Azərbaycan Kommunist Partiyası (AKP) Ələkrəm Hümmətovun Ermənistana səfərini pisləyən bəyanat verib. Bu barədə Modern.az-a partiya sədri Rauf Qurbanov məlumat verib. O bildirib ki, Kommunist Partiyası Mərkəzi Komitəsi separatçı Ə. Hümmətovun İrəvana və işğal altında olan Azərbaycan torpaqlarına səfər etməsini kəskin şəkildə qınayıb.

AKP-nin bəyanatında qeyd edilir ki, vaxtı ilə Qarabağ separatçılarına qarşı vuruşan və Bakıdan Xankəndinə basıb keçəcəyini bəyan edən “polkovnik” Hümmətov heç nə olmayıbmış kimi, bir neçə gün qabaq özü İrəvandan Xankəndinə səfər edib və yaşlaşdıqca müdrikləşmək, səhvlərini etiraf edib düzəlmək əvəzinə, orda növbəti ağılsız açıqlamalar verib. “Öz sərsəm çıxışlarında Qarabağda, Azərbaycanın ərazi bütövlüyü uğrunda həlak olmuş azərbaycanlı, talış, ləzgi, rus, yəhudi və digər millətlərdən olan insanları şəhid yox, “lazımsız qurbanlar” adlandıran bir insana ağıllı demək mümkün deyil. Talış xalqına heç bir etnik, bioloji bağlılığı olmayan separatçı Ələkrəm Hümmətovun İrəvan və Xankəndindəki çıxışları, konkret olaraq talış xalqını, bu xalqın Qarabağ uğrunda şəhid olmuş övladlarının ruhunu alçaltmaqdır. Azərbaycanın ağır illərində bütün azsaylı xalqlar kimi, talışlarda silaha sarılaraq vətənin müdafiəsinə qalxıblar və bu mübarizədə canlarını qurban veriblər. Talış xalqının yüzlərlə, minlərlə oğlu Qarabağda şəhid olub. Onların ruhu heç vaxt Ə. Hümmətov kimi vətənsiz xaini bağışlamaz. Azərbaycan Kommunist Partiyası, Azərbaycanın dövlət suverenliyini və ərazi bütövlüyünü parçalamaq məqsədi ilə separatçı qüvvələrin başında duran və buna görə də Azərbaycan Respublikasının vətəndaşlığından məhrum olunan, ölkədən qovulmuş Əlikram Hümbətovun öz separatçı siyasətini xaricdə davam etdirməsi faktını kəskin pisləyir. Azərbaycan ərazisində çiyin-çiyinə yaşamış müxtəlif millətlər arasında “düşmənçilik toxumu səpən” belə naqis satqınların bu hərəkətlərini, xalqımızın düşmənlərinə xidmət göstərməsi kimi qiymətləndirir”, – deyə bəyanatda qeyd olunur.

Xatırladaq ki, bir müddət öncə, Azərbaycandan deportasiya olunmuş və hazırda mühacirətdə yaşayan Ə. Hümmətov İrəvana və Dağlıq Qarabağdakı separatçı rejimə səfər edib.

Aqşin Kərimov