Şamaxıda Avropa çempionu olmuş, daha sonra kriminal avtoritet kimi ad qazanan Ruslan Surxayevi qətlə yetirməkdə təqsirləndirilən idman müəllimi Orxan Hacıyevin cinayət işi üzrə məhkəmə prosesi yekunlaşıb

“Grapplin və MMA” döyüş növü üzrə fərdi müəllim kimi fəaliyyət göstərən Orxan Hacıyevin “Ruslan Şamaxılı” kimi tanınan Ruslan Surxayevi hansı səbəbdən öldürdüyü hələ bir çoxları üçün qaranlıq qalıb.

Bu iş üzrə istintaq sənədlərini əldə edib və hadisənin törədilməsi səbəblərini oxuculara təqdim edirik.

İttihama görə, hadisə 2020-ci il fevralın 1-də Şamaxı şəhərində yerləşən “Yeddi Günbəz” qəbiristanlığında qeydə alınıb.
Şamaxı şəhər sakini, 1991-ci il təvəllüdlü Orxan Hacıyev aralarında yaranmış mübahisə zəminində mətbəx bıçağı ilə həmyerlisi, 1995-ci il təvəllüdlü Ruslan Surxayevi bıçaqlayıb. Beş bıçaq xəsarəti almış Ruslan Surxayev orada ölüb.

Faktla bağlı Şamaxı Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, O.Hacıyev şübhəli şəxs qismində saxlanılıb.

Məhkəmədə danışan Orxan Hacıyev verilən ittihamla özünü qismən təqsirli bilib.

O bildirib ki, 2020-ci il yanvar ayının ortalarında Ruslan ona zəng edib:

“Həmin vaxta qədər Ruslanın nömrəsini bilmirdim. Özü ilə də şəxsi tanışlığım yox idi, sadəcə adını eşitmişdim. Mənə telefonda “Orxan necəsən” deyə soruşdu, mən də yaxşı olduğunu bildirdim. O güləşçi olduğunu, mənimlə görüşmək istədiyini dedi. Univermağın yanına çağırdı. Mən də deyilən ünvana getdim. Həmin yerdə Ruslan mənim də tanıdığım Fərhad adlı şəxslə idi. Onlara yaxınlaşdım. Ruslan bir yerdə oturub söhbət etmək istədiyini dedi. Mənim də əvvəlcədən Fərhadla qız söhbətim olmuşdu. Mənim istədiyim qızı Fərhad da istəyib. Bu səbəbdən aramızda söz-söhbət olub. Ruslan və Fərhadla birlikdə “Qədim Şamaxı» çay evinə getdik. Orada Ruslan mənə düz hərəkət eləmədiyimi, gücümə güvənib qızı Fərhadın əlindən aldığımı bildirdi. Mən də Ruslana Fərhadın söhbəti düz danışmadığını sübut etdim. Ruslan da söhbətin bağladığını elan etdi və Fərhada bir də o qızın yaxınlığına getməyi qadağan etdi”.

Təqsirləndirilən şəxs qeyd edib ki, təxminən bir həftə və ya on gün sonra Fərhad ona mesaj yazaraq əsgərliyə getdiyini bildirib və “Qədim Şamaxı» çay evinə gəlib çay içməyi təklif edib:

