22-03-2024, 15:46
Ərdoğan İlham Əliyevə təbrik məktubu ünvanladı
Türkiyə Respublikasının Prezidenti Rəcəb Tayyib Ərdoğan Prezident İlham Əliyevə təbrik məktubu ünvanlayıb.
Məktubda deyilir:
"Hörmətli cənab Prezident, Əziz Qardaşım.
Hər il təbiətin canlanmasını qeyd etdiyimiz və torpağın oyanışının rəmzi olan Novruz bayramı münasibətilə Zati-alinizə və qardaş Azərbaycan xalqına ən səmimi təbriklərimi çatdırmaqdan məmnunluq duyuram.
Əsrlərə söykənən qədim ənənə olan Novruz bizlərə ümid və bərəkət dolu günləri müjdələyir. Ortaq mədəniyyətimizin mühüm hissəsi olan bu əlamətdar gündə dostluq və qardaşlıq əlaqələrimizin daha da güclənəcəyinə əminəm.
2024-cü ilin bizlər üçün yeni fürsətlərin və uğurların yaşanacağı bir il olmasına ümid edirəm. Ölkələrimiz arasındakı əlaqələrin güclənərək inkişaf etməsi və ortaq hədəflərimizə birlikdə nail olunması yolunda daha sıx əməkdaşlıq etmək arzusu ilə Zati-alinizə, dost və qardaş Azərbaycan xalqına cansağlığı, xoşbəxtlik və firavanlıq diləyirəm".
22-03-2024, 15:09
XATİRƏSİ ÜRƏKLƏRDƏ YAŞAYIR
GENERAL-MAYOR AYDIN MƏMMƏDOVUN XATİRƏSİ ÜRƏKLƏRDƏ MƏHƏBBƏTLƏ YAŞAYIR
Bu gün “Xəzərin general oğlu” adlı ilk kitabımın qəhrəmanı, daxili xidmət general-mayoru Aydın Məmmədovun doğum günü, 85 illik yubiley yaşıdır.
Aydın Məmmədov 1939-cu ilin 22 martında Astara rayonunda anadan olub. 15 yaşında, yeddillik təhsilini başa vurandan sonra Astaradan ayrılan cavan oğlan Bakıda gəmi təmiri zavodunda fəhləlikdən müxtəlif vəzifələrə yüksəlib. Odessa Dəniz Donanması İnstitutunda, Bakı Ali Partiya Məktəbində təhsil alıb.
Xəzər Dəniz Gəmiçiliyində uzun illər müxtəlif vəzifələrdə çalışdıqdan sonra Azərbaycan Kommunist Partiyası Mərkəzi Komitəsində Nəqliyyat və Rabitə şöbəsinin müdiri, Daxili İşlər naziri vəzifələrinə yüksəlib. Sonra Bakı Dəniz Ticarət Limanının rəisi, Bakı Beynəlxalq Dəniz Ticarət Limanının baş direktoru vəzifələrində işləyib.
Aydın Məmmədovun Daxili İşlər Nazirliyinə rəhbərliyi (1987-1990) ən çətin illərə təsadüf etmişdi. Həmin dövrdə milli azadlıq hərəkatının liderləri meydanda birləşəndə, xalq da onları dəstəkləyərək meydana toplaşmışdı.
O zaman Azərbaycanda meydanda toplaşmaq təcrübəsi yox idi. Sonralar azadlıq hərəkatının liderləri özləri etiraf edirdilər ki, onların tribunaya çıxıb sözlərini demələri, qəhrəman olmaları üçün respublikada şərait lazım idi. Nazir bu günü o zaman görür və düzgün qərar qəbul edirdi. Bu mənada Aydın Məmmədov müstəqil dövlətçiliyimizin tarixinə birinci düşən şəxslərdəndir.
Aydın müəllimin həm insanlıq, həm də dövlət adamı kimi mövqeyi meydanın qansız təmizlənməsinə səbəb oldu. Bu, onun Azərbaycan xalqı qarşısında əvəzsiz xidməti idi. SSRİ dövrünün naziri, generalı olaraq milli ruhdan hərəkət etmək qəhrəmanlıq idi. Moskva qorxurdu ki, Aydın Məmmədov milli qüvvələrə qoşulub, onların önündə gedə bilər. Ona görə Moskva heç vaxt ona antiAzərbaycan əmri verə bilmirdi.
