26-01-2022, 16:52
Azərbaycan Dövlət Akademik Milli Dram Teatrı (Azdrama) koronavirusa görə fəaliyyətini müvəqqəti dayandırıb.
Bu barədə teatr “Facebook” səhifəsində paylaşım edib.
Bildirilib ki, son günlər Akademik Milli Dram Teatrının əməkdaşları arasında COVID-19 infeksiyasına yoluxma hallarının artması ilə əlaqədar qabaqlayıcı-profilaktik tədbirlərin görülməsi qərarı alınıb:
“Yanvar ayının 23-dən fevral ayının 7-dək teatrın öz iş fəaliyyətini müvəqqəti olaraq dayandırması haqqında qərar qəbul olunub.
Qeyd olunan tarixlərə təyin edilmiş tamaşa nümayişləri və məşqlər təxirə salınıb, teatrın inzibati binasına giriş-çıxış fevralın 7-dək məhdudlaşdırılıb.
Həmin tarixlərdə nəzərdə tutulan tamaşalar fevralın 7-dən etibarən nümayiş olunacaq”.
Bütöv.az
26-01-2022, 16:38
Dünya bazarında "Azeri Light" (CIF) markalı neftin qiyməti artıb.
Bütöv.az xəbər verir ki, Azərbaycan neftinin 1 barelə olan qiyməti 2,06 ABŞ dolları və ya 2,3% artaraq 91,16 dollar təşkil edib.
26-01-2022, 16:32
Azərbaycanda çörək və unun qiymətinin artması ilə bağlı Dövlət Xidmətinə 36 müraciət daxil olub, müraciətlərə qanunamüvafiq qaydada baxılması təmin edilir.
Bu barədə Oxu.Az-ın sorğusuna əsasən, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindən məlumat verilib.
Dövlət Xidmətindən bildirilib ki, COVID-19 pandemiyası ilə əlaqədar dünya iqtisadiyyatında yaranan qeyri-müəyyənliklər, təchizat zəncirlərinə mütəmadi təzyiqlər, ölkələrin tələbdən artıq ehtiyat yaratmaları, müxtəlif ekoloji faktorlar, 2021-ci il ərzində dünya bazarlarında ərzaqlıq buğdaya tələbin artması və buğda istehsalçısı olan ölkələrin daxili bazarı qorumaq məqsədilə həyata keçirdiyi qoruyucu tədbirlər fonunda ərzaqlıq buğdanın qiyməti kəskin artıb. Əlavə edilib ki, ən böyük ərzaqlıq buğda istehsalçılarından biri və Azərbaycana idxal edilən buğdanın əsas mənbə ölkəsi olan Rusiya Federasiyasının 2021-ci ilin fevral ayından yüksək ixrac rüsumları tətbiq etməsi idxal olunun ərzaqlıq buğdanın qiymətində kəskin bahalaşmaya gətib çıxarıb.
Qeyd edilib ki, Azərbaycanda ərzaqlıq buğdanın, unun və çörəyin qiyməti tənzimlənən tariflər əsasında deyil, bazar iqtisadiyyatı prinsiplərinə uyğun olaraq tələb-təklif əsasında formalaşır:
“2021-ci il ərzində ərzaqlıq buğdanın dünya üzrə kəskin bahalaşmasının Azərbaycana mənfi təsirlərinin azaldılması məqsədi ilə fevral ayından dekabrın sonunadək hökumət tərəfindən ayrılmış böyük həcmdə subsidiyalar hesabına buğda və unun qiymətlərinin real qiymətlərdən aşağı saxlanılması təmin olunub. Bu məqsədlə Vergi Məcəlləsinə edilmiş dəyişikliyə əsasən, 1 yanvar 2024-cü il tarixinədək buğdanın idxalı və satışı, buğda ununun və çörəyin istehsalı və satışı ƏDV-dən azad edilib. Ərzaqlıq buğda və un ixracının qarşısının alınması üçün Nazirlər Kabinetinin müvafiq Qərarı ilə 1 may 2022-ci il tarixinədək ərzaqlıq buğdanın və unun ixracına 1 ton üçün 200 ABŞ dolları rüsum müəyyən edilib.