“Mən Fərhada işim olduğunu, həmçinin dərsə tələsdiyimi dedim. Lakin bildirdim ki, gec də olsa gəlib dəyəcəyəm. Fərhad mənə qrup yoldaşlarının da orada olduğunu və yeyib-içdiklərini söylədi. Bir neçə saatdan sonra həmin çay evinə gəldim. Fərhad məni qarşıladı. Bu vaxt Ruslan çölə çıxıb salamsız-kəlamsız mənə “bura gəl Orxan, səninlə işim var” dedi. Həmin vaxt dalağım sancdı və yenə də nəsə baş verdiyini fikirləşdim. Otaqda Ruslandan əlavə üç nəfərin də olduğunu gördüm, həmin şəxsləri tanımadım. Ruslan mənə “bu nə hərəkətdir, bilirsən ki, bu oğlan da həmin qızı istəyir, durub ona acıq edirsən, qızla əl-ələ yapışıb gəzirsən” sözlərini dedi. Mən Ruslana burada tanımadığım şəxslərin olduğunu dedim və çölə çıxmağı təklif etdim. Ruslan bakaldakı viskisini içib və “gəl dalımca” dedi. Ruslanla avtomobilə mindik. Bu vaxt Fərhad və digərləri də gəlib maşına oturdu. Həmin vaxt Ruslan jarqon ifadələrlə danışmağa başladı, mənə “qaqaş, deyəsən sən bizi başa düşmədin”, “biz qardaşımızı yemə buraxmarıq” sözlərini dedi. Ruslan yolda qəbiristanlığa getməyi təklif etdi, mən isə, qəbiristanlıqda nə işimizin olduğunu soruşdum. Ruslan “sən idman müəllimi deyilsən, mən səninlə döyüşmək istəyirəm” sözlərini dedi. Mən isə döşəkdə döyüşdüyümü bildirdim. Ruslan maşını taxıllıq deyilən yerdə saxladı. Aşağı düşdük. Ruslan məni qırağa çəkdi. Üstümə bıçaq çıxardaraq “mən sənə görə qardaşımı fuflo çıxarmışam, mən sənə görə qardaşımı obijat eləmişəm” sözlərini dedi. Sözünü bitirən kimi məni yerə yıxaraq üzümə yumruqla zərbələr vurdu. Sonra bıçağı çıxarıb boğazıma dirədi. Ruslan iki yüz manat pul lazım olduğunu deyərək həmin pulu məndən tələb etdi. Mən də pulumun olmadığını ona çatdırdım. Sonra Ruslan “sən müəllim deyilsən?” deyib iki dəfə məni vurdu və alnım şişdi. Ruslan bıçağı boğazıma dirəyib şram qoyacağını söylədi, buna görə mən pulu verəcəyimə razı oldum. Sabah axşama qədər pulu çatdırmağı tapşırdı. Dost-tanışdan yalvar-yaxar 200 manatı tapıb verdim. Ruslan söhbətin bağlandığını dedi”.
Təqsirləndirilən şəxs ifadəsində həmçinin göstərib ki, bunun üstündən bir-iki gün keçmiş Ruslan zəng edib qardaşlarına pul lazım olduğunu deyib:

