Qarşıdan gələn yay çimərlik mövsümü ilə əlaqədar Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla xanım Əliyevanın təşəbbüsü ilə Bakı şəhərinin sahil kənarı ərazilərində yaradılan ictimai çimərliklərdə movsümə hazırlıq işləri başa çatıb.

Bu barədə Bakı Şəhər İcra Hakimiyyətindən məlumat verilib.

3 ildır ki, Abşeron yarımadasının Sahil, Buzovna, Novxanı, Görədil və Pirşağı qəsəbələrində, Səbail rayonunda, “Şıx” çimərlik ərazısındə - ümumilikdə 6 yerdə fəaliyyət göstərən bu çimərliklər şəhər sakinlərinin Leyla xanım Əliyevaya müraciətlərindən sonra paytaxtın dənizkənarı ərazilərində mövcud özəl istirahət mərkəzlərinə və çimərliklərə alternativ olaraq yaradılıb. Burada yaradılan şərait və ən başlıcası isə pulsuz xidmət göstərilməsi Bakı sakinləri və şəhərimizin qonaqlarının böyük rəğbətini qazanıb.

Çimərlik mövsümü ərəfəsində ictimai çimərliklərdə lazımi təmizlik-abadlıq işləri aparılıb. Qış ərzində dəniz sahilinə yığılan tullantılar, həmçinin dalğaların sahilə atdığı müxtəlif əşyalar yığışdırılılıb, digər təmizlik işləri görülüb. Çimərliklərdəki inventarlar, günlüklər, söhbətgahlar, sanitariya qovşaqları və duşlar yoxlanılır, qaydaya salınır, cari təmir işləri, bir sıra yerlərinin rənglənməsi aparılır.

Eyni zamanda rəsmi çimərlik olmayan ərazilər də nəzarətdən kənarda qalmayıb, rayon icra hakimiyyətləri, kommunal xidmətlər bu ərazilərin təmizliyini nəzarətdə saxlayacaqlar. Çimərliklərdə Fövqəladə Hallar Nazirliyinin xilasetmə məntəqələri, həmçinin tibb məntəqələri yaradılacaqdır. Çimərliklərdə asayişin qorunması üçün polis orqanları gücləndirilmiş iş rejimində çalışacaqlar.

Hər il olduğu kimi, Bakı Nəqliyyat Agentliyi tərəfindən vətəndaşların çimərliklərə gəlişinin təminatı üçün yeni avtobus marşrutları yaradılacaq, bəzi marşrutlar dəniz sahilinə kimi uzadılacaqdır.
Həmçinin mövsümə hazırlıq işləri dənizkənarı ərazilərdə yerləşən istirahət mərkəzləri və özəl çimərliklərdə də aparılır, vətəndaşların istirahəti üçün lazımi şərait yaradılır.

Mövsüm ərzində Bakı Şəhər İcra Hakimiyyəti və onun qurumları tərəfindən çimərlik əraziləri nəzarətdə saxlanılacaq, mütəmadi monitorinqlər keçiriləcək.