Qeyd etdiyimiz kimi, ölkədə satılan unun və çörəyin qiyməti ərzaqlıq buğdanın hazırkı idxal qiymətinə uyğun olaraq, bazar prinsipləri əsasında yenidən formalaşır. Mövcud qiymət dalğalanması şəraitində ənənəvi (dairəvi) çörəyin qiymətində və çəkisində, unun və digər çörək növlərinin isə qiymətində əsassız dəyişikliyin qarşısının alınması, qiymət formalaşması zamanı antiinhisar qanunvericiliyinə riayət olunması məqsədilə istehlak bazarında mütəmadi monitorinqlər aparılır. Monitorinqlər zamanı qanunvericiliyin pozulması əlamətləri aşkar olduğu təqdirdə Dövlət Xidməti tərəfindən ciddi tədbirlər görüləcək”.
Bütöv.az
26-01-2022, 16:26
Yanvarın 26-da İran İslam Respublikasının Prezidenti Seyid İbrahim Rəisi bu ölkədə rəsmi səfərdə olan Azərbaycan Respublikasının müdafiə naziri general-polkovnik Zakir Həsənovun rəhbərlik etdiyi nümayəndə heyətini qəbul edib. İran Prezidenti Seyid İbrahim Rəisi xalqlarımızın əsrlər boyu mehriban qonşuluq şəraitində yaşadığını, Azərbaycan-İran ikitərəfli münasibətlərinin bütün sahələrdə uğurla inkişaf etdiyini bildirib.
Ölkələrimiz arasında əlaqələrin genişləndirilməsi baxımından qarşılıqlı səfərlərin önəmini vurğulayan İran İslam Respublikasının Prezidenti dostluq və qardaşlıq münasibətlərinin qarşıdakı illərdə də uğurla inkişaf edəcəyinə əminliyini ifadə edib.
Qonaqpərvərliyə görə minnətdarlığını bildirən general-polkovnik Z.Həsənov Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin salamlarını Prezident Seyid İbrahim Rəisiyə çatdırıb. Vətən müharibəsində qələbəmizdən sonra azad edilmiş ərazilərimizdə görülən işlər barədə məlumat verib.
Görüşdə ölkələrimiz arasında ikitərəfli dostluq münasibətlərinin müxtəlif istiqamətlərdə, o cümlədən hərbi əməkdaşlıq sahəsində inkişafından məmnunluq ifadə olunub, qarşılıqlı maraq doğuran digər məsələlərlə bağlı fikir mübadiləsi aparılıb.
Bütöv.az
26-01-2022, 13:58
Azərbaycan təhsilində son illər ciddi islahatlar, struktur və kadr dəyişiklikləri aparılsa da bu sahədə təəssüflər olsun ki, hələ də ciddi problemlər qalmaqdadır. Təhsil sesitemini xərçəng kimi sarmış korrupsiya elementləri, nizam-intizamsızlıq hökumətin apardığı strateji siyasətə zidd olaraq bəzi müəssisələrdə tüğyan etməkdədir. Əfsuslar olsun ki, belə neqativ hallar daha çox əyalətlərdə, xüsusən də məcburi köçkün olan rayonlara aid təhsil ocaqlarında geniş yayılıb.
Bütöv.az AzFakt.com-a istinadən xəbər verir ki, korrupsiyanın inkişaf etdiyi təhsil müəssisələrindən biri də Laçın rayon Təhsil idarəsinin nəzdində fəaliyyət gösətərən İ.İ.Quliyev adına Fingə kənd tam orta məktəbidir.
2014-cü ildə o zamankı Təhsil naziri Mikayıl Cabbarovun “Fərdi təhsilin təşkili haqqında Qaydalar”ın təsdiqi barədə imzaladığı 645 saylı əmrdən Laçın rayon Təhsil Şöbəsində öz məqsədləri üçün yararlanan qrup mövcuddur.
Belə ki, Laçın rayon Təhsil Şöbəsinin müdiri Nicat Həsənovla rayonun Fingə kənd tam orta məktəbinin direktoru Habil Abduləzimov "fərdi təhsil bazarı" yaradıblar.
Məlumata görə hazırda İ.İ.Quliyev adına Fingə kənd tam orta məktəbində saxta olaraq 40-dan artıq şagird təhsil alır.
Maraqlıdır ki, bu şagirdlərin fərdi təhsil almaqları üşün tələb edilən tibbi arayışlar isə qonşu rayonlardan alınıb.