“Məndən 100 manat pul istədi. Ayın axırı olduğu üçün pulumun olmadığını bildirdim. O isə üstü güllü mətbəx bıçağını göstərib “həmin hərəkət təkrarlanmasın” sözlərini dedi. Bibim oğlu Əli Məmmədovdan 100 manat alıb Ruslana verdim. Yenə də məndən əl çəkmədilər. Telefonuma zəng vururdular açmırdım. Bir gün tanışım Məsimin nömrəsi ilə zəng gəldi. Telefonu açanda Ruslan dedi ki, mənimlə işi var. Həmin vaxt evdə uzanıqlı olduğumu dedim. Ruslan evimizin yanında olduğunu, mənimlə 5 dəqiqə söhbət edəcəyini dedi. Ev paltarımla çölə çıxdım. Çölə çıxmamışdan qabaq evdən bıçaq götürmüşdüm. Çünki Ruslanın yenə mənə hədə-qorxu gələcəyini düşünürdüm. Çölə çıxanda Ruslan maşında oturmağımı təklif etdi. Ona evdəkilərin narahat olacağını bildirərək, nə söhbəti varsa, elə evin qarşısında eləməyi təklif etdim. Lakin məni avtomobillə mindirdilər. Ruslanın yanında Məsim də var idi. Yolda Ruslan “sən Məsimi necə oğlan kimi tanıyırsan” deyə soruşdu. Mən isə “Şükür Allaha, məhəllə uşağımdır, yaxşı oğlandır” cavabını verdim. Sonra Ruslan “məni necə oğlan kimi tanıyırsan” sualını verdi. Duruxdum, bu zaman Ruslan çönüb mənə şillə vurdu. Ruslan sabaha təcili pul lazım olduğunu bildirdi. Mən pul tapa bilməyəcəyimi bildirdim. Ruslan məni başa salacağını deyərək, qəbiristanlığa apardı. Ruslana qorxduğumu və buna ehtiyac olmadığını söyləsəm də, Ruslan qəbiristanlığa gizlənpaç oynamağa getdiklərini bildirdi. Ruslan maşını sürərək bizi “Yeddi Günbəz” qəbiristanlığına gətirdi. Mən yolda and-aman edərək Ruslandan evə qayıtmağı xahiş etdim. Bu vaxt qardaşım da zəng edirdi, ona tezliklə evə gələcəyimi bildirdim. Qəbiristanlığa çatanda Ruslan məni maşından düşürdü. İki yumruq vuraraq məni yerə yıxdı. Daha sonra Ruslanın telefonuna kimsə zəng elədi. Sonra Ruslan danışdığı şəxsə “gör səninlə kim danışmaq istəyir” deyib telefonu mənim qulağıma qoydu. Sonra dəstəyi götürüb telefondakına MMA müəllimi Orxan olduğunu dedi. Ruslan telefonu yenidən mənə verib “denən Nurlan bizim böyük qardaşımızdır” sözlərini deməyimi istədi. Mən də bir neçə dəfə bunu təkrarladım. Sonra “Ruslan da bizim böyük qardaşımızdır” sözlərini deməyə məni məcbur elədi. Mən maşına tərəf gedəndə Ruslan məni təpiklə vurdu və maşına mindirdi. Bu vaxt həmin yerə başqa maşın gəldi. Maşından Nurlan, Yadigar və Elmar adlı uşaqlar düşdü. Həmin şəxslər Ruslandan maşında kimin olduğunu soruşdu. Bu vaxt Ruslan “Orxandır da, sizin MMA müəllimi” sözlərini dedi. Bu vaxt Yadigar “onu düşürdün görüm” sözlərini bildirdi.

Bu vaxt Yadigar mənə yaxınlaşıb “a, sən Orxan deyilsən, MMA müəllimi, sən bizim böyük qardaşımıza qarşı nə çaşa bilərsən” sözlərini deyib iki şillə vurdu. Bu vaxt Ruslan da yaxınlaşıb əlinin içi ilə iki dəfə alnımın ortasından vurdu və mənə “başa düşdün sən” sözlərini dedi. Yadigar mənə “Orxan, biz səni yaxşı tanıyırıq, sən belə oğlan deyilsən” sözlərini bildirdi. Həmin vaxt Ruslan “Yadigarın vurduğu kəllədən kim ayılıb ki, Orxan da ayıla” sözlərini işlətdi. Anidən Yadigar kəllə vurdu, mən həmin vaxt diz qapaqlarının yerə dəydiyini hiss elədim. Mən yerə yıxılandan sonra Ruslan da yerdə məni təpikləməyə başladı. Digərləri də üstümə düşürək məni vurmağa başladılar. Hesab etdim ki, artıq axırımdır və burdan sağ çıxmayacağam. Birdən gözümə xırda ulduzlar göründü və qulağıma uğultulu səslər gəldi. Bundan sonra aldığım zərbələrin təsirindən nə baş verdiyini xatırlamadım. Özümə gələndə “Niva” maşınının yanında olduğumu gördüm. Kimsə “ay Orxan, ay Orxan» dedi. Çönüb baxanda Nurlan mənə Ruslanı öldürdüyüm bildirdi. Mən belimə qoyduğum bıçağı necə çıxardığımı, Ruslanı necə vurduğumu bilmədim. Nurlana maşını polis şöbəsinə sürməsinə xahiş etdim. Mən şöbəyə girərək Ruslanı vurduğumu, lakin ölüb-olmədiyini bilmədiyimi dedim. Sonrada polislərdən soruşanda Ruslanın öldüyünü eşitdim”.

