19-08-2022, 23:52
Rusiyalı diplomat Rumıniyadan qovuldu
Rumıniya Rusiyanın Buxarestdəki səfirliyinin əməkdaşını persona non-qrata elan edərək ölkədən qovub. Bu barədə Rumıniya Xarici İşlər Nazirliyi məlumat yayıb. Qərarin qəbul edilməsinə səbəb kimi 1961-ci il diplomatik münasibətlər haqqında Vyana Konvensiyasına əməl edilməməsi göstərilir. Bundan əvvəl Rumıniya 10 rus diplomatını ölkədən çıxarmışdı. Rusiyalı diplomatın konvensiyanın hansı maddəsini pozduğu və digər detallar açıqlanmayıb.
19-08-2022, 23:15
Çin lideri Səmərqənddə Putinlə görüşəcək
Çin lideri Si Cinpin gələn ay keçiriləcək regional sammitdə Rusiya Prezidenti Vladimir Putin ilə görüşlər keçirməyi planlaşdırır. Bu barədə mənbələrə istinadən "The Wall Street Journal" (WSJ) nəşri məlumat yayıb. Görüşlər sentyabrın 15-16-da Səmərqənddə keçirilməsi planlaşdırılan Şanxay Əməkdaşlıq Təşkilatında (ŞƏT) baş tutacaq. Çin lideri Putinlə yanaşı təşkilata üzv olan digər ölkələrin liderləri ilə də görüşəcək.
19-08-2022, 22:38
Kreml Putinlə Makronun söhbətinin detallarını yaydı
"Ukrayna Silahlı Qüvvələri tərəfindən Zaporojye Atom Elektrik Stansiyasının (AES) ərazisinin sistemli şəkildə atəşə tutulması genişmiqyaslı fəlakət riski yaradır". Bunu Rusiya prezidenti Vladimir Putin Fransa lideri Emmanuel Makronla telefon danışığında bildirib. "Ukrayna ətrafında vəziyyətin müxtəlif aspektləri müzakirə edilib. Xüsusilə Vladimir Putin Zaporojye AES-in ərazisinin Ukrayna hərbçiləri tərəfindən sistemli şəkildə atəşə tutulmasının radiasiya ilə çirklənməyə səbəb ola biləcək genişmiqyaslı fəlakət riski yaratdığını vurğulayıb”, - Kremlin mətbuat xidməti Rusiya və Fransa prezidentləri arasında baş tutan telefon danışığının yekunlarına dair mətbuata açıqıamasında bəyan edib. Məlumata əsasən, prezidentlər real vəziyyəti yerindəcə qiymətləndirə biləcək MAQATE missiyasının mümkün qədər tez bir zamanda Atom Elektrik Stansiyasına göndərilməsinin vacibliyini qeyd ediblər. "Rusiya tərəfi agentliyin müfəttişlərinə lazımi köməklik göstərməyə hazır olduğunu təsdiqləyib ", - deyə açıqlamda qeyd olunub.
19-08-2022, 22:29
Soçidə Putinlə görüşən Tokayev bu dəfə nələr söylədi...
