“Azəri Gənclər Alyansı” İctimai Birliyinin Azərbaycan Respublikasının QHT-lərə Dövlət Dəstəyi Agentliyinin maliyyə dəstəyi ilə həyata keçirdiyi “Erkən nikahlara yox!” adlı layihəsi sona çatır.

Butov.az xəbər verir ki, İB-dən Axar.az-a verilən məlumata görə, layihədə məqsəd ölkəmizdə erkən nikahların daha çox müşahidə olunduğu sərhədyanı bölgələrdə - Lerik və Astara rayonlarının orta məktəblərində 11-15 yaşlı yeniyetmə qızlar və onların valideynləri üçün təlimlər təşkil etmək idi. Təlimlərdə hədəf eyni zamanda, yeniyetmə qızları və onları zorla ərə verməyə çalışan valideynləri erkən nikaha sövq etməkdən çəkindirmək və beləliklə də ölkəmizdə erkən nikah probleminin maariflənmə yolu ilə qismən də olsa azalmasına töhfə vermək olub.

Aprel ayının 22-si və 24-də Astara rayonunun Heydər Əliyev Mərkəzində layihə çərçivəsində reallaşan sonuncu 2 günlük tədbirdə 11-15 yaşlarında 30 nəfər yeniyetmə gənc qızlar üçün interaktiv üsullarla maarifləndirici təlimlər keçirilib və mövzu ətrafında iştirakçılarla ətraflı müzakirələr aparılıb. Daha sonra isə yeniyetmə gənc qızların valideynləri ilə ayrılıqda ekspert və psixoloqun iştirakı ilə ictimai dinləmələr həyata keçirilib.

Tədbirdə “Azəri Gənclər Alyansı” İctimai Birliyinin sədri Leyla Sadıqova dünyada geniş yayılan erkən nikahlar haqqında geniş məlumat verib və bu problemin həlli yolunun məhz yaxşı təhsil alaraq vətənə nümunəvi vətəndaş olmaqdan ibarət olduğunu bildirib.

Tədbirin sonunda iştirakçı gənclərə sertifikatlar və təbliğat materialları paylanılıb.

Qeyd edək ki, layihə çərçivəsində “Biz erkən nikahlara yox deyirik!” adlı maarifləndirici sosial çarx hazırlanıb və yaxın günlərdə sosial media vasitəsilə ictimaiyyətə təqdim olunacaq.