Bakı Ağır Cinayətlər Məhkəməsinin hökmü ilə Orxan Hacıyev barəsində Cinayət Məcəlləsinin 120-ci (qəsdən adam öldürmə) maddəsi 122-ci (güclü ruhi həyəcan vəziyyətində adam öldürməyə görə) maddəsinə tövsif edilib və o, 2 il müddətinə azadlıqdan məhrum edilib.

Bu hökmdən prokurorluq apelyasiya protesti və O.Hacıyev apelyasiya şikayəti verib. Sumqayıt Apellyasiya Məhkəməsi işə baxaraq O. Hacıyevin əməlini 123.1-ci maddəyə (zəruri müdafiə həddini aşmaqla adam öldürmə) tövsif edərək onun 2 il cəza müddətini 1 il 6 aya salıb. İstintaq və məhkəmə dövründə O. Hacıyev bu cəzası çəkdiyindən məhkəmə zalından azadlığa buraxılıb.

Qeyd edək ki, Ruslan Surxayev sərbəst güləş üzrə əvvəl millimizin üzvü olub. O yeniyetmələr arasında 50 kq çəki dərəcəsində Avropa çempionu və dünya çempionatının gümüş medalçısı olub. (Lent.az)

Bütöv.az

Serbiyanın paytaxtı Belqradda keçirilən boks üzrə dünya çempionatında bu gün bir idmançımız mübarizəyə qoşulacaq.

Bütöv.az-ın xəbərinə görə, bu, ən ağır çəkili boksçumuz Məhəmməd Abdullayevdir.
+92 kq
1/16 final
Məhəmməd Abdullayev – Yonas Yazeviçius (Litva)

Qeyd edək ki, dünən boksçumuz Loren Alfonso AIBA bayrağı altında çıxış edən Tavfikulla Süleymani ilə qüvvəsini sınayıb. 86 kq çəki dərəcəsində baş tutan görüş Avropa Oyunlarının qalibi olan idmançımızın asan qələbəsi ilə yekunlaşıb. Tokio 2020-nin də mükafatçısı olan Kuba əsilli idmançımız rəqibini 5:0 hesabı ilə məğlub edərək, 1/8 finala yüksəlib. O, oktyabrın 31-nə təsadüf edəcək növbəti döyüşündə rumıniyalı Pol Aradoae ilə döyüşəcək.

Tayfur Əliyev (-60 kq) 1/32 final mərhələsi çərçivəsində Şarles Peti-Hommla (Haiti) üz-üzə gəlib. Döyüşü üstün keçirən boksçumuz dünya çempionatına qələbə ilə başlayıb – 5:0. O, ikinci qarşılaşmasında ilk mərhələdən azad olan italiyalı Simone Spada ilə münasibətinə aydınlıq gətirəcək. Görüş sabah olacaq.

Azərbaycan Respublikasının Prezidenti İlham Əliyev oktyabrın 28-də Qırğız Respublikasının ölkəmizdə yeni təyin olunmuş fövqəladə və səlahiyyətli səfiri Kayrat Osmonaliyevin etimadnaməsini qəbul edib.

Bununla bağlı AZƏRTAC məlumat yayıb.



Bütöv.az

Dünya bazarında neft qiymətləri azalıb.

WTI markalı neftin dekabr fyuçersləri 1,71 % ucuzlaşaraq, bir bareli 81,25 ABŞ dolları təşkil edib.

“Brent” markalı neftin dekabr fyuçersləri 1,77 % ucuzlaşaraq, bir bareli 83,08 ABŞ dolları olub.

Mənbə: “Bloomberg”

Bütöv.az

Cüdo millimizin sabiq kapitanı Nicat Şıxəlizadə yeniyetmələrdən ibarət millimizə məşqçi təyin olunub.