Məktəbdə rəsmi sənədlər üzrə təhsil alan 40-dan artıq şagird üçün isə fövlət büdcəsindən hər ay ayrılan külli-miqdarda vəsaitlər isə rəhbərlik tərəfindən mənimsənilir.
Laçın rayon Təhsil Şöbəsinin müdiri ilə Fingə kənd tam orta məktəbinin direktoru Habil Abduləzimovun təhsildə açdıqları "bazar" fərdi təhsillə bağlı etdikləri maxinasiya ilə yekunlaşmır.
Şöbə müdiri ilə mktəb direktorunun digər "proyektləri" dərnəklərlə bağlıdır. Burada da ciddi yeyintilərin olduğu iddia edilir.
Qeyd edək ki, Nicat Həsənob 2016-cı ildən Laçın rayon Təhsil şöbəsinin müdiridir.
26-01-2022, 13:49
2021-ci ildə Azərbaycanda 3 nazir müavini vəzifəsindən azad olunub. Bunlarda ikisi Gənclər və İdman Nazirliyinin, biri isə Xarici İşlər Nazirliyinin payına düşüb.
Bütöv.az Bizim.Media-ya istinadla xəbər verir ki, ötən il nazir müavinlərindən vəzifədən ilk azad olunan şəxs Xarici işlər nazirinin müavini Ramiz Həsənov olub. Belə ki, aprelin 29-da Prezident İlham Əliyevin sərəncamı ilə vəzifəsindən azad olunub.
O, XİN-dən öncə 2008-2018-ci illər aralığında Standartlaşdırma, Metereologiya və Patent üzrə Dövlət Komitəsinə rəhbərlik edib.
Qeyd edək ki, Ramiz Həsənov hal-hazırda Azərbaycanın İspaniyadakı səfiri kimi fəaliyyət göstərir.
2021-ci ildə vəzifəsini itirən növbəti nazir müavinləri isə eyni taleyi, eyni gündə yaşayıblar. Belə ki, Gənclər və İdman Nazirinin müavinləri İsmayıl İsmayılov və İntiqam Babayev noyabrın 29-da Prezidentin müvafiq sərəncamları ilə vəzifələrindən azad olunublar.
İntiqam Babayev mərhum nazir Azad Rəhimovun vəfatından sonra onun vəzifələrini icra edirdi.
İntiqam Babayevin istefasından sonra, mətbuat tərəfindən aparılan araşdıramalarda, eks nazir müavinin ayrı-ayrı vaxtlarda tenderlər çərçivəsində qanunsuzluqlara yol verdiyi ilə bağlı məlumatlar qeyd olunub. Belə ki, onun müxətlif yollarla dövlət vəsaitlərini taladığı, gənclər üçün ayrılan dövlət mükafatlarını layiq olmayan şəxslərə təqdim etdiyi bildirilir.
İntiqam Babayevin hal-hazırda hansı işlə məşğul olduğunu öyrənmək üçün onunla əlaqə saxlamağa çalışsaq da, eks nazir müavini zənglərimizə cavab verməyib.
İntiqam Babayevlə eyni gündə vəzifəsini itirən İsmayıl İsmayılovun haqqında da xoşagəlməz iddialar səsləndirilib. Sabiq nazir müavinin oğlu Elvin İsmayılovun böyük biznes şəbəkəsini idarə etdiyi əsas iddialar arasındadır. Belə ki, Elvin İsmayılov haqqında araşdırma aparan jurnalist Cavanşir Həsənli onun “Qəbələ Atçılıq klubu” MMC-yə rəhbərlik etdiyini qeyd edib.
Keçmiş nazir müavinin oğlunun “Gilan İnşaat” MMC-nin qanuni təmsilçisi olduğu, “Qəbələ Sport Store”a rəhbərlik etdiyi də həmin araşdırmada öz əksini tapmayıb.
Lakin İsmayıl İsmayılovun da hal-hazırda hansı fəaliyyətlə məşğul olduğunu öyrənə bilmədik. Belə ki, o da İntiqam Babayev kimi zəngələrimizə cavab verməyib.
