TRT radiosu yazıçı-publisist Yaqub Öməroğlunun aparıcısı olduğu “Mədəniyyət pəncərəsi” verilişinin iyunun 15-dəki buraxılışı Milli Qurtuluş Gününə həsr edilib. Verilişdə Azərbaycanın dövlət himni səsləndirilib və himnimizin tarixi barədə ətraflı məlumat verilib.

Butov.az xəbər verir ki, canlı yayımda verilişin qonağı olan AZƏRTAC-ın Türkiyədəki xüsusi müxbiri Sabir Şahtaxtı Milli Qurtuluş Gününün tarixi və Şuşa Bəyannaməsi barədə danışıb.

Şuşa Bəyannaməsini Milli Qurtuluş Günü ilə böyük hərbi Zəfərin vəhdət bayramı kimi dəyərləndirən jurnalist ümummilli lider Heydər Əliyevin xilaskarlıq missiyasından bəhs edib. Diqqətə çatdırılıb ki, göstərilən siyasi iradə və qətiyyət sayəsində Şuşa Bəyannaməsinin imzalanması ilə “Azərbaycanın sevinci sevincimiz, kədəri kədərimizdir” deyən böyük Atatürkün arzuları reallaşıb. İyunun 15-i Azərbaycan və Türkiyənin müstəqilliyi yolunda canlarını fəda edən şəhidlərimizin ruhunun şad olduğu günə çevrilib.

Radio dinləyicilərinə Qafqaz İslam Ordusunun tarixi missiyası, ötən yüzilliyin əvvəlində və sonunda Naxçıvanın qurtuluşu, XX əsrin sonunda Ermənistanın Azərbaycana qarşı əsassız iddiaları və onun acı nəticələri, Zəngəzur dəhlizinin siyasi-iqtisadi əhəmiyyəti və digər aktual məsələlər barədə də ətraflı məlumat verilib.