20 Yanvar qırğınından sonra ilk istefa ərizəsi yazan nazır oldu. Nazir işlədiyi illərdə bir şəxsiyyət olaraq Azərbaycan polisinin mənəvi cəhətdən formalaşmasında mühüm rol oynadı. Odur ki, saf, ləkəsiz, vətənpərvər generalın - ömrünün 63 ili də tamam olmayan Aydın Məmmədovun unudulmaz xatirəsi tanıyanların qəlbində hər zaman məhəbbətlə yaşayır.
Ruhu şad olsun!
Sözardı: Məlumat üçün bildirim ki, Aydın Məmmədovun ocağı yerindədir, nəsil davamçıları cəmiyyətdə layiqli mövqeyə malikdirlər. Həyat yoldaşı Xanım Məmmədova BDU-nun dosentidir. Böyük oğlu Rasim təqaüddədir,azad sahibkarlıqla məşğuldur. Həyat yoldaşı Töhfə xanım həkimdir. Qızları Aydan və Xanım Azərbaycan Prezidenti yanında Dövlət İdarəçilik Akademiyasında təhsil alırlar.
Kiçik oğlu Azər Səfərbərlik və Hərbi Xidmətə Cagiriş üzrə Dövlət Xidmətinin rəis müavinidir. Həyat yoldaşı Könül xanım filoloqdur. Oğlanları - babasının adını yaşadan Aydın universitet və magistratura təhsilini bitirdikdən sonra hərbi xidmətini yerinə yetirir. Ayxan tələbədir, Türkiyədə təhsil alır.
Sevda ƏLİBƏYLİ,
“Söz” jurnalının baş redaktoru
22-03-2024, 13:51
Daha bir həmyerliniz müharibədə həyatını itirdi
Rusiya-Ukrayna müharibəsində daha bir həmyerlimiz həlak olub.
Bu barədə “Qafqazinfo”ya mərhumun ailəsindən məlumat verilib. Bildirilib ki, 45 yaşlı Heydərov Vahid Sayadxan oğlu Ukraynanın Avdeyevka şəhərində minaya düşüb. Həmyerlimiz aldığı xəsarətlərdən həyatını itirib.
V.Heydərov Cəlilabad rayonunda doğulub. Sonradan Rusiyaya köçüb, həmin ölkənin vətəndaşlığını qəbul edib. Hazırda onun nəşinin ailəsinə təhvil verilməsi istiqamətində işlər aparılır.
22-03-2024, 12:20
Sabahın hava proqnozu
Bakıda və Abşeron yarımadasında martın 23-də hava şəraitinin bəzi yerlərdə arabir yağış yağacağı, səhər kəsiləcəyi, gün ərzində əsasən yağmursuz keçəcəyi gözlənilir.
Milli Hidrometeorologiya Xidmətindən verilən məlumata görə, səhər bəzi yerlərdə duman olacaq.
Şimal-qərb küləyi günün ikinci yarısında arabir güclənəcək. Havanın temperaturu gecə 4-6° isti, gündüz 8-12° isti olacaq. Atmosfer təzyiqi 757 mm civə sütunundan 761 mm civə sütununa yüksələcək. Nisbi rütubət 70-80 % olacaq.
Azərbaycanın bəzi yerlərində havanın arabir yağıntılı olacağı, dağlıq rayonlarda qar yağacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi ehtimalı var. Gündüz yağıntıda fasilə olacaq. Bəzi yerlərdə arabir duman olacaq. Qərb küləyi gündüz ayrı-ayrı yerlərdə arabir güclənəcək.
Havanın temperaturu gecə 3-8° isti, gündüz 13-18° isti, dağlarda gecə 3° şaxtadan 2°-dək isti, gündüz 4-9° isti olacaq.
21-03-2024, 19:53
Gələcəkdə oxşar üçtərəfli saziş imzalana bilər - Hikmət Hacıyev
Azərbaycan və Çin arasında ticari-iqtisadi əlaqələr çox fəal inkişaf edir və Orta Dəhlizin tam istismarı bu əlaqələrə daha da təkan verəcək.
