Arif MəmmədliDostumuz, şair-publisist Mənsur Ələkbərovun ilk baxışdan çox kiçik görünən "böyük" bir problemini sizinlə paylaşmaq istəyirəm. Dostumuz VIII sinifdə oxuyan oğlu Murada şəkilsiz şəxsiyyət vəsiqəsi almaq istəyərkən bu problemlə üzləşib. Əslində problemin kökü bir qədər əvvələ gedib çıxır. Belə ki, Mənsur özü şəxsiyyət vəziqəsi alarkən məlum olub ki, doğum şəhadətnaməsində Mansur yazılıb. O, izah etməyə çalışıb ki, mən Qərbi Azərbaycanda doğulmuşam. Orada Şəhadətnamə iki dildə: rus və erməni dilində yazılırdı. Rus dilində "ə" hərfi olmadığından sənəddə "a" yazıblar. Yəni
Mənsur əvəzinə Mansur. Diplomda, iş yerində, digər vəsiqələrində də Mənsur yazılıb. İsrarla deyiblər ki, mümkün deyil, şəxsiyyət vəsiqəsində Mansur yazılmalıdır. O qədər sənəd istəyiblər ki, axırda bezərək "nə yazırsız, yazın" deyib. Beləcə şəxsiyyət vəsiqəsində Mansur adı rəsmiləşib. İndi isə "ciddi araşdırmalar" aparılır. Görək nəticəsi necə olacaq? Necə deyərlər, bu "aktual" problemi" diqqətdə saxlayacaq, ictimaiyyətə vaxtaşırı məlumatlar verəcəyik. Sonra deyirsiz ki, məmurlar işləmir. Deməli, istəsələr gözlərindən tük də yayına bilməz. Belə çıxır ki, Azərbaycanda erməni adlarının "milliləşdirilməsi"ndə yerli məmurların "zəhməti" çox olub. Texniki yanlışlıq istisnadır.
Zəruri qeyd: 2013-cü ildə böyük oğlu Abbasa şəkilsiz vəsiqə alarkən nədənsə bu problemi "görməyiblər". Yəni atasının adını Mənsur yazıblar. Görünür, arada "şirinlik" məsələsi olub.
P.S. Hörmətli hüquqşünaslar, görəsən bu problemin sadə həll yolu varmı?