AMAC BÜTÖV AZƏRBAYCANIN QURULMASI ÜÇÜN AND İÇƏRƏK YOLA BAŞLADI.

Azərbaycan Milli Azadlıq Cəbhəsi Partiyası (AMAC) Bakının işğaldan azad olunmasının 95 illiyi ilə əlaqədar Bakı-Şamaxı yolundakı türk məzarlığında təsis yığıncağı keçirilib. Azərbaycan siyasi tarixində bir ilkə imza atan AMAC türk şəhidlərinin məzarlığını Azərbaycan-Türkiyə dostluğunun və bütövlükdə türk dünyası birliyinin simvolu kimi qəbul edərək burda həm də gələcək mübarizə və yeni mücadilə adına and içib.
Müqəddəs ziyarətdə keçirilən təsis yığıncağında AMAC təskilat komitəsinin sədri Hürrü Əliyev çıxış edərək partiyanın məram və məqsədindən danışıb, M.Ə.Rəsulzadə ilə başlayan Ə.Elçibəyin davam etdirdiyi Milli Azadlıq Hərəkatının Bütöv Azərbaycan dövləti qurulana qədər davam etdiriləcəyini və AMAC-ın bu yolda mübarizə aparacağını bildirib.
AMAC mətbuat xidmətindən “Butov.az”a verilən məlumata görə partiyanın təşkilat komitəsində MAH-nın fəalları və tanınmış ziyalılar təmsil olunur.Təşkilatın ilk məqsədi bütün vətənpərvər milli qüvvələri (aktiv vətənsevər gəncləri) ətrafına toplamaq, torpaqlarımızın azadlığı və bütövlüyü uğrunda dönmədən mübarizə aparmaqdır. Yaxın günlərdə təşkilat komitəsinin mətbuat üçün geniş açıqlama verəcəyi gözlənilir.