Bunu Çinin CGTN telekanalına müsahibəsində Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
O bildirib ki, Transxəzər Beynəlxalq Nəqliyyat Marşrutu (TBNM) layihəsinin öz çətinlikləri var, onları aradan qaldırmaq lazımdır: “Orta Dəhliz bir neçə ölkənin ərazisindən keçir, bunlar bizim Mərkəzi Asiya tərəfdaşlarımız, Gürcüstan, Türkiyədir. Biz qazax, gürcü və türk həmkarlarımızla çox işləyirik. TBNM üçün “bir pəncərə” elementi xüsusilə mallarını Avropaya çatdırmaq istəyən Çin şirkətləri üçün çox vacibdir. Yeri gəlmişkən, artıq işləyən və Çin tərəfini də buna cəlb etmək istədiyimiz “bir pəncərə”nin tətbiqi bütün marşrut boyunca prosedurları standartlaşdırmağa və sadələşdirməyə imkan verəcəkdir. Onun tətbiqi gözlənildiyindən daha tez baş verir, çünki biznesin öz qaydaları var”.
Prezidentin köməkçisi qeyd edib ki, Azərbaycan bu yaxınlarda Çin və Qazaxıstan arasında Orta Dəhliz haqqında imzalanmış sazişi diqqətə çatdırıb: “Biz Azərbaycan və Çin arasında belə bir sazişin mümkünlüyü barədə də düşünürük. Ola bilsin ki gələcəkdə oxşar üçtərəfli saziş imzalansın. Biz Çin+Mərkəzi Asiya, Çin+Mərkəzi Asiya+Azərbaycan konsepsiyasının inkişafını gözləyirik”.
H.Hacıyev vurğulayıb ki, Çin həmişə başqa mədəniyyətlərə və sivilizasiyalara açıq olub və onlara hörmətlə yanaşır.
21-03-2024, 18:19
Qlobal Şimal və Cənub arasında körpü ola bilərik - Hikmət Hacıyev
Bakıda keçiriləcək “COP29” konfransının əsas mövzusu kifayət qədər mürəkkəb məsələ olan iqlim üçün maliyyə olacaq. Amma Azərbaycanın bir sıra üstünlükləri var ki, bu da ona müxtəlif mövqe və baxışa malik olan tərəflər arasında konsensusa nail olmağa imkan verə bilər.
Bunu Çinin CGTN telekanalına müsahibəsində Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
“Bu çətin məsələdir, həm də müxtəlif nöqteyi-nəzərdən tərəflər arasında konsensus tapmaqdır. Amma mən hesab edirəm ki, buna nail olmaq mümkündür”, - Azərbaycan Prezidentinin köməkçisi bildirib.
Onun sözlərinə görə, Azərbaycan qlobal Şimal və Cənub fikirlərini bir araya gətirmək üçün əlindən gələni edəcək, eyni zamanda sonuncunun da səsi eşidilməlidir:
“Qlobal Cənub, inkişaf etməkdə olan və az inkişaf etmiş ölkələrin özünəməxsus problem və çətinlikləri var, buna görə də Ziyan və Zərər Fondu yaradılmışdır. Maliyyə məsələləri və maliyyə resursları əsasdır”.
Hikmət Hacıyev əlavə edib ki, Azərbaycanın belə bir həll və konsensus tapmaq üçün strateji üstünlüyü var:
“Azərbaycan inkişaf etməkdə olan ölkədir, Qoşulmama Hərəkatına uğurla sədrlik edib, dünyanın demək olar ki, yarısını əhatə edən G77 və Çin qrupunun üzvüdür. Azərbaycan həm də bəzi Avropa qurumlarının üzvüdür və Aİ ilə əlaqələri mövcuddur.
Düşünürəm ki, belə bir mövqe konsensusun əldə edilməsində və həmçinin qlobal Şimal və Cənub arasında daha böyük həmrəyliyin əldə edilməsində mühüm rol oynayacaq”.
