Ramazan ayının 18-dən 19-na keçən gecə (bu gecə) birinci Qədr gecəsidir. İslam dininin inancına görə, məhz bu gecə Allah Quranı bəşəriyyətə nazil edib.

Butov.az-ın Teleqraf.com-a istinadən məlumatına görə, buna dair müqəddəs kitabda iki ayə var:

"İnsanlara doğru yolu göstərən, bu yolu açıq dəlilləri ilə aydınlaşdıran və (haqqı batildən) ayıran (Quran) Ramazan ayında nazil edilmişdir" ("Bəqərə", 185); "Həqiqətən, Biz onu (Quranı) Qədr gecəsi (Lövhi-məhfuzda dünya səmasına) nazil etdik!" ("Qədr", 1).

"Qurani-Kərim" İslam peyğəmbərinə 23 il ərzində hissə-hissə və Qədr gecəsində bütövlükdə nazil olub. Bu gecələr xalq arasında "Əhya gecələri" kimi də tanınır.

Qədr gecəsi olduqca fəzilətli gecədir, bu gecədə bir əməl etmək min ayda əməl etməkdən daha da xeyirlidir. Məhz həmən surədə buyurulur: "Qədr gecəsi min aydan daha xeyirlidir!" ("Qədr", 3).

Qeyd edək ki, Azərbaycanda ikinci Qədr gecəsi iyunun 15-dən 16-na (Ramazan ayının 20-dən 21-ci gününə), üçüncü Qədr gecəsi iyunun 17-dən 18-nə (Ramazan ayının 22-dən 23-cü gününə) təsadüf edir.

Ramazan ayının sonuncu Qədr gecəsi Ramazan ayının 26-cı günü, yəni iyunun 21-dən 22-nə keçən gecəyə təsadüf edəcək.

Xatırladaq ki, Həzrət Əli bu gecə namaz üstə hücuma məruz qalıb və ağır yaralanıb, iki gün sonra isə dünyasını dəyişib.