Butov.az xəbər verir ki, avqustun 28 - də Beynəlxalq Mətbuat Mərkəzində yazıçı - publisist Təranə Cəbiyevanın "Seysulanda döyüş" adlı kitabının tədqimatı keçirilib.

Təqdimat Aprel şəhidlərinin xatirəsinin bir dəqiqəlik sükutla yad edilməsiylə açılıb. Giriş sözü ilə çıxış edən Təranə xanım kitabın Aprel döyüşlərində qəhrəmancasına həlak olmuş Rəşad Niftalılı haqda qələmə alındığını qeyd edib. O, Rəşad Niftalılı haqda məlumat verərək şəhidin göstərdiyi şücaətdən, döyüş uğurundan və ailəsinin əzmindən danışıb. Təranə xanım, eyni zamanda ötən ilki döyüşlərdə qəhrəmancasına həlak olmuş əsgər və zabitlərin hər biri haqda məlumatın dərsliklərə salınmasının vacibliyini vurğulayıb.

Təranə xanım Rəşadın nümunəvi hərbi xidmətini diqqətə çatdıraraq qeyd edib ki, - "Rəşad əsgər formasını 9 ay əyninə şərəflə geyindi...".

Sonra söz Bakı Şəhər Hakimiyyəti başçısının müavini Fiduma xanım Hüseynovaya verilib. O, vətənin ərazi bütövlüyü uğrunda şəhid olan əsgər və zabitlərimizin qəhrəmanlığından danışaraq, şəhid ailələrinə səbr diləyib.



Sonra millət vəkili Fuad Muradov da öz fikirlərini bölüşərək Rəşadın timsalında digər şəhidlərimizin ölməzliyindən, onların gənclərə nümunə olmasından söhbət açıb.



Tədbirdə Xətai Rayon İcra Hakimiyyətinin başçısı aparatının İctimai - siyasi və humanitar məsələlər şöbəsinin müdiri Pənah İmanov da çıxış edib. O, Rəşad Niftalılı və digər şəhidlərin qəhrəmancasına həlak olmasını onların vətənə, torpağa olan sevgisindən qaynaqlandığını bildirib.



Şəhidin atası Şakir Niftalıyev də tədbirin iştirakçısı olub. O, oğlunun qəhrəmanlığından fəxr etdiyini bildirib. Rəşadın tələbəlik illərindən söz açaraq, övladının qayğıkeşliyindən, vətənə olan sevgisindən danışıb.

Tədbirdə Əməkdar İncəsənət xadimi Ziyadxan Əliyev, Əməkdar mədəniyyət işçisi, "Seysulanda döyüş" kitabının redaktoru Məsaim Abdullayev, Aprel döyüşlərinin iştirakçısı, ehtiyyatda olan zabit, kapitan Hikmət Məmmədov da çıxış edib. Onlar aprel döyüşlərinin xalqımızın döyüş ruhunu və iradəsini, Azərbaycan ordusunun güc və qüdrətini göstərən qəhrəmanlıq tarixi olduğunu deyib.

Eyni zamanda, təqdimat mərasimində şəhid ailələrinin nümayəndələri, mətbuat işçiləri də iştirak edib. Sonda Təranə xanım Beynəlxalq Mətbuat Mərkəzinin rəhbərliyinə, kitabın ərsəyə gəlməsində əziyyəti keçən hər kəsə təşəkkür edib və xatirə şəkli çəkilib.

Azadə / Butov.az







[/center]