Cahangir Məmmədli,
BDU Yeni media və Kommunikasiya Nəzəriyyəsi kafedrasının müdiri, professor

“Bütöv Azərbaycan” qəzeti özünün peşəkarlıq keyfiyyəti, Vətənə bağlılığı ilə seçilən və BDU Jurnalistika fakültəsində rəğbətlə qarşılanan bir mətbuat nümunəsidir. Qəzetin yaradıcı kollektivi, Baş redaktoru Tamxil Ziyyəddinoğlu hələ tələbəlik illərindən “Azərbaycan”, “Vətən” anlayışlarını müqəddəs saymışlar. Jurnalistika fakültəsinin müəllimlərinin yaxşı yadındadır ki, fakültənin tələbəsi Tamxil və dostları Birinci Qarabağ müharibəsində könüllü olaraq cəbhəyə yollandılar. Onlardan şəhid olanları, yaralananları oldu. Həmin günləri xatırladıqca əmin oluram ki, başda Tamxil Ziyəddinoğlu olmaqla o tələbələrin o zamankı şücaəti 44 günlük Vətən müharibəsinə könüllü yollanan onlarca BDU tələbələri üçün bir məktəb rolu oynadı...
Tamxil Ziyəddinoğlu fakültəni bitirib istehsalata getdi, “Bütöv Azərbaycan”ı yaratdı, amma heç vaxt Jurnalistika fakültəsini unutmadı. Bu fakültənin tələbələrini özünə doğma bildi-indi Tamxil rəhbərlik etdiyi qəzetdə “Tələbə tribunası” rubrikası açmaqla yetişməkdə olan tələbə gənclərə bir daha öz sevgisini göstərir. Bütövlükdə Azərbaycan tələbələri və xüsusilə Jurnalistika fakültəsinin tələbələri üçün bu səhifə-rubrika yaradıcılıq stimulu olacaq. “Bütöv Azərbaycan”a təşəkkürlər, tələbələrimizə yaradıcılıq uğurları!
"Bütöv Azərbaycan" qəzeti
17 iyun 2021-ci il