Qazaxıstanın dövlət başçısı Kasım-Jomart Tokayev və Rusiya prezidenti Vladimir Putin bu gün Soçidə görüşüblər. Butov.az-ın verdiyi xəbərə görə, görüşdə ikitərəfli əməkdaşlıq məsələləri müzakirə olunub. “Həqiqətən də Qazaxıstanla Rusiya arasında strateji tərəfdaşlıq əlaqələri var. Bu il biz diplomatik münasibətlərin qurulmasının böyük tarixini – 30 illiyini qeyd edirik. 30 il əvvəl dostluq, əməkdaşlıq və qarşılıqlı yardım haqqında ilk müqavilə imzalandı. 2013-cü ildə bu müqavilə ölkələrimiz arasında müttəfiqlik münasibətlərinə dair imzalanmış yeni sənədlə tamamlandı. Ona görə də, doğrudan da, təməl çox yaxşıdır”, - deyə Kasım-Jomart Tokayev görüş zamanı bildirib. “Ticarət-iqtisadi əməkdaşlığa gəlincə, o, uğurla inkişaf edir. İndi sənaye kooperasiyası bizi qane edən ciddi nəticələr əldə edir. Qeyd etdiyiniz kimi, ticarətin dinamikası müsbətdir”, - deyə dövlət başçısı əlavə edib. Ötən il ölkələr arasında ticarət dövriyyəsinin həcmi 24,5 milyard dollar təşkil edib. “Biz BMT və digər beynəlxalq qurumların əsas platformalarında fəal şəkildə qarşılıqlı fəaliyyət göstəririk. Bu il Qazaxıstan MDB-yə sədrlik edir. Oktyabrda Müstəqil Dövlətlər Birliyinin sammiti olacaq. Şəxsi iştirakınızı çox gözləyirik. Üstəlik, Rusiya Müstəqil Dövlətlər Birliyində mühüm rol oynayır. Bu, həqiqətən də, beynəlxalq formatda qarşılıqlı əməkdaşlığımızın prioritet istiqamətlərindən biridir”, - deyə Kasım-Jomart Tokayev Putinə bildirib. Kasım-Jomart Tokayev bəyan edib ki, Rusiya ilə gələcək əməkdaşlıqla bağlı bədbin proqnozlar vermək üçün heç bir əsas yoxdur. "Ümumiyyətlə, əməkdaşlığın necə inkişaf etməsindən razı qalmağa hər cür əsas var. Mən bu baxımdan sizinlə razıyam”, - Qazaxıstan prezidenti Putinlə ikitərəfli görüşdə deyib. Dövlət başçısı qeyd edib ki, iki ölkəni ümumi sərhəd - dünyanın ən uzun tam delimitasiya olunmuş quru sərhədi birləşdirir. “Ona görə də əməkdaşlığımızın gələcəyi ilə bağlı bədbin proqnozlar verməyə, şübhəsiz ki, heç bir əsas yoxdur. “Mən şəxsən Qazaxıstan Respublikasının prezidenti kimi bütün sahələrdə çoxtərəfli əməkdaşlığımıza əlavə dinamika vermək əzminindəyəm”, – Kasım-Jomart Tokayev əlavə edib.
19-08-2022, 22:00
Ərdoğan Putinin devrilməsini istəyir – Sabiq nazirdən şok açıqlama
"Qərbin Ukrayna müharibəsində taktikası bəllidir. Onlar istəyirlər ki, Ukraynada hərbi əməliyyatlar davam etsin və bu da imkan daxilində Rusiyanı zəiflətsin. Amma yaxşı başa düşürlər ki, Rusiyanın tam hərbi məğlubiyyəti mümkün deyil. Çünki Rusiyanı hərbi məğlubiyyətdən qoruyan taktiki nüvə silahı var". Bu sözləri Azərbaycanın sabiq xarici işlər naziri Tofiq Zülfüqarov Türkiyə prezidenti Rəcəb Tayyib Ərdoğanın Lvova səfərinin nəticələrindən danışarkən bildirib. Eks-nazir hesab edir ki, hərbi baxımdan Ukrayna öz ərazisini müdafiə etsə də, müharibə Rusiyanın hərbi məğlubiyyəti ilə nəticələnməyəcək: "Artıq məlumdur ki, siyasi baxımdan Rusiya uduzub. Strategiya siyasi məğlubiyyətin Rusiya daxilində problem yaratmasına hesablanıb. Müxtəlif mütəxəssislər deyirlər ki, müharibə Rusiyanın dağılmasına, yaxud hakimiyyət dəyişikliyinə gətirib çıxaracaq”.
