Sentyabrın 16-da Qardabani rayonunun Kosalı kənd orta məktəbində el şairi Zahid Ələmpaşallının 80 illik yubileyi keçirildi. Tədbirə dəvət alan “Borçalı” İctimai Cəmiyyətinin sədri Zəlimxan Məmmədli obyektiv səbəblərə görə iştirak edə bilmədiyindən, mərasimdə cəmiyyəti təmsil etmək üçün Mətbuat və İnformasiya Xidmətinin rəhbəri Elbəyi Cəlaloğlu Gürcüstana ezam olunmuşdu.
Tədbirdə rayon rəhbərliyi, müəllimlər, söz adamları, KİV nümayəndələri və musiqiçilər iştirak etdilər. Qardabani İcra Başçısı müavininin açılış nitqindən sonra söz ziyalılara və musiqiyə verildi. “Borçalı” Cəmiyyəti İdarə Heyətinin üzvü Osman Əhmədoğlu Zahid Ələmpaşallının yaradıcılığı barədə ətraflı söhbət açaraq onun ictimaiyyətə təqdim etdiyi dastanları və qoşmalarının mahiyəti barədə fikirlərini iştirakçılarla bölüşdü. Elbəyi Cəlaloğlu “Borçalı” Cəmiyyətinin sədri Zəlimxan Məmmədlinin salam-duasını və təbrikini yubilyara, eləcə də bütün iştirakçılara çatdırdı. O, “Borçalı” Cəmiyyətinin fəaliyyəti, soydaşlarımızın rifahının yaxşılaşması, onların gürcü xalqı ilə yaxın dostluq, mehriban qonşuluq, sülh, barış şəraitində yaşamasının təmini, təhsil, soydaşlarımıza gürcü dilinin tədrisi və digər sahələrdə problemlərin çözülməsi məsələsində “Borçalı” Cəmiyyətinin rolundan və onun ictimai şüura müsbət təsirindən bəhs etdi. Elbəyi Cəlaloğlu “İmedi” TV-nin və bəzi gürcü mətbuatlarının 7-ci Elat bayramından sonra yayınladığı saxta, qərəzli reportaj və dezinformasiyadan söhbət açaraq onların bu addımını pislədi, məsələlərə bu cür ucuz yanaşmaların iki xalq arasındakı etimad mühitinə xələl gətirə biləciyini diqqətə çatdırdı. Natiq çıxışında Zəlimxan Məmmədlinin Gürcüstana girişinə qoyulmuş əsassız yasaq qərarının ləğv olunmasına böyük ümid bəslkədiklərini də qeyd etdi. Elbəyi Cəlaloğlu çıxışının sonunda Zahid Ələmpaşallını “Borçalı” Cəmiyyətinin “El Ağsaqqalı” fəxri diplomuyla təltif etdi, eləcə də müəllifin “İnsanın dəyəri söhbətindədir” adlı, “Borçalı” Cəmiyyətinin yubilyara hədiyyə məqsədilə nəşr etdirdiyi kitabını və yubilyarın iri həcmli portretini ona təqdim etdi. Qeyd edək ki, Elbəyi Cəlaloğlunun redaktorluğu ilə “Borçalı” nəşriyyat-poliqrafiya müəssisəsində işıq üzü görmüş “İnsanın dəyəri söhbətindədir” kitabında Zahid Ələmpaşallının “Məhəbbət dastanı” və klassik aşıq poeziyası janrında son zamanlar qələmə aldığı şeirləri toplanmışdır.
Qəzənfər müəllimin aparıcılığı ilə baş tutan tədbirdə Kosalı kənd orta məktəbinin direktoru Xançoban Hacımahmudov, araşdırmaçı-yazar Mirzə Məmmədov, ustad Aşıq Bilal, Aşıq Maksim Muğanlı, Aşıq Elşad Əfəndiyev, Aşıq Məsim Rəcəbov və, eləcə də başqaları çıxış etdilər. Sonda alqış sədaları altında səhnəyə dəvət olunan şair Zahid Ələmpaşallı iştirakçılara və tədbirin keçirilməsində əməyi olanlara təşəkkür etdi.

“Borçalı” İctimai Cəmiyyətinin Mətbuat və İnformasiya Xidməti

Butov.az