2-11-2022, 20:59
Zelenski danışıqları rədd etdi - "Xəstədirlər, dəlidirlər..."
“Rusiya ilə danışıqlardan söhbət gedə bilməz, çünki Rusiya Federasiyası terrorçu ölkədir”. Bunu Ukrayna prezidenti Volodimir Zelenski bildirib. Zelenski qeyd edib ki, müharibənin sonu yalnız Ukraynanın Donbass və Krım da daxil olmaqla, Rusiyanın işğal etdiyi bütün əraziləri geri qaytarması ilə baş verəcək. Ukrayna lideri qeyd edib ki, kiminsə onu ruslarla razılaşmalara sövq edib-etməməsinin üçün fərqi yoxdur: "Baş verənlər məlumdur, burada bizim üçün yeni heç nə sürpriz yoxdur. Mən bu hekayənin necə bitəcəyini artıq bilirəm". Zelenski vurğulayıb ki, Rusiya hökuməti diplomatik yolla getmək əvəzinə sadəcə yalan danışır. Ona görə də onun fikrincə, Kremllə danışıqlardan söhbət gedə bilməz:"Dünən bizə dedilər ki, müharibəni dayandırmaq istəyirlər, bu gün isə 54 raketlə bizə hücum etdilər. Dəlidilər, xəstədirlər? Yarım gündə 54 raketlə bizə hücum etsələr, onlarla nə danışaq? Onlar Sanki başqa planetdə yaşayırlar”.
2-11-2022, 20:57
QHT-lər mina terroru ilə bağlı bəyanat yaydı
“2020-ci il Vətən müharibəsinin bitməsinə baxmayaraq, ölkəmizin mülki şəxslərini hədəfə alan və Ermənistan tərəfindən törədilən mina terroru bu gün də davam etməkdədir”. Bu fikirlər Azərbaycanın qeyri-hökumət təşkilatlarının Ermənistanın törətdiyi mina terroru ilə bağlı bəyanatında əksini tapıb. Qeyd olunub ki, Ermənistan bütün tarixi dövrlərdə Azərbaycanın mülki əhalisinə münasibətdə beynəlxalq hüququn prinsip və normalarına qarşı hərəkət edib. “Onlar istər I Qarabağ müharibəsində, istərsə də Vətən müharibəsində terror hadisələrini, Azərbaycan əhalisinə qarşı soyqırım istəklərini heç vaxt gizlətməmişlər və dinc Azərbaycan əhalisinin qətlinə səbəb olmuşlar. Hətta 2020-ci il Vətən müharibəsinin bitməsinə baxmayaraq, ölkəmizin mülki şəxslərini hədəfə alan və Ermənistan tərəfindən törədilən mina terroru bu gün də davam etməkdədir”, - bəyanatda vurğulanıb. Bildirilib ki, otuz il ərzində Azərbaycan ərazisinin 20 faizini işğal altında saxlayan Ermənistan bu torpaqlarda 1 milyondan çox mina basdırıb. Əsasən Ermənistan və başqa ölkələrin istehsalı olan bu minaların partlaması nəticəsində təkcə Vətən müharibəsindən sonra keçən iki il ərzində 267 nəfər Azərbaycan vətəndaşı həlak olub və ya ağır yaralanıb:“Bu günədək minaların təmizlənmə prosesi zamanı on minlərlə mina və partladılmamış hərbi sursat tapılaraq məhv edilmişdir. Azərbaycan hökuməti dəfələrlə Ermənistandan mina xəritələrini tələb etsə də, Ermənistanın buna cavabı adekvat olmamışdır. Ermənistan tərəfindən verilən mina xəritələri isə ümumi minalanmış ərazilərin çox kiçik faizini əhatə etmişdir və həmin sənədlərdə verilən məlumatın dəqiqliyi və etibarlılığı çox aşağı səviyyədədir”. QHT-lərin birgə bəyanatında diqqətə çatdırılıb ki, bu gün Azərbaycan Respublikası işğaldan azad olunmuş ərazilərdə quruculuq və bərpa işlərini öz daxili resursları hesabına görür. İşğal dövründə dağıdılmış bu ərazilərin işğalçılar tərəfindən minalarla çirklədirilməsi və işğaldan azad olunmuş bu torpaqların minalardan təmizlənmə prosesinin uzun müddət çəkməsi bərpa prosesini ciddi şəkildə ləngidən amillərdən biridir: “Zamanında Ermənistanın bu hərbi cinayətə getməsi perspektivdə həm də mümkün quruculuq işlərinə zərbə vurmaq məqsədilə baş vermişdir. Təəssüf hissi ilə qeyd edirik ki, azad edilmiş ərazilərimizdə mövcud olan mina problemi bu gün həm bərpa prosesini və məcburi köçkünlərin doğma yurdlarına qayıdışını ləngidir, həm də bir terror hadisəsi olaraq çoxsaylı insanların həyatına son qoyur və ya ömürlük əlillik dərəcəsi almalarına səbəb olur”. Bəyanatda vurğulanıb ki, Ermənistanın Azərbaycana qarşı törətdiyi və əsasən dinc sakinləri hədəfə alan mina terroru bütövlükdə bəşəriyyət əleyhinə yönəlmiş hərbi cinayət, sülhə və sabitliyə ciddi təhlükədir: “Hər bir partlayan mina sadəcə kiminsə həyatına və sağlamlığına son qoymur. Bu, yalnız mina təsirinə birbaşa məruz qalmışlar və onların yaxınları ucun faciə deyil. Bu, eyni zamanda, yeni nifrət dalğalarının mənbəyidir. Bununla yanaşı mina terroru Azərbaycan və Ermənistan arasında davamlı sülh üçün münbit şəraitin əldə edilməsinin qarşısını alır. Minalar müharibə və zorakılıq toxumlarıdır, və biz dünyanın bütün xoşməramlı insanlarından dəstək istəyir, mütərəqqi qüvvələri mina terroruna qarşı mübarizə aparmaq