Bütöv.az-ın əldə etdiyi xəbərə görə, bu ay 33 yaşa adlayan idmançı avqustda karyerasını bitirib.

Dünya və Avropa mükafatçısı, Bakıda keçirilmiş IV İslam Həmrəyliyi Oyunlarının qalibi olan Şıxəlizadə bundan sonra yeniyetmələrdən ibarət millimizdə məşqçi işləyəcək.

Qeyd edək ki, Dövlət Sərhəd Xidmətinin zabiti olan Nicat Şıxəlizadə yaxınlarda Azərbaycan Respublikası Prezidenti yanında Dövlət İdarəçilik Akademiyasının “Menecment” ixtisası üzrə bakalavr dərəcəsini bitirib.

Azərbaycanda son sutkada koronavirus (COVID-19) əleyhinə 44 716 vaksin vurulub.

Bu barədə Nazirlər Kabineti yanında Operativ Qərargahdan məlumat verilib.

Məlumata görə, bir gündə birinci mərhələ üzrə vaksinasiya olunanların sayı 32 320, ikinci mərhələ üzrə vaksinasiya olunanların sayı 12 396 nəfərdir.

Ölkədə vurulan vaksinlərin ümumi sayı 9 469 618, birinci mərhələ üzrə vaksinasiya olunanların ümumi sayı 5 119 077, ikinci mərhələ üzrə vaksinasiya olunanların sayı isə 4 350 541 təşkil edir.

bütöv.az

Türkiyə Prezidenti Rəcəb Tayyib Ərdoğan Türkiyə Böyük Millət Məclisində çıxışı zamanı Azərbaycana səfərindən bəhs edib.

“Haber Global” məlumat verir ki, Türkiyə lideri çox qısa zamanda Azərbaycanın seçilən ölkələr arasında yer alacağını bildirib.
Füzulidə Beynəlxalq Hava Limanının açılışından söz açan siyasətçi Azərbaycanda fərqli irəliləyiş olduğunu vurğulayıb:

“İnşallah, Füzulidən İstanbula gediş-gəliş olacaq. Hazırda bu yolların tikintisi istiqamətində işlər sürətlə davam etdirilir”.

bütöv.az

Daxili İşlər Nazirliyi (DİN) kibercinayətkarlıqlarla bağlı vətəndaşlara müraciət edib

Axar.az müraciəti təqdim edir:

"Sosial media üzərindən edilən kibercinayətkarlıqlarla bağlı vətəndaşlarımızı diqqətli olmağa çağırır və aşağıda qeyd edilənlərə riayət etmələrini, ümumiyyətlə internet resurslarında ayıq-sayıq olmalarını xahiş edirik:

- Mobil və şəhər nömrələrindən zəng edən şəxslərə bank kartlarınızdakı məlumatları, yəni kart sahibinin adı, soyadı, kartın son istifadə tarixi, CVV nömrəsi və təsdiq kodunu (“3D secure”) heç kəsə təqdim etməyin. Hətta bu bank əməkdaşı olsa belə;

- Sosial media və elan saytları üzərindən satışa çıxardığınız məhsulları guya almaq məqsədilə özünün ölkədə olmadığını, həmçinin uzaq məsafədə olduğunu əsas gətirərək ödənişi onlayn yolla edəcəyini bildirən şəxslərə bank kartı məlumatlarını təqdim etməyin;

- İşə qəbul olunmağınızı əsas gətirərək guya “sağlamlıq haqqında arayış” üçün əvvəlcədən hansısa məbləğ tələb edən şəxslərə ödəniş etməyin;

- Saxta xarici nömrələrdən, həmçinin virtual nömrələrdən zəng edən şəxslərə bank kartı məlumatlarını təqdim etməyin;

