“Azərbaycandan Moskvaya sərnişin daşıyan mikroavtobus bu gün 4:30 radələrində qəzaya uğrayıb. Səhər saat 6:00-da Rusiya Daxili İşlər Nazirliyindən mənə zəng edilib. Mən də qubernatorla görüşərək qəza barədə ona məruzə etmişəm. Qəza baş verən yerdə 12 nümayəndəm iştirak edib. Azərbaycandan Moskvaya sərnişin aparan “Mercedes Vito” markalı mikroavtobusun içində 11 sərnişin olub. 6 nəfər dünyasını dəyişib. Qalanları isə yaralanıb”.
Butov.az xəbər verir ki, bunu Modern.az-a açıqlamasında Stavropol vilayəti üzrə “Azərbaycan Milli Mədəniyyət Mərkəzi Odlar yurdu” təşkilatının sədri Fəxrəddin Yanıyev deyib.
Onun sözlərinə görə, yaralılara ciddi dövlət dəstəyi var.
“Qubernator Səhiyyə Nazirliyinə ciddi tapşırıq verib. Hazırda araşdırma aparılır. Azərbaycan Diaspor Komitəsinə, Rusiyadakı səfirliyə hadisə barədə məlumat verilib”
Fəxrəddin Yanıyev dünyasını dəyişənlərin Azərbaycana gətirilməsindən də danışıb.
“Dünyasını dəyişənlərin və yaralıların bəzilərinin qohumları tapılıb. Dünyasını dəyişənlərin meyitlərinin Azərbaycana aparılması istiqamətində işlər davam edir”
Fəxrəddin Yanıyev azərbaycanlı sərnişinlərin şəxsiyyətinin müəyyənləşdiyi barədə də məlumat verib. Həlak olanlar aşağıdakı şəxslərdir:

- 1975-ci il təvəllüdlü Həsənov Rəsul Ənvər oğlu

- 1983-cü il təvəllüdlü İsmayılov Şəmsi Tanrıverdi oğlu

- 1962-ci il təvəllüdlü Əhmədov Namiq Tohid oğlu

- 1969-cu il təvəllüdlü Abdullayev Ələmdar Niftalı oğlu

- 1984-cü il təvəllüdlü Quliyev Vüsal Alı oğlu

- 1988-ci il təvəllüdlü Şirinov Xəyal Hamlet oğlu

Qeyd edək ki, ilkin məlumata görə, Azərbaycandan Moskvaya sərnişin daşıyan mikroavtobusun Rusiyanın Stavrapol vilayətində qəzaya düşməsinə səbəb qarşıdan gələn “Zil” yük maşınının sürücüsünün sükan arxasında yuxulaması olub.
Mikroavtobusda Azərbaycan vətəndaşı olduqları ehtimal edilən 8 nəfər olub. Onlardan 4-ü hadisə yerində, 2-si isə xəstəxanaya aparılarkən keçinib. 3 nəfər xəstəxanaya yerləşdirilib.