Tofiq Şəfayət oğlu Mehdiyev! Zəngilan tarixində xüsusi dəsti-xətti olan Vətən oğlu! Zəngilana gəlişi ilə yenilik gətirdi, Işgüzarlıq, qaynarlıq, yeni-yeni ideyalar! Çox operativ başladı işə.
Geniş layihələr hazırlayıb həyata keçirdi. Kooperativ təşkilatlar yaradıldı, xırda və iri sahibkarlıq məktəblərinin təməli qoyuldu, inkişaf etdirildi. Əhalinin maddi-rifah halının yüksəldilməsi, kənd təsərrüfatının təmərküzləşdirilməsi və inkişaf etdirilməsi, kənd təsərrüfatı məhsullarının yüksək səviyyədə satışı və təsərrüfatdaxili rentabelliyin yüksəldilməsi, qeyri-üzvi gübrələrdən asılılığı aradan qaldırıb, təbii üzvi minerallardan istifadəyə geniş yer verilməsi, şəhər və şəhərətrafı tikinti -abadlıq işlərinin aparılması, respublika tikiş fabriki və sənaye -tikinti müəssisələri filiallarının açılması, işlək hala gətirilməsi, inkişaf etdirilməsi və yeni yüksək standartlara cavab verən yolların çəkilməsi, şəhərarası avtobus marşrutu xətlərinin açılması, yeni-yeni ideyalar işlənib hazırlanması məhz Tofiq Mehdiyev adı ilə bağlıdır. Azərbaycan Kommunist Partiyası Mərkəzi Komitəsindən gəlmişdi. Işıqlı adam idi. Hamı və hər kəs haqqında yüksək fikirdə idi. Etimad göstərirdi, vəzifələrə təyin edirdi, yüksək dəyər verirdi, hər kəsi öz ixtiyarına buraxırdı. O zirvədə qala bilmək, əməli işi ilə etimadı doğrultmaq artıq o adamın özündən asılı idi. Müdaxilə etməzdi. Müstəqillik verirdi gənc kadrlara, sərbəst iş sərgiləmək üçün, eyni zamanda nəzarətsiz də qoymurdu. Əməli köməkliyin heç zaman əsirgəməzdi. Özündənrazı, dikbaş, qeyri-ciddi, dedi-qoducu, yaltaq, ikiüzlü, cəmiyyətdə idarə olunmayan insanları sevməz və onlara qarşı açıq və sərt mövqe nümayiş etdirərdi. Dünən etimad göstərdiyi kadr özünü doğrultmurdusa onu itirməmək üçün çox əmək sərf edirdi. Kadr seçiminə çox həssaslıqla yanaşırdı. Böyük bir məktəb idi. Bu fəaliyyət dövründə məni RKK-dən, RPK-nə dəvət etdi. Iki il birgə əmək fəaliyyətində olduq. Aşkarlıq və yenidənqurma, ictimai-siyasi fəallığın yüksəldilməsi,yeni ideya və amallar uğrunda mübarizə,mübarizə dalğasının genişləndirilməsi, 20 yanvar hadisələri zamanı etirazlar, 40 gün matəm bayraqları altında, qara kəlağayı başımızda, hüzn və matəm içərisində, gərgin və uzun sürən iş saatlarında işləmək, mitinq və küçə yürüşlərinin vüsət aldığı, partiya və komsomol biletlərindən kütləvi şəkildə imtina edildiyi zaman, elan olunmamış müharibə...Qara bulud və acınacaqlı mənzərələr bir çox ideyaların həyata keçməsinə əngəl yaradaraq T.Mehdiyev ideyalarının həyata keçirilməsinə ciddi şəkildə mane olurdu...Gərgin keçən əmək şəraitində həm də Ermənistanda yaşayan soydaşlarımızın kütləvi şəkildə deportasiya edilməsi çox ciddi fəsadlar yaratmışdır. Onların qəbul edilməsi, yerləşdirilməsi, vətəndaş etirazları biri-birinə qarışmışdı. Bütün bunlardan ən çox əziyyət çəkən rayon rəhbəri-Tofiq Mehdiyev idi. Şəxsi nüfuzundan istifadə edərək bu məsələlərin öhdəsindən gəlmək üçün fəda edirdi özünü. Belə çətin sınaq dövründə gənclərin