21-03-2024, 17:03
Ceyhun Bayramov türkiyəli həmkarıyla görüşdü
21 mart 2024-cü il tarixində xarici işlər naziri Ceyhun Bayramov Nüvə Enerjisi Sammiti çərçivəsində Türkiyə Respublikasının xarici işlər naziri Hakan Fidan ilə görüşüb.
Xarici İşlər Nazirliyinin məlumatına görə, görüş zamanı ölkələrimiz arasında qardaşlıq və strateji müttəfiqlik əlaqələrinin inkişafından məmnunluq ifadə olunub.
Ölkələrimiz arasında ikitərəfli və çoxtərəfli formatda davam edən uğurlu əməkdaşlığın regional inkişafa mühüm töhfələr verdiyi, bu xüsusda ticarət, enerji, təhlükəsizlik, nəqliyyat, elm-təhsil və bir çox digər istiqamətlərdə əməkdaşlığın daha da dərinləşməsinin əhəmiyyəti vurğulanıb. Bölgədə nəqliyyat dəhlizlərinin birgə inkişafının əhəmiyyəti qeyd edilib.
Nazir Ceyhun Bayramov həmçinin Azərbaycan-Ermənistan normallaşma prosesi barədə həmkarına məlumat verib.
Görüşdə həmçinin qarşılıqlı maraq doğuran digər regional və qlobal məsələlər ətrafında geniş fikir mübadiləsi aparılıb.
21-03-2024, 16:52
Azərbaycan və Pakistanın XİN başçıları görüşdü
Azərbaycanın xarici işlər naziri Ceyhun Bayramov Belçikanın Brüssel şəhərində keçirilən Atom Enerjisi Sammiti çərçivəsində Pakistanın xarici işlər naziri İshaq Darla görüşüb.
Bu barədə Azərbaycan Xarici İşlər Nazirliyinin (XİN) "X" hesabında məlumat yayılıb.
Tərəflər iqtisadiyyat, nəqliyyat və kommunikasiya sahələrində əməkdaşlığın perspektivlərinə dair fikir mübadiləsi aparıblar.
Eyni zamanda, COP29-la əlaqədar hazırlıq işləri və münaqişədən sonrakı regional vəziyyət müzakirə olunub.
21-03-2024, 15:51
Ceyhun Bayramov Belçikada keçirilən Sammitdə çıxış etdi
Azərbaycan xarici işlər naziri Ceyhun Bayramov martın 21-də Belçika Krallığına işgüzar səfəri çərçivəsində ilk dəfə keçirilən Nüvə Enerjisi Sammitində iştirak edib.
Xarici İşlər Nazirliyindən verilən məlumata görə, nazir sammitə çıxış edərkən ölkəmizin Atom Enerjisi üzrə Beynəlxalq Agentlik (AEBA) ilə əməkdaşlıq məsələlərinə toxunub, eləcə də tədbirin mövzusu üzrə ölkəmizin mövqeyi diqqətə çatdırılıb.
Nazirin çıxışında BMT-nin İqlim Dəyişikliyi üzrə Çərçivə Konvensiyasının Tərəflər Konfransının 28-ci sessiyası (COP28) çərçivəsində Qlobal Dəyərləndirmə Hesabatında (Global Stocktake) nüvə enerjisinin "istixana qazı emissiyalarını azaltmaq üçün" üsullardan biri kimi əks olunmasının nüvədən təhlükəsiz istifadə istiqamətində göstərilən qlobal səylərin vacib nəticəsi olduğu qeyd edilib.
Bu istiqamətdə AEBA nüvə enerjisinin ətraf mühitə təsirlərini öyrənməyə yönələn fəaliyyətin, o cümlədən “Atoms4Climate” kimi təşəbbüslərin təqdirəlayiq olduğu diqqətə çatdırılıb.
Nüvə texnologiyalarından istifadə sahəsində AEBA ilə texniki əməkdaşlığın gələcək perspektivlərinə toxunan nazir Ceyhun Bayramov, bu istiqamətdə tamamlanma mərhələsində olan AEBA ilə Texniki Əməkdaşlıq sahəsində Azərbaycan Respublikası üçün nəzərdə tutulan növbəti “Ölkə üzrə Çərçivə Proqramı” çərçivə sənədinin əhəmiyyətindən bəhs edib.
Azərbaycanın milli səviyyədə nüvə texnologiyalarından istifadə təcrübəsi barədə ətraflı məlumat verən nazir Ceyhun Bayramov, AEBA ilə birgə ölkəmiz üçün ən vacib çağırışlardan biri olan mina təhdidi ilə mübarizə sahəsinə nüvə texnologiyasının tətbiqinin mümkünlüyünün tədqiq edilməsi üzərində çalışdığımızı diqqətə çatdırıb. Bu sahədə prioritetimizin, nüvə enerjisindən istifadə imkanlarının araşdırılması zamanı nüvə təhlükəsizliyinə xüsusi diqqət edilməsi olduğu vurğulanıb.
COP29-a sədrliyimiz çərçivəsində iqlim dəyişikliyi ilə mübarizə sahəsində nüvə texnologiyalarından dinc məqsədlər üçün əlçatan istifadə naminə resursların cəlbinin təşviqi ilə yanaşı, nüvə təhlükəsizliyi amilini ön planda saxlayacağımız diqqətə çatdırılıb.
AEBA-nın bu istiqamətlərdə göstərilən səylərə mümkün töhfəsinin əhəmiyyətli rol oynayacağına dair inam ifadə olunub.
21-03-2024, 14:20
Azərbaycan COP29-da mümkün olan hər şeyi edəcək
Azərbaycan Qlobal Şimal və Qlobal Cənub arasında konsensus əldə etmək üçün COP29-da mümkün olan hər şeyi edəcək.
Bu barədə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev "China Global Television Network"a (CGTN) müsahibəsində deyib.
"Fürsətdən istifadə edərək Birləşmiş Ərəb Əmirliklərini (BƏƏ) COP28-də əldə olunan nailiyyətlər münasibətilə təbrik etmək istərdim. Biz çox sıx əməkdaşlıq edirik və onların təcrübəsi də bizim üçün vacibdir. Azərbaycan fəaliyyətimizin ardıcıllığını və sinxronlaşdırılmasını təmin etmək üçün "COP Troykası" konsepsiyasına təşəbbüs göstərib", - o deyib.
Prezidentin köməkçisi Azərbaycanda keçiriləcək COP29-da iqlim maliyyələşdirməsinin gündəmdə olacağını qeyd edib.
"Bilirik ki, bu çox mürəkkəb mövzulardan biridir. Lakin bizə bütün tərəflərin konsensusu lazımdır. Azərbaycan Qlobal Şimal və Qlobal Cənub arasında konsensus əldə etmək üçün mümkün olan hər şeyi edəcək. Vurğulamaq istəyirəm ki, Qlobal Cənub ölkələrinin fikirləri də dinlənməlidir. Xüsusilə Qlobal Cənub, inkişaf etməkdə olan və ya nisbətən az inkişaf etmiş ölkələr problem və çətinliklərlə üzləşir. Maliyyələşdirmə, maliyyə resursları əsas faktorlardır. Hesab edirik ki, biz bu istiqamətdə strateji üstünlüyə malikik. Çünki Azərbaycan inkişaf etməkdə olan ölkədir, Qoşulmama Hərəkatına uğurla sədrlik edib və G77+Çin qrupunun üzvüdür. Azərbaycan həmçinin, bir sıra Avropa institutlarının üzvüdür. Düşünürəm ki, bu müxtəlif platformalar bizi Qlobal Şimal və Qlobal Cənub arasında konsensus və anlaşma, eləcə də böyük həmrəylik əldə etmək üçün vasitələrlə təmin edəcək", - o deyib.
H.Hacıyev COP danışıqlarının diplomatik nöqteyi-nəzərdən ən mürəkkəb danışıqlardan biri olduğunu vurğulayıb.
"Burada biz inklüziv yanaşmanı rəhbər tutmalıyıq", - deyə o əlavə edib.
Qeyd edək ki, COP29 konfransının Azərbaycanda keçirilməsi barədə qərar rəsmi olaraq 11 dekabr 2023-cü ildə Dubayda elan edilib. Azərbaycan bu ilin noyabrında tədbirə ev sahibliyi edəcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!