2021-ci il ərzində ölkədə 31131 cinayət faktı qeydə alınıb ki, bu da 2020-ci ilin göstəricisindən 19,7 faiz çoxdur.

Butov.az xəbər verir ki, bu barədə Dövlət Statistika Komitəsindən (DSK) Modern.az-a verilən məlumatda bildirilib.

Əhalinin hər 100 min nəfərinə hesabı ilə qeydə alınmış cinayət hadisələrinin sayı da əvvəlki dövrlə müqayisədə 49 bənd artaraq 307 olub. Onların 60,2 faizi az ağır, 23,9 faizi böyük ictimai təhlükə törətməyən, 15,9 faizi ağır və xüsusilə ağır cinayətlərə aiddir.


Cinayətlərin strukturunda 12162 hadisə ictimai təhlükəsizlik və ictimai qayda əleyhinə olan, 11840 hadisə iqtisadi sahədə, 5444 hadisə şəxsiyyət əleyhinə, 1652 hadisə dövlət hakimiyyəti əleyhinə olan (onlardan 458 hadisə korrupsiya cinayətləri və qulluq mənafeyi əleyhinə olan digər cinayətlər), 33-ü isə digər cinayətlərdir.

Qeydə alınmış şəxsiyyət əleyhinə olan cinayətlərin 88,1 faizini (4796 cinayət hadisəsi) həyat və sağlamlıq əleyhinə olan cinayətlər təşkil edir ki, onların da 3044-ü qəsdən sağlamlığa yüngül zərər vurma, 623-ü qəsdən sağlamlığa az ağır zərər vurma, 352-si qəsdən sağlamlığa ağır zərər vurma, 238-i qəsdən adam öldürmə və ya adam öldürməyə cəhd, 23-ü ehtiyatsızlıqdan adam öldürmə, 24-ü əzab vermə, qalanları isə digər cinayətlərə aiddir. Ötən il ərzində əcnəbilər tərəfindən və ya onların iştirakı ilə 473 cinayət hadisəsi törədilib.