inkişafı və təhsilinin davam etdirilməsi üçün lazımi işlər görmüş və o sınaq dövründə aparatın 3 gəncini təhsilinin davam etdirilməsi və idarəetmənin incəliklərini dərindən öyrənmək üçün Ali Partiya Məktəbinə göndərmişdi ki, o gənclərdən biri də mən idim. Tofiq Mehdiyev 1946--cı ildə Zəngilan rayonunda, Şəfayət Mehdiyev ailəsində dünyaya göz açmışdır. Şəfayət Mehdiyev uzun müddət RXDS icraiyyə komitəsində məsul vəzifələrdə işləmiş böyük hörmət və nüfuz sahibi idi. T.Mehdiyev 1964-cü ildə ilk əmək fəaliyyətinə Bakı şəhərində, Leytenant Şimidit adına zavodda fəhlə, elektro-energetik kimi başlamışdı.1965/1970-ci illərdə Azərbaycan Texniki Universitetinin elektro-texnika fakültəsini bitirmiş,1973/1976-cı illərdə Azərbaycan respublikası Kənd Təsərrüfatı Nazirliyində,1976/1980-ci illərdə Respublika Həmkarlar Təşkilatında,1982/1987-ci illərdə Azərbaycan Kommunist Partiyası Mərkəzi Komitəsində təlimatçı, Kənd təsərrüfatı şöbəsində katib köməkçisi və müdir müavini vəzifəsində çalışmışdır. 1987-ci ilin dekabrından,1991-ci ilin may ayına kimi Zəngilan rayon partiya komitəsinin birinci katibi, 1991-ci ilin may ayından 1992-ci ilin sentyabr ayına kimi respublika istehlak və büdcəyə nəzarət komitəsinə rəhbərlik etmişdir. Istehsal Kooperasiya sistemində yeni islahatlar həyata keçirmiş, ilk istehsal yönlü kiçik müəssisələr yaratmışdır. Xl-XII çağırış Azərbaycan respublikası Ali Sovetinin deputatı seçilmişdir. Deputat kimi bir sıra təkliflər vermiş, qərar qəbuletmədə fəal iştirak etmişdir. "Zəngəzur" Cəmiyyətləri İctimai Birliyinin təsisçisi və rəhbərlərindən biri olmuşdur. Bir sıra tarixi araşdırma və məqalələr müəllifidir. Yeni və maraqlı kitab üzərində işləyir. Ailəlidir, iki oğlu, dörd nəvəsi var. Həyat yoldaşı Şəfiqə xanım Bağırova-Mehdiyeva Texniki Universitetdə fizika üzrə fəlsəfə doktoru, fizika kafedrasında dosent kimi fəaliyyət göstərir. Böyük oğlu Cövdət Mehdiyev respublika Qida təhlükəsizliyi Agentliyində, digər oğlu Rüfət Mehdiyev isə Maliyyə Nazirliyində məsul vəzifələrdə çalışırlar. Nəvələrin biri Amerika Universitetlərinin birində tələbə, digərləri isə məktəblidirlər.T.Mehdiyev çətinliklərlə dolu uzun və şərəfli həyat yolu keçmişdir. Nümunəvi və örnək ola biləcək ömür yaşamış, təqaüdə çıxmışdır. Insanlarla xüsusilə Zəngilanlılarla sıx əlaqədədir. Diskussiya və müzakirələrə açıqdır. Yeniliyi və inkişafı dəstəkləyir. Dövlət və dövlətçiliyə sadiq eloğlumuzdur! Hər kəs kimi onun da yeganə arzusu ata-baba ocağına dönməkdir. Nəvələri ilə zəngin təbiəti və təbii sərvətləri olan torpaqlarımıza qayıtmaq, arzu kimi qalmış istəklərini onların əli ilə həyata keçirmək, quruculuq və abadlıq işlərində yaxından iştirak etmək, ömrünün qalan hissəsini öz doğma yurd yerlərində keçirmək niyyətindədir. Inanır və deyirki o gün mütləq gələcək.Ölkədə aparılan daxili və xarici siyasət bunu deməyə əsas verir. Arzu və istəklərinin həyata keçməsi diləklərimizlə o gün bu gün olsun inşallah! Ümidli sabahlara!!!

Maya Mətin