2021-ci ildə müavinlik statusu ilə vidalaşan məmurlardan biri də təhsil nazirinin müavini Məhəbbət Vəliyeva olub. O, 2018-ci ilin iyunun 27-də təhsil nazirinin müavini vəzifəsinə təyin edilmişdi. Daha sonra M. Vəliyevanın hicab taxdığına görə nazirlikdəki vəzifəsindən uzaqlaşdırıldığı haqda iddialar yayılıb. Amma nazirliyin rəsmi məlumatında buna dair xəbər təkzib edilib və Vəliyevanın səhhəti ilə əlaqədar öz vəzifəsindən getdiyi bildirilib.
Əldə etdiyimiz məlumata görə, hazırda Məhəbbət Vəliyeva dünyagirlikdən uzaqlaşaraq bağ evində yaşayır və ibadətlə məşğuldur.
26-01-2022, 13:47
Bir neçə gün bundan öncə bir qrup Yasamal rayon sakini İnşaat Konstruksiyaları MMC tərəfindən illərdir evsiz-eşiksiz qalmaları və sökülən evlərinin qarşılığında tikinti şirkəti tərəfindən bu günə kimi mənzillə təmin olunmamaları ilə bağlı ölkə mətbuatına müraciət etmişdi. Həmçinin tikinti şirkəti tərəfindən hüquqlarının pozulması və evlərinin vaxtında verilməməsi ilə bağlı etiraz aksiyası keçirərək, pozulmuş hüquqlarının bərpası ilə əlaqədar olaraq ölkə rəhbərliyinə müraciət etmişdilər. Vətəndaşlar müraciətlərində qeyd edirdilər ki, tikinti şirkəti bina sakinlərə qarşı laqeyd münasibət bəsləyərək, mənzillərin təmirini gecikdirir və illərdir süründürməçiliyə məruz qoyur.
Bundan başqa sakinlər qeyd edirdi ki, bina hələ də bu günə kimi elektrik enerjisi həmçinin su anbarı ilə təmin olunmayıb. Etiraz aksiyası zamanı sakinlər bildirirdilər ki, binada heç bir təmir işləri həmçinin mənzillərdə bölgülər və blokların pilləkənlərində mərmərlər döşənməyib. Məsələ ilə əlaqədar olaraq, vətəndaşların şikayətini yerində araşdırmaq məqsədi ilə tikinti gedən ərazidə etirazçıların fikirlərini öyrənməyə çalışdıq. Bina sakinləri tərəfindən səsləndirilən ittihamlara cavab olaraq, şirkətin baş mühəndisi Elçin Əsədov açıqlama verərək, tikintinin 2022-ci ilin dekabr ayında bitərək dövlətə təhvil veriləcəyini qeyd etdi.
Şirkət rəsmisi açıqlamasında tikintinin başa çatdırılmasında gecikmənin əsas səbəbinin pandemiya dövrü və maliyyə sıxıntısı ilə əlaqələndirdi. Digər səsləndirilən ittihamlara cavab olaraq qeyd etdi ki, bina elektrik enerjisi ilə tam təmin olunub, enerji bloku quraşdırılıb və su anbarı tikilib. Bundan başqa mənzillərdə bölgü işləri aparılıb və binanın blokları ağardılaraq, mərmərlərlə döşənilib.
Ərazidən köçürülən sakinlərin kirayə haqları vaxtı-vaxtında şirkət tərəfindən ödənilib. Sakinlər tərəfindən səsləndirilən ittihamların əsassız olduğunu bildirən Elçin Əsədov, şirkətin işgüzar nüfuzuna xələl gətirməyə çalışan bir qrup şəxslərin dediklərinin həqiqətə uyğun olmadığını xüsusilə vurğuladı.
(AZƏRBAYCANREALLIĞI.COM)
Bütöv.az
26-01-2022, 13:42
“Prezident Armen Sarkisyanın istefasından sonra hökumət üzvləri çılğınlıq içindədirlər, kimin prezidentliyə namizədliyini irəli sürəcəklərinə qərar verə bilmirlər. Baxmayaraq ki, hakim “Mülki müqavilə” partiyası çoxdan istəyirdi ki, prezident bu siyasi təşkilatdan olsun, yəni Armen Sarkisyandan qurtulsunlar. Amma yeni prezidentin təyinatı məsələsinin onlar üçün böyük problem olacağını təsəvvür etmirdilər”.
