Sentyabrın 14-də Salyandakı Türk Şəhidliyində rayonun bir qrup ziyalısı və siyasi partiya təmsilçiləri Anadolu əsgərinin xatirəsini anıblar. Ziyarətçilər 1918-ci ildə Qafqaz İslam Ordusunun Azərbaycana köməyi və Anadolu türkünə olan vəfa borcu haqda fikirlərini də bölüşüblər.

Giriş sözü ilə çıxış edən Ümid Partiyasının sədr müavini Rüfət Muradlı Nuru Paşanın rəhbərliyi ilə Azərbaycana qardaş köməyinə gələn Anadolu əsgərinin qarşısında Azərbaycan türklərinin hər zaman vəfa borcunun olmasına işarə edərək həmin ordunun bir bölüyünün Ramazan Paşanın başçılığı ilə Salyanı azad etməsi haqda ziyarətçilərə məlumat verib. Daha sonra bu unudulmaz hadisə haqda tarix müəllimi Bikəxanım Əhmədova çıxış edib.


Borçalı Cəmiyyətinin sədri Zəlimxan Məmmədli isə öz çıxışında Salyanın Türk Dünyası üçün önəminə işarə edərək Anadolu əsgərinə sayğının vacib olmasını vurğulayıb. Salyan ruhanilərindən Hacı Mirəşrəf və Hacı Səlim 1918-ci ildə Salyan uğrunda gedən döyüşlərdə Salyan ruhanilərinin Türk qoşunu ilə çiyin-çiyinə daşnak bolşevik birləşmələrinə qarşı qəhrəmanlıqlarından bəhs edərək şəhidlərin ruhuna fatihə oxuyublar.

Müsavat Partiyasının məclis üzvləri Valeh Hümmətoğlu və Mirzağa Axundun Qafqaz İslam Ordusu əsgərlərinin qəhrəmanlıqları haqda çıxışları da diqqətlə qarşılanıb.

Ziyarətdə həmçinin Azərbaycan Milli İstiqlal və Klassik Xalq Cəbhəsi Partiyalarının təmsilçiləri də iştirak ediblər.

Ziyarət iştirakçıları sonra Türkçülük düşüncəsinin banisi Əli bəy Hüseynzadənin Salyanın mərkəzindəki adidəsini də ziyarət ediblər.