Onlar kimi deyiləm...

Sən, xahiş edirəm, ümid edib, girmə iblisanə baxışlarımın Tanrıdan iraq bucağına. Əgər ki, mənli xəyallara ortaq eləsən gələcək sənə bu vücudumu, aqibətiniz eynidir, bunu bil! Bəs sən nə istədin? Zamansız və qəsvətli dəryalara qucaq açan, sınıq qayıqla səyahət edib, ümid yerinin dənizdəki kəskin dişlərin ətinə yeridilib, ölümü gözləyən bir dəniz quldurundan yəni məndən. Niyə gəldin? ya batıb gedəcəkdim qara dənizin dibinə, ya da hiss edəcəkdim dostlarımın ülgüc dişlərinin soyuq təmasını bədənimdə. Qanım axacaqdı o qara dənizdə. suya qarışıb yox olacaqdı. Amma sən gəldin ey palçıq! Elə bildin məni şeytanlarımın əllərindən qurtarmağa gəlmisən? Nə oldu bəs sonra?

Gözləyirdin sakitcə varlığımın yavaş-yavaş qeybə çəkilməyini. Kaş gəlməzdin! Demişdim axı keçmə lüzumsuz baxışlarımın öldürücü, yönbilməz qarmağına. Məcbur deyildim sənə mən. Sən məcbur etdin özünü mənə. Sonrasını sən danışmayacaqsan, sonrası bax, mənəm! Jack Torransenin həba edib, atdığı pyes dolu kağızlar kimi tulladın məni, ey palçıq! Tanrının ən ali məhsulu sizmişsiniz, buna gülürəm. Sənmişsən xaliq olan yaradılmışların içində. Bir cüt kainatları daxilində himayə edən göz, küləkdə dalğalanmasına həsrət qaldığım torpaq rəngi saçlar. İnan ki, artıq bilmirəm. Sən ki bir palçıqsan, amma üstündən keçib getməyəcəm. Lənət olsun!... Narahat deyilsən məndən ötrü bilirəm. Özünü xəyal dünyama həbs edib, açarını alovun içinə atdın ki, səndən sonra çıxmayım ordan azadlığa?

Bilmirəm...

Xəyal dünyası demişdin sən bura. Yalançısan sən! Axı bura cəhənnəmdir. Qaytar məni qapqara dəryanın tam ortasında keçirdiyim o günlərə. Onlar - mənimlə paralel yaşayıb bədənimlə qidalanan, yanımdan heç ayrılmayan eybəcər "dostlarım" - deyirlər ki, sənsiz də olar.

İnanmazdım...

Amma deyəsən razılaşır sənsizliyə bu iztiraba ehtiras duyan yaralı vücud. Onlar var artıq. Sevəcəm onları. Dincəl artıq, insan ya da palçıq idin, deyəsən, hə? Ya unuduram ya da unutdurmaq üçün vuruşuram o tayda. Ya sənə mənsizliyi ərmağan edirəm ya da sən mənə mənsizliyi...


Əli Məmmədli
BDU Jurnalistika fakültəsinin tələbəsi