17-08-2022, 21:32
Ukrayna Ali Baş Komandanı dəyişəcək
Ukrayna Silahlı Qüvvələrinin Ali Baş Komandanı dəyişə bilər. Bu barədə Ukraynanın "Teleqraf" nəşri hakimiyyətə yaxın mənbələrə istinadən yazıb. Ukrayna Prezidenti Volodimir Zelenski Silahlı Qüvvələrin Ali Baş Komandanı Valeri Zalujnını Ukrayna Silahlı Qüvvələrinin Quru Qoşunlarının baş komandanı Aleksandr Sırski ilə əvəz etməyi planlaşdırır. Yerdəyişmə avqustun sonu və ya sentyabrın əvvəlində baş verə bilər. Bildirilir ki, Valeri Zalujnıya müdafiə naziri postu təklif olunacaq.
17-08-2022, 21:30
Məsciddə partlayış - 20 ölü, 40 yaralı var
Bu gün Kabilin şimal-şərqindəki məscidlərin birində partlayış olub. Hadisə nəticəsində azı 20 nəfər həlak olub, 40 nəfər yaralanıb. Bu barədə "Al Jazeera" telekanalı Əfqanıstanın güc strukturlarına istinadla məlumat yayıb. Hələlik hadisə ilə bağlı digər təfərrüatlar açıqlanmayıb.
17-08-2022, 21:25
Norveç Ukraynaya yeni hərbi yardım göndərəcək
Ukraynanın müdafiə naziri Aleksey Reznikov norveçli həmkarı Byorn Arild Qramla telefon danışığı aparıb. Butov.az xəbər verir ki, məlumatı Reznikov öz "Twitter" səhifəsində yayıb. Ukraynalı nazir bildirib ki, Norveç Ukraynaya yeni hərbi yardım paketi göndərəcək. O əlavə edib ki, bundan əlavə, Norveç Ukrayna əsgərlərinə təlim keçəcək.
17-08-2022, 21:13
Rusiya ABŞ-ın məşhur brendinin adını dəyişdi
Ukraynada müharibə başladıqdan sonra Rusiya bazarını tərk edən ABŞ-ın məşhur “Starbucks” qəhvə şirkətinin əvəzinə Moskvada yeni obyektlər açılacaq. Bu barədə "Moskva 24" agentliyi məlumat yayıb. Bildirilir ki, Rusiyada "Starbucks" brendi "Stars coffee" adlanacaq və loqoda su pərisi əvəzinə kokoşnikli qız olacaq. Moskvada yeni qəhvəxanalar sabahdan fəaliyyətə başlayacaq.
17-08-2022, 21:00
Qara Dəniz Donanmasına yeni komandan təyin edildi
Rusiya Hərbi Dəniz Qüvvələrinin Qara dəniz donanmasına yeni komandan təyin edilib. Bu barədə Rusiyanın "RİA Novosti" informasiya agentliyi öz mənbələrinə istinadən məlumat yayıb. Məlumata görə, Rusiya tərəfindən ilhaq edilmiş Krımda yerləşən Qara dəniz donanmasına Viktor Sokolov rəhbərlik edəcək. Sokolov artıq Sevastopol limanında donanmanın hərbi şurasının üzvlərinə təqdim olunub. Yeni komandan Krım yarımadasında Rusiyaya məxsus hərbi bazalara ard-arda endirilən zərbələrdən sonra təyin olunub. Rusiyaya məxsus xəbər agentliklərindən biri mənbələrə istinadən yazıb ki, Rusiyanın Ukraynada "xüsusi hərbi əməliyyat" apardığı bir vaxtda təyinatın ictimaiyyətə açıqlanmaması “normal” hesab olunur. Rusiyada mötəbər tarixə malik Qara Dəniz Donanması müharibə zamanı bir neçə dəfə ağır itkilərə məruz qalıb. Aprel ayında donanmanın flaqman gəmisi hesab edilən "Neptun" raket kreyseri məhv edilib. Donanmanın Krımda yerləşən Saki aviabazasına ötən həftə ağır hücum olub. Bazada olan 10-a yaxın təyyarə məhv edilib. Qara Dəniz Donanması Ukraynanın donanmasından qat-qat böyükdür. 1783-cü ildə Böyük İmperator Yekaterinanın dövründə yaranan donanma Rusiyada "milli qürur mənbəyi" hesab edilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!