İranın dini lideri Seyid Əli Xamneyi fevralın 17-də Şərqi Azərbaycanın, o cümlədən də Təbrizin bir sıra əhalisi ilə görüşərək, qarşıdan gələn Üləma Məclisi seçkilərindən və “düşmən nüfuz”undan danışıb.

1978-ci ildə Təbrizin inqilaba gətirib çıxaran “29 Bəhmən Qiyamı”nın ildönümü ərəfəsində təbrizli ruhanilər, eləcə də “Sepah” və “Bəsic”in azərbaycanlı üzvləri ilə görüşən Xamneyi deyib ki, xarici düşmən seçkilərdə nüfuz etməyə çalışır: “Mən həqiqəti söyləməkdən yorulmayacağam. Mən millətin bilməsi lazım olan şeyləri danışacaq, onlarla bir araya qoyacağam. Bu gün, düşmən ictimai rəyi öz iyrənc hədəflərindən yayındırmaq istəyir. Onlar seçki və onun nəticələrinə nüfuz və təsir etməyə çalışırlar. Millət ayıq-sayıq olmalı, düşmənin istəyinin əksinə əməl etməlidir.
Bu gün, düşmənlə eyni mövqedən çıxış edərək Konstitusiyaya Nəzarət Şurasına qarşı çıxıb onu zəiflədənlər, nə etdiklərini bilmirlər. Mən heç kəsi xəyanətdə günahlandırmaq istəmirəm. Lakin bunu bilmək lazımdır ki, bu yalnız Konstitusiyaya Nəzarət Şurasının imicinə xələl gətirmək və onu etibardan salmaq yox, həm də seçkiləri, parlamenti və ölkə qanunvericiliyini etibardan salmaqdır. İctimai rəyin bilməsi üçün bunu demək mənim borcumdur.
Amerikalılar inqilabın əvvəlindən bu yana həmişə bir neçə əsas və mühüm quruma qarşı çıxıblar. Onlardan biri də Konstitusiyaya Nəzarət Şurasıdır. Onlar bu qurumun aradan qaldırılması ilə bağlı hədəflərinə çata bilmədiklərinə görə indi onun qəbul etdiyi qərarlara qarşı çıxır, ictimaiyyətdə onu gözdən salmağa çalışırlar. Bununla da onlar qarşıdan gələn seçkilərin, ölkə parlamentinin və onun qanunvericilik sisteminin qanunsuz və qeyri-legitim olduğu düşüncəsini millətə aşılamağa çalışırlar”.

Redaksiyadan: İllərlə farsa köləlik edib xalqın ana dilində danışma haqqını tanımayan, 35 milyonluq Cənubi azərbaycanlı soydaşlarımızın hüquqlarını hər addımda tapdalayan, işğal olunmuş Ağdam məscidində donuz saxlayan ermənilərlə hər cür iş birliyi yapan "müsəlman" hansı konstitusiyadan danışır?!