“Borçalı” İctimai Cəmiyyətinin sədri Zəlimxan Məmmədli sentyabrın 8-də cəmiyyətin ofisində Ankara Orta Doğu Texniki Universitetinin professoru dr. Ayşegül Aydıngünün başçılıq etdiyi Türkiyədən gəlmiş alim qrupunu qəbul etdi. “Borçalı cəmiyyətinin fəalları ilə Türkiyəli alimlər arasında səmimi söhbətlər oldu. Qonaqlar arasında adıçəkilən universitetin araşdırmaçıları Serhat Keskin, Aytaç Yılmaz, Avrasiya İncələmələri Mərkəzinin araşdırmaçıları Hazel Çağan, Özge Nur Öğütücü, Aslan Yavuz Şir də iştirak edirdilər. Xanım Ayşegül Aydıngün səfərlərinin məqsədini Gürcüstandakı müsəlman azlıqların hüquqları, onların mədəni, siyasi, ictimai həyata qatılımına dair araşdırma layihəsi və kitab yazımı cərçivəsində olduğunu söylədi. Qonaqlar onları maraqlandıran sualları əsasən cəmiyyət sədrinə ünvanladılar. Zəlimxan Məmmədli Borçalı Türklərinin bugünkü ictimai, siyasi, mədəni, sosial durumu ilə bağlı qonaqların suallarını dolğun cavablandırdı. Qonaqlarla görüşdə cəmiyyətin fəalları akademik Telman Əliyev, Sabir Aşurov, Rüfət Muradlı, Salman Murğuzlu, Roman Namazov, Elbəyi Cəlaloğlu da iştirak edirdilər. Sonda Zəlimxan Məmmədli qonaqlara Elat bayramı münasibətilə hazırlanmış atributlardan ibarət hədiyyə çələngi təqdim etdi.
“Borçalı” Cəmiyyətinin Mətbuat və İnformasiya Mərkəzi

Butov.az