Bu fikirləri Ermənistanda çıxan “Joğovurd” qəzeti yazıb. Qəzet qeyd edir ki, indi həm hakim partiya, həm də eyni adlı parlament çoxluğu baş nazir Nikol Paşinyanın iştirak edəcəyi növbəti iclası gözləyir. Verilən məlumata görə, hökumətin Dilicanda təxirə salınan iclası yəqin ki, bu həftəsonu baş tutacaq. Yalnız bundan sonra hakim partiyanın prezidentliyə namizədinin kim olduğu bilinəcək.
“Məsələ burasındadır ki, Paşinyan prezidentliyə namizədi şəxsən seçib onu komanda yoldaşlarına təqdim edəcək və yəqin ki, partiya üzvləri namizəd seçiminə nə etiraz edəcək, nə də bu barədə müzakirə aparacaq”, - qəzet yazır.
Hakimiyyət mətbuatında bir neçə prezidentliyə namizədin adı nəzərdən keçirilsə də, Paşinyanın son anda öz komandasından birini prezident postuna gətirəcəyi istisna olunmur. Nikol Paşinyan son mətbuat konfransı zamanı yeni prezidentin hökumət və parlament çoxluğu, “Mülki müqavilə” partiyası ilə ahəngdar işləməli olduğunu vurğulayıb. O xatırladıb ki, hələ ötən il Baş Qərargah rəisi Onik Qasparyan baş
nazirin istefasını tələb edərkən Armen Sarkisyan onun vəzifədən azad edilməsi haqqında fərmanı imzalamaq istəmirdi.
“Həmin harmoniyanın olmaması səbəbindən bizim çox ciddi çətinliklərimiz var idi, bəlkə də o anda hətta onların dərinliyini qeyd etməmişdik. Xüsusən də Baş Qərargahın ötən il məşhur bəyanatı kontekstində bu, ümumiyyətlə, hökumətin problemi deyildi, bu, icra hakimiyyətinin problemi deyildi, mənim qiymətləndirməm odur ki, biz o zaman dövlətçiliyi itirmək ərəfəsində idik”, -Paşinyan bildirib.
A.Qorxmaz
Bütöv.az
26-01-2022, 13:01
Rusiya hesab edir ki, "3+3" formatı regionda iqtisadi əlaqələrin və etimadın inkişaf etdirilməsinə töhfə verəcək.
Bunu Rusiyanın Azərbaycandakı səfiri Mixail Boçarnikov mətbuat konfransında deyib. Səfir ötən il çox şey vəd edən "3+3" formatının işə salındığını xatırladıb. Onun sözlərinə görə, burada əsas maraq regionda vəziyyəti sabitləşdirmək və kommunikasiya əlaqələrini bərpa etməkdir. O bildirib ki, "3+3" formatında iştirak üçün qapı daim Gürcüstanın üzünə açıqdır.
M.Boçarnikov bu format çərçivəsində növbəti görüşün harada keçiriləcəyi ilə bağlı məlumata malik olmadığını söyləyib.
Bütöv.az
26-01-2022, 12:59
Yanvarın 23-də axşam saatlarında Ermənistan Prezidenti Armen Sarkisyan vəzifəsindən istefa verib. O, qərarını Prezident postunun Ermənistanın daxili və xarici siyasətinə təsir alətlərinin olmaması ilə izah edib. Sarksiyanın gözlənilməz istefası ilə bağlı müxtəlif versiyalar irəli sürülür, hesab olunur ki, erməni prezident baş nazir Nikol Paşinyanın təzyiqlərindən qurtulmaq üçün istefaya getməyə məcbur olub. Digər iddiaya görə, o siyasi meydandan uzaqlaşaraq biznes fəaliyyətini davam etdirmək məqsədilə siyasi rəhbərlikdən gedir. Bəs, Rusiyada Armen Sarkisyanın istefası barədə nə düşünürlər?
Rusiya siyasi və İqtisadi Kommunikasiyalar Agentliyinin aparıcı analitiki, tanınmış politoloq Mixail Neyjmakov açıqlamasında bildirib ki, A.Sarkisyanı istefaya sövq edən məsələlər əvvəlcədən planlaşdırılıb:
“Ermənistan Prezidenti Armen Sarkisyan xarici siyasət işində, xüsusən də Ermənistana xarici sərmayələrin cəlb edilməsi məsələlərində fəal iştirak edib. Amma Armen Sarkisyanı istefaya sövq edən məsələlər əvvəlcədən planlaşdırılıb. Bununla bağlı ən azı iki versiya var.
