Dövlət İmtahan Mərkəzi (DİM) Direktorlar Şurasının növbəti iclası keçirilib.

Butov.az xəbər verir ki, DİM-dən Teleqraf.com-a verilən məlumata görə, iclasda ali təhsil müəssisələrinin və AMEA-nın magistraturalarına və rezidenturaya, ali və orta ixtisas təhsili müəssisələrinə elektron ərizə qəbulu, dövlət qulluğuna qəbulla bağlı mövcud vəziyyət və digər cari məsələlər müzakirə olunub.

Daha sonra Şura üzvlərinə magistratura və rezidenturaya ərizə qəbulunun başa çatması, ötən illə müqayisədə magistraturaya ərizə verənlərin sayının nisbətən azalması haqqında məlumat verilib. Rezidenturaya qəbul olmaq üçün müraciət edənlərin
sayı isə cüzi azalıb.

İclas iştirakçılarının diqqətinə 2016-cı və 2017-ci illərdə ərizə vermiş namizədlər barədə müqayisəli statistik məlumatlar təqdim olunub. Şura üzvləri məsələ ətrafında müzakirə apararkən qeyd ediblər ki, şübhəsiz, imtahanların ödənişli olması ərizə verənlərin sayının azalmasına səbəb olan amillərdən biridir. Eyni zamanda bildirilib ki, əvvəllər imtahanda iştirak üçün tələb olunan məbləğ (2 manat) simvolik idi, buna görə də namizədlərin müəyyən hissəsi hazırlıqlı olmasa belə, qeydiyyatdan keçirdi və ya qeydiyyatdan keçib imtahana gəlmirdilər.

Ötən il magistraturaya qəbul imtahanının birinci mərhələsində iştirak etmək üçün qeydiyyatdan keçmiş bakalavrlardan 1695 nəfəri imtahana gəlməyib. İmtahanın ikinci mərhələsində isə tələb olunan müsabiqə şərtlərini ödəyən və imtahanda iştirak etmək hüququ olanların sayı 9061 nəfər olub.
Onlardan da 432 nəfəri imtahanın ikinci mərhələsinə gəlməyib. Beləliklə, ötən il qeydiyyatdan keçmiş 24110 bakalavrdan cəmi 8629 nəfəri imtahanın ikinci mərhələsində iştirak edib.

Qeyd olunanlara əsasən, bu il daha bilikli, öz potensialına güvənən, magistratura səviyyəsində təhsilini davam etdirmək üçün aydın məqsədi və istəyi olan namizədlərin ərizə qəbulunda iştirakı gözlənilirdi və bu, qeydiyyatdan keçənlərin sayının ötən ilə nisbətən az olmasını şərtləndirən əsas amillərdəndir.

Magistraturaya qəbul olan oğlanlara təhsil müddətində hərbi möhlət hüququnun verilməsi amili bu il magistraturaya ərizə verənlərin arasında oğlanların sayının (faiz nisbətində) çoxalmasına səbəb olduğu vurğulanıb.

Dövlət qulluğuna qəbulla əlaqədar mövcud vəziyyət barədə bildirilib ki, dövlət qulluğu sahəsində müəyyən normativ-hüquqi aktların təsdiqi bizdən asılı olmayan səbəblərdən gecikir. Ona görə də, dövlət orqanlarından mütamadi olaraq vakansiyalar barədə məlumatlar daxil olmasına baxmayaraq dövlət qulluğuna qəbul prosedurlarını lahiyələndirmək və həyata keçirmək hələlik mümkün deyil.