaycan parlamentlərarası dostluq qrupunun üzvü Kristian Auqustin Nikulesku Tsıqırlasın başçılıq etdiyi nümayəndə heyəti Xankəndi şəhərində Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubovla görüşüb. Xankəndidə keçirilən görüş zamanı qonaqlara işğaldan azad edilmiş ərazilərdə həyata keçirilən genişmiqyaslı bərpa və yenidənqurma işləri barədə ətraflı məlumat verilib. Bildirilib ki, Xankəndi, Ağdərə və Xocalıda müasir yaşayış məntəqələrinin salınması, sosial infrastrukturun qurulması, yol, enerji, su və rabitə şəbəkələrinin yenilənməsi istiqamətində mühüm layihələr uğurla icra olunur. Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, Prezidentin xüsusi nümayəndəsi Elçin Yusubov qeyd edib ki, dövlət başçısının tapşırıqlarına uyğun olaraq "Böyük Qayıdış" proqramı çərçivəsində keçmiş məcburi köçkünlər mərhələli şəkildə doğma torpaqlarına dönür, mənzillə təmin olunurlar. E.Yusubov bildirib ki, onların məşğulluğu, yeni iş yerlərinin yaradılması və sosial rifahının yüksəldilməsi istiqamətində də ardıcıl tədbirlər görülür. Görüşdə həmçinin vurğulanıb ki, bölgədə sahibkarlığın inkişafına da xüsusi önəm verilir. Yerli və xarici investorlar üçün əlverişli biznes mühiti yaradılıb, müxtəlif istehsal və xidmət sahələrinə investisiya qoyuluşu təşviq edilir. Bunun nəticəsində yeni müəssisələr fəaliyyətə başlayır, iqtisadi aktivlik artır və əhalinin məşğulluq imkanları genişlənir. Rumıniyalı qonaqlar da azad edilmiş ərazilərdə qısa müddətdə həyata keçirilən quruculuq işlərini yüksək qiymətləndirərək, bölgədə müşahidə etdikləri inkişafın və müasir infrastrukturun onlarda xoş təəssürat yaratdığını bildiriblər.