Butov.az GünAzTV-yə istinadən xəbər verir ki, İranın Həcc və Ziyarət Təşkilatının rəisi Səid Övhədi noyabrın 3-də jurnalistlərə açıqlamasında Mina hadisəsində itkin düşmüş iranlı zəvvarların taleyindən danışıb.
Səid Övhədi deyib ki, itkin düşmüş iranlı zəvvarlardan daha 5-inin kimliyi bəlli olub: “Həcc və Ziyarət Təşkilatının axtarış qrupunun səyi və Səudiyyə Ərəbistanının məsul şəxslərinin yardımı ilə itkin sayılan daha 5 zəvvarımızın kimliyini müəyyənləşdirmək mümkün olub. Məkkə morqlarında saxlanan bəzi meyitləri üzdən tanımaq mümkün olmadığına görə həmin 5 zəvvarın kimliyi, onlardan götürülmüş DNK nümunələri ilə müəyyən edilib.

Lakin təəssüflər olsun ki, bizim 28 zəvvarımız hələ də itkindir və onları axtarmaqla məşğuluq. Səudiyyə Ərəbistanı rəsmiləri də söz veriblər ki, itkin düşən digər zəvvarlarımız tapılmayana qədər morqlarda saxlanılan meyitləri dəfn etməyəcəklər. Bizim isə axtarışlarımız davam edəcək”.

Xatırladaq ki, sentyabrın 24-də həcc mərasimi zamanı, Minada yaranan izdihamda 4173 zəvvar həlak olub, mindən çox insan xəsarət alıb. Hadisə, zəvvarlar Minada Şeytana daş atarkən baş verib və yaranan sıxlıq nəticəsində minlərlə zəvvar əl-ayaq altında qalıb. Olayda ən azı 465 iranlı zəvvar həyatını itirib, 90 nəfəri xəsarət alıb . Hazırda 28 iranlı zəvvar hələ də itkin sayılır.