Yusif Dirilinin 60 yaşına
Ürəyinizdə Günəş olsun!
Dostum, Azərbaycan aydını Yusif Dirilini 30 ilə yaxındır tanıyıram.
Xaraktercə sakit, cəmiyyətdən ayrıca iddiası olmayan, minimal dolanışıqla yetərlənən, Yurd duyğusuyla yaşayan, doğulduğu Yurdu qutsallaşdırmağı bacaran, Bütöv Azərbaycan sevdalı Yusif Dirili...

Onun şairliyi dərd çağırır, dərdiylə baş-başa qalmağı bacarır, dərdə yenilmir, dərdindən güc alır – dərdini yenmək üçün.
Yazı dili aydın olduğu dərəcədə şeir dili də aydındır.
Yurd itkisini sözlə çatdırmaq alınmayanda sazla deyir. Sazı – bayatılarıdır.
***
Publisistikasında İnsan, Yurd, Doğa (təbiət) gözəlliklərini ardıcıl qabartmasını gördüm.
Pisi görməyə nə var ki? Yaxşını görüb yazmaq insandan ərdəmlik istəyir.
Yusif Dirili doğma müşahidəçiliyini aydın dillə ona görə çatdıra bilir ki, insanlara inanır.
Əlbəttə, onun da inanıb yanıldıqları az olmayıb.
Belədə insana ruhsallıq ərdəmliyi köməyə gəlir.
İnam Ata (Asif Ata) demişkən, İnsanda yanılıb İnsanlığa inanırsan, inamında ard edirsən...
***
Yusif Dirilinin minimalla yetərlənməyindən danışdım.
İllərdir hər həftə Qobustan rayonunun Dərəkəndinə gedir orta məktəb şagirdlərinə dərs demək üçün.
Usanmır, yorulmur həm də.
İçində öyrətmənlik sevgisi olmasaydı, illəri yormazdı o yollarda.
***
Yusif Dirili həm də fitri ailəçidir.
Anadangəlmə halallığa, ulusal qeyrətə köklənmiş bir türk kişisinin bu yöndə fədakarlığını doğal sayıram.
***
Onun ayrıca olaraq İnam Atayla (Asif Atayla) ruhsal təmaslarını (müsahibələrini), ümumən bu yöndəki yazılarını yüksək dəyərləndirirəm.
Azərbaycanda yaranan Ulusal-Bəşəri İnamın – Mütləqə İnamın soraqlarının yayılması üçün çaba göstərəsən, bunu ulusal-mənəvi borc sayasan, nəfəs ölçüsündə gərəkliyini əsaslandırasan; bu cür mətanətli xarakterin yiyəsidir Yusif Dirili.
***
Əzizim Yusif qardaş!
Bitməyən, sınırsız İnsanlıq Dünyanızda daha da ruhlu, ümidli olmağınızı diləyirəm.
İnsançı, gözəl əməllərimizlə dünyamızı ölməz, ümid qaynağı etmək imkanımz var – mənəvi borcumuz olaraq.
Bu yaşa əliboş gəlməmisiniz.
60 yaşınız qutlu olsun!