11-04-2025, 16:45
Müştərinin kartından oğurluq edən administrator saxlanıldı
Restoranda müştərinin bank kartından oğurluq edən administrator saxlanılıb.
Hadisə Suraxanı rayonunda yerləşən restoranların birində qeydə alınıb. Restoranda yemək yeyən şəxs hesabı kartla ödəmək istədiyini bildirib. Restoranın administratoru isə onlarda post-terminalın olmadığını deyib və pulu yaxınlıqdakı bankomatdan çıxarmaq üçün müştəridən kartını ona verməsini istəyib. Müştəri isə maddi vəsaiti çıxarmaq üçün bank kartını və şifrəni administratora verib. Sonradan zərərçəkən kartından ödənişlə birlikdə ümumilikdə 1006 manatının çıxarıldığını aşkar edib.Zərərçəkənin şikayətindən sonra əməli törədən restoranın administratoru - 42 yaşlı G.Quliyev polis əməkdaşları tərəfindən saxlanılıb.
Araşdırma aparılır.
11-04-2025, 16:40
“Hava gəmisində silahın daşınması Qaydası” dəyişdi
Nazirlər Kabineti 30 dekabr 2014-cü il tarixli qərarı ilə təsdiq edilmiş “Hava gəmisində silahın daşınması Qaydası”nda dəyişiklik edib.
Bununla bağlı Baş nazir Əli Əsədov yeni qərar imzalayıb.
Dəyişikliyin mahiyyəti açıqlanmayıb.
11-04-2025, 16:25
Prezident və birinci xanım “Antalya Diplomatik Forumu”nun açılışında...
Aprelin 11-də Türkiyənin Antalya şəhərində “Antalya Diplomatik Forumu”nun açılış mərasimi keçirilib.
Azərbaycan Respublikasının Prezidenti İlham Əliyev və birinci xanım Mehriban Əliyeva tədbirdə iştirak ediblər.
11-04-2025, 16:13
Bizə çörək satılmırdı - Məhkəmə
Aprelin 11-də Bakı Hərbi Məhkəməsində davam etdirilən məhkəmə prosesində zərərçəkmiş şəxs Zemfira Abbasova ifadə verib və dövlət ittihamçılarının suallarını cavablandırıb.
Xankəndi şəhərində yaşamış Z.Abbasova “Miatsum hərəkatı” başlayandan sonra evdən çıxa bilmədiklərini bildirərək deyib: “Baxmayaraq ki, ermənilər üçün çox yaxşı şərait yaradılmışdı, təminatları var idi, amma onlar bizi təhqir edir, təzyiq göstərirdilər. Onlar evlərimizə daxil olub onu talayır, dağıdır, əmlaklarımızı məhv edir, xaç formasında kəsib-doğrayırdılar. Çölə çıxa bilmirdik, bizi daş-qalaq edirdilər. Hətta bizə çörək satılmırdı. Həmin vaxt dəmir yolu idarəsində işləyirdim. Bu idarəyə də daxil olub bizə qarşı müxtəlif qanunsuzluqlar edirdilər. Əsasən də “Türklər burada olmamalıdırlar, buradan çıxmalıdırlar”, “Türklər məhv olmalıdırlar” deyirdilər. Tələb edirdilər ki, türklər çıxsın, əvəzində isə ermənilər bizim evlərimizə məskunlaşsın”.
Xatırladaq ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.
11-04-2025, 16:04
Ermənistan-Türkiyə sərhədinin açılmasında irəliləyiş yoxdur - Kılıç
"Ermənistan-Türkiyə sərhədinin açılması məsələsində irəliləyiş yoxdur".
Bunu Türkiyənin Ermənistanla münasibətlərin normallaşdırılması üzrə xüsusi nümayəndəsi Serdar Kılıç RİA Novosti-nin sualını cavablandırarkən deyib.