Birincisi budur ki, Nikol Paşinyanın komandası prezidenti dəyişməkdə maraqlı ola bilər. İkinci məsələ isə Armen Sarkisyanın özünün rəsmi İrəvanın yaxın vaxtlarda qəbul edəcəyi müəyyən qərarlarla əlaqələndirilmək istəməməsi ola bilər. Birinci versiyanı Sarkisyanın bəyanatındakı bəzi tezislərlə göstərmək olar ki, bu da ona təzyiq eyhamları kimi başa düşülür. Məsələn, “prezidentin imkanları müxtəlif siyasi qruplar tərəfindən onlar üçün təhlükə kimi qəbul edilir” ifadəsi hər şeyi sübut edir. Bundan əlavə, əgər Armen Sarkisyanın Ermənistandan kənarda olması ilə bağlı xəbərlər
həqiqətən də təsdiqlənərsə, (bunu ölkə parlamentinin deputatı qeyd edib-red) bu o, deməkdir ki, prezidentin Ermənistanın hüdudlarından kənarda qalması istəyi var”.
Rusiyalı politoloq, həmçinin qeyd edib ki, baş nazir Nikol Paşinyanın komandası üçün ölkədə etiraz fəallığının hələ nəzərəçarpacaq dərəcədə artmadığı indiki mərhələdə prezident dəyişikliyinə nail olmaq həqiqətən də faydalı oldu.
“Düzdür, Ermənistan prezidenti ümumxalq seçkilərində deyil, Milli Məclis tərəfindən seçilir, hətta onun səlahiyyətləri çox məhduddur. Lakin biz başqa ölkələrin təcrübəsindən bilirik ki, siyasi fəallığın yüksəliş mərhələsində hətta hakimiyyətin nüfuzlu olmayan şəxslərinə qarşı hərəkətlər etirazların artmasına səbəb ola bilər. Bu mənada Ermənistanın hazırkı baş naziri və onun komandası üçün ölkədə vəziyyətin nisbətən sakit olduğu bir vaxtda prezident dəyişikliyinə nail olmaq obyektiv baxımdan faydalıdır. Digər tərəfdən, Armen Sarkisyanın istefası yaxın aylarda veriləcək müəyyən qərarlardan uzaqlaşmaq niyyəti ola bilər.
Xatırladaq ki, 2020-ci ilin noyabrında o, üçtərəfli atəşkəs bəyanatını mətbuatdan öyrəndiyini qeyd etmişdi. Unutmayaq ki, Ermənistan Konstitusiyasının 132-ci maddəsinə uyğun olaraq, məhz prezident (hökumətin təklifi ilə də olsa) beynəlxalq müqavilələr bağlaya bilər. Bəlkə də o, belə sənədlərdən biri ilə bağlı uzaqlaşmaq istəyib. Həmçinin, istisna etmək olmaz ki, Ermənistanın səlahiyyət müddəti başa çatan prezidenti İrəvanla Moskva arasında gələcəkdə əldə oluna biləcək hər hansı razılaşmada rol almaq istəməyib.
Hər halda qeyd edək ki, Armen Sarkisyan həm istefa ilə bağlı açıqladığı bəyanatda, həm də “Sky News Arabia” telekanalına müsahibəsində İrəvan üçün mühüm qərarlar qəbul edərkən erməni diasporunun rolunun nəzərə alınmasının vacibliyini vurğulayıb. Ola bilsin ki, o, vəzifədən gedəndən sonra gələcəyini diasporadakı nüfuzlu şəxslərlə qarşılıqlı əlaqə ilə bağlayır. Həmçinin, onun istefası ərəfəsində aktiv xarici siyasət fəaliyyətini nəzərə alsaq, böyük ehtimalla biz onun vəzifədən getdikdən sonra da ictimai fəaliyyətini müşahidə edəcəyik. Digər bir məsələ də səhhətində problemin olmasıdır”, - deyə rusiyalı politoloq Armen Sarkisyanın istefası ilə bağlı prosesləri şərh edib.
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!