- Alqı-satqı saytlarında hər hansı bir mənzili, avtomobili (telefon, geyim əşyaları, mebel və s.) dəyərindən çox aşağı qiymətə elana qoyan şəxslərə alacağınız əmlaka və məhsula baxış keçirmədən beh verməyin;

- “Giveaway” adlı yarışların qalibi olduğunuz barədə mesaj alsanız hədiyyənin çatdırılması (karqo) üçün ödəniş etməyin;

- “Xakker”, “baxıcı”, “faizə pul”, “profillərin izlənilməsi” və bu kimi digər səhifələrə müraciət etməyin, hesablarına pul köçürməyin;

- Sosial şəbəkələrdəki tanımadığınız, etibar etmədiyiniz səhifələrdən alış-veriş etməyin".

bütöv.az

Prezident İlham Əliyev şəhid və şəhid ailəsi statusu almış şəxslərə, müharibə ilə əlaqədar əlilliyi müəyyən edilmiş şəxslərə və müharibə veteranlarına dair məlumatların mübadiləsi mexanizminin təkmilləşdirilməsi və Azərbaycan Respublikası Prezidentinin 2019-cu il 15 aprel tarixli 634 nömrəli Fərmanı ilə təsdiq edilmiş “Azərbaycan Respublikasının Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sistemi haqqında Əsasnamə”də dəyişiklik edilməsi barədə fərman imzalayıb.

Bununla bağlı AZƏRTAC məlumat yayıb.

Fərmana əsasən, Azərbaycan Respublikasının Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sistemində “Zəfər” altsistemi yaradılacaq.

Qeyd edilib ki, şəhid və şəhid ailəsi statusu almış şəxslər, müharibə veteranları və müharibə ilə əlaqədar əlilliyi müəyyən edilmiş şəxslər barədə məlumatlar “Zəfər” altsistemi vasitəsilə toplanacaq və sistemləşdiriləcək. Eləcə də şəhid və şəhid ailəsi statusu almış şəxslərin reyestrinin və müharibə veteranlarının reyestrinin aparılması bu alt-sistem vasitəsilə həyata keçiriləcək.

bütöv.az

Heydər Əliyev prospektindən metronun ''Nərimanov'' stansiyasına gedən yol bağlanıb.

Musavat.com xəbər verir ki, bu barədə Bakı Şəhər Dövlət Yol Polisi İdarəsi əhaliyə müraciət edib.

İdarənin müraciətində paytaxtın Nərimanov rayonu ərazisində Heydər Əliyev prospektinin Ağa Nemətulla küçəsi ilə kəsişməsindən metronun “Nəriman Nərimanov” istiqamətinə gedən yolun kənarında, yəni Ağa Nemətulla küçəsi, 32 ünvanında yerləşən istismara tam yararsız, yarısökülmüş vəziyyətdə olan binanın uçma təhlükəsi yarandığı qeyd edilib.

Bildirilib ki, həmin binanın qanunvericilikdə nəzərdə tutulmuş sənədlər əsasında tam sökülməsi qərara alınıb. Bu məqsədlə oktyabrın 26-da saat 21:30-dan etibarən Heydər Əliyev prospektindən Ağa Nemətulla küçəsi istiqamətinə əlavə yolda avtomobillərin və marşrut üzrə işləyən ictimai nəqliyyat vasitələrinin hərəkəti məhdudlaşdırılıb və istiqaməti dəyişdirilib.

“Qısamüddətli söküntü işləri tam başa çatanadək hərəkətlə bağlı təhlükəsizliyi təmin etmək məqsədilə bütün hərəkət iştirakçılarına (piyadalara, avtomobil sürücülərinə, ictimai nəqliyyat vasitələrini idarə edən və bu nəqliyyatdan istifadə edən sərnişinlərə) müraciət edirik ki, göstərilənləri nəzərə alıb alternativ yollardan istifadə etsinlər”, – deyə müraciətdə qeyd olunub.

Qeyd edək ki, sökülən bina 1950-ci ildə inşa edilib.



Bütöv.az