Masallı rayonunun Qarğalıq kəndində Vətən müharibəsində qəhrəmanlıq göstərərək şəhidlik zirvəsinə ucalmış döyüşçülərin xatirəsini əbədiləşdirmək üçün inşa edilmiş “Şəhidlər bulağı” istifadəyə verilib.
Butov.az AZƏRTAC-a istinadən xəbər verir ki, yeni inşa olunmuş bulaq kompleksində Vətən müharibəsi şəhidləri Elvin Əzizov, Rəfail Hüseynov və Gülşad Xəlilovun şəkilləri mərmər lövhələrə həkk olunub.
Açılış mərasimindəki çıxışlarda qeyd olunub ki, Ermənistan silahlı qüvvələrinin ötən il sentyabrın 27-də ölkəmizə qarşı başladığı növbəti təxribata cavab olaraq Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə rəşadətli Ordumuzun həyata keçirdiyi əks-hücum əməliyyatları nəticəsində düşmən ağır məğlubiyyətə uğradı. 44 gün davam edən Vətən müharibəsi ordumuzun şanlı Zəfəri ilə başa çatdı, əzəli torpaqlarımız erməni faşizmindən azad olundu.
Sonra söz məktəblilərə verilib. Qarğalıq tam orta məktəbinin şagirdləri şəhidlərə həsr olunmuş şeirlər söyləyiblər. Həmçinin şəhid Elvin Əzizovun qızları Şəhanə və Aybənizin qəhrəmanlarımıza həsr etdikləri şeirləri hər kəsi kövrəldib.