Erməni tərəfi ilə növbəti danışıqların tarixinə gəlincə, Kılıç bəyan edib ki, Türkiyə tərəfi prosesi inkişaf etdirmək istəyir və Ermənistanla təmasdadır. Lakin danışıqlar üçün konkret tarixlər hələlik müəyyən edilməyib.
Qeyd edək ki, bu gün Antalyada keçirilən diplomatik forum çərçivəsində iki ölkənin xüsusi nümayəndələrinin görüşü baş tutub. Ermənistan nümayəndəsi, Milli Assambleyanın sədr müavini Ruben Rubinyanın qiymətləndirməsinə görə, görüş müsbət keçib.
Xatırladaq ki, 2022-ci ildə Ermənistan və Türkiyə nümayəndələri sərhədin üçüncü ölkə vətəndaşları və diplomatik pasport sahibləri üçün açılması barədə razılığa gəliblər, lakin siyasi qərarın olmaması səbəbindən sərhədlər indiyədək bağlı qalıb.
11-04-2025, 15:45
Ermənilər 39 günlük körpəmi qətlə yetirdilər - Zərərçəkmiş
Aprelin 11-də Bakı Hərbi Məhkəməsində davam etdirilən məhkəmə prosesində zərərçəkmiş Ramiz Adıgözəlov 39 günlük körpəsinin ermənilər tərəfindən qətlə yetirildiyini bildirib.
Qazax rayonunun Bağanıs Ayrım kəndinin sakini olan zərərçəkmiş hadisənin 1990-cı il martın 23-dən 24-nə keçən gecə baş verdiyini deyib.
Onun sözlərinə görə, xeyli sayda Ermənistan hərbçisi gəlmişdi. Əvvəlcə qadınlar evləri talan edirdilər, sonra da kişilər evləri yandırırdılar.
O, həmin gün 6 kənd sakininin və bir milis işçisinin yandırılaraq qətlə yetirildiyini qeyd edib.
Xatırladaq ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.
11-04-2025, 15:40
İmamoğlu hakim qarşısında - FOTO
Bu gün İstanbul Böyük Şəhər Bələdiyyəsinin sabiq sədri Əkrəm İmamoğlu Silivridə hakim qarşısına çıxarılıb.
Məhkəmə prosesi İmamoğlunun İstanbulun baş prokuroru Akın Gürlek və ailəsinə qarşı səsləndirdiyi ifadələrə görə “hədə” və “terrorizmlə mübarizə aparan şəxsləri hədəf göstərmə” ittihamları üzrə keçirilib.
Prosesdə İmamoğlunun həyat yoldaşı Dilek İmamoğlu, oğlu Selim İmamoğlu, millət vəkilləri də iştirak edib. Məhkəmə iyunun 16-na təxirə salınıb. Sözügedən ittiham üzrə İmamoğluna 7 il 4 aya qədər həbs tələb olunub.
Türkiyə mediasında İstanbulun sabiq merinin məhkəmə zalından görüntüsü də yayılıb.
Xatırladaq ki, martın 23-də Ə.İmamoğlu haqda İstanbul Böyük Şəhər Bələdiyyəsinə qarşı aparılan korrupsiya istintaqı çərçivəsində həbs qərarı verilib. Daha sonra, Türkiyə Daxili İşlər Nazirliyi merin vəzifəsindən uzaqlaşdırıldığını açıqlayıb. Bildirilib ki, qərar müvəqqəti xarakter daşıyır və istintaq müddətini əhatə edir.
11-04-2025, 14:09
Həsənrizə daha 20 ailə köçdü - FOTO
Ağdərə rayonunun Həsənriz kəndinə növbəti köç prosesi gerçəkləşib.Səhər saatlarında yola salınan ailələr doğma yurdlarına çatıblar.Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, köç karvanında yer alan 72 nəfərdən ibarət 20 ailəyə mənzillərin açarları təqdim edilib.Mərasimdə çıxış edən Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov bildirib ki, işğaldan azad edilmiş ərazilərə Böyük Qayıdışa dair I Dövlət Proqramı çərçivəsində Ağdərə rayonunun Həsənriz kəndinə bir müddətdir ki, mərhələli şəkildə köç davam edir. Bu gün də daxil olmaqla kəndə 70 ailə ( 238 nəfər ) köçürülüb.Aprel ayının sonunadək daha 40 ailə bura köç edəcək. Kənddə yenidənqurma, tikinti və bərpa işləri də gedir.Həsənriz kəndində bütün sosial və kommunal xidmətlər də yenidən qurulub. Kənd fasiləsiz olaraq elektrik enerjisi, içməli su və təbii qazla təmin olunub.
10-04-2025, 23:06
ABŞ Rusiya ilə İstanbulda razılığa gəldi - DETALLAR
Aprelin 10-da İstanbulda Rusiya və ABŞ nümayəndə heyətləri arasında məsləhətləşmələrin ikinci raundu keçirilib.
Hər iki tərəf görüşlə bağlı məlumat yayıb.
Tərəflər danışıqlar zamanı bir sıra vacib məsələləri müzakirə ediblər. ABŞ tərəfindən müsadirə olunmuş Rusiya diplomatik əmlakının qaytarılması, hava əlaqələrinin bərpası və diplomatların hərəkət rejiminin sadələşdirilməsi kimi məsələlər əsas müzakirə mövzuları olub.
ABŞ Dövlət Departamenti bildirib ki, hər iki tərəf qarşılıqlı missiyaların sabit bank xidmətləri ilə təmin olunması barədə razılığa gəlib. Bununla yanaşı, Vaşinqton Rusiyada ABŞ səfirliyində yerli işçilərin çalışmasına qoyulan qadağadan narahat olduğunu ifadə edib.
Danışıqların davamı üçün yaxın vaxtlarda yeni görüşün tarixi, məkanı və iştirakçı heyəti müəyyənləşdiriləcək.
Rusiya Xarici İşlər Nazirliyinin açıqlamasına görə, ABŞ və Rusiya konfiskasiya olunmuş diplomatik əmlakın qaytarılması üzrə “yol xəritəsi” hazırlanması barədə razılığa gəliblər. Moskva bu obyektlərə dəymiş ziyanın qiymətləndirilməsi üçün rusiyalı müfəttişlərin buraxılmasını tələb edib.
Vizaların rəsmiləşdirilməsi və diplomatların ev sahibi ölkədə hərəkəti ilə bağlı prosedurların sadələşdirilməsi də müzakirə olunan məsələlər arasında olub. Rusiya həmçinin qarşılıqlı etimadın artırılması üçün birbaşa hava əlaqələrinin bərpa edilməsini təklif edib.
10-04-2025, 22:24
Qərbdə heç vaxt demokratiya olmayıb
Qərb ölkələrində heç vaxt demokratiya mövcud olmayıb.
Bunu Belarus Prezidenti Aleksandr Lukaşenko “Mir” kanalına müsahibəsində deyib.
"Orada heç bir demokratiya yoxdur, sırf totalitarizmdir. Bizə isə özlərini tamam başqa cür təqdim edirdilər. Kameranı görüb nəsə dedilər, bəyanat verdilər vəssalam. Əsl siyasət isə başqadır: insanları sevmirlər, insanlara hörmət etmirlər. ‘Demokratiya’ – ‘demos’ xalq, ‘kratos’ isə hakimiyyət deməkdir. Bəs siz bu hakimiyyəti necə xalqın maraqlarına uyğun saxlayırsız?" – deyə Lukaşenko qeyd edib.
O, Moldovada muxtar Qaqauziya bölgəsinin rəhbəri Yevgeniya Qutsul və Fransada sağçı “Milli Birlik” partiyasının lideri Marin Le Penə qarşı aparılan cinayət təqiblərini də xatırladıb. Onun fikrincə, bu kimi hallar vətəndaşların seçki azadlığını məhdudlaşdırdığı üçün demokratiya prinsiplərinə ziddir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!