Azərbaycan Respublikası Baş prokurorunun birinci müavini Elçin Məmmədovun rəhbərlik etdiyi nümayəndə heyəti Belarus Respublikasının İstintaq Komitəsinin yaradılmasının on illiyi və Komitənin ixtisasartırma və peşə hazırlığı institutunun yaradılmasının ildönümü ilə əlaqədar “İstintaq fəaliyyəti: elm, təhsil, təcrübə” mövzusunda beynəlxalq elmi-praktiki konfransda iştirak etmək üçün Minskdə səfərdə olub.
Baş Prokurorluğun mətbuat xidmətindən AZƏRTAC-a bildiriblər ki, konfransın gedişində Baş prokurorun birinci müavini çıxış edərək Azərbaycan Respublikasının Prezidenti İlham Əliyevin qətiyyətli siyasi iradəsindən qaynaqlanan və rəhbərliyi ilə bütün sahələrdə olduğu kimi, məhkəmə-hüquq sistemində də ardıcıl aparılan islahatlar, o cümlədən prokurorluq orqanlarının fəaliyyətinin ən müasir tələblər səviyyəsində təkmilləşdirilməsi barədə konfrans iştirakçılarına ətraflı məlumat verib. Həmçinin iştirakçılara “Azərbaycan Respublikası timsalında prokurorluq işçilərinin peşə hazırlığı sahəsində müasir tendensiyalar” adlı elmi məqalə təqdim olunub.
Çıxış konfrans iştirakçıları tərəfindən böyük maraqla qarşılanıb, mövzuya dair suallar ətraflı cavablandırılıb.
Səfər çərçivəsində nümayəndə heyəti ilə Belarus Respublikasının İstintaq Komitəsinin sədri Dmitri Qora arasında görüş keçirilib. Söhbət zamanı iki ölkə arasında zəngin tarixə malik və ilbəil daha da dərinləşən münasibətlər diqqətə çatdırılıb, hüquqi sahədə əməkdaşlığın perspektivləri müzakirə olunub.
Həmçinin nümayəndə heyəti Belarus Respublikasının Baş prokuroru Andrey Şved tərəfindən qəbul edilib. Görüşdə ölkələrimizin prokurorluq orqanları arasında əməkdaşlığın yüksək səviyyədə olması vurğulanaraq, ikitərəfli münasibətlərin inkişaf etdirilməsi məqsədilə qarşılıqlı səfərlərin təşkili və səmərəli hüquqi əməkdaşlığın bundan sonra da davam etdiriləcəyinə əminlik ifadə olunub. Bundan başqa, nümayəndə heyəti konfransda iştirak edən bir sıra ölkələrin nümayəndə heyətləri ilə işgüzar görüşlər keçirib, ikitərəfli əlaqələrin inkişaf etdirilməsi məsələləri ətrafında fikir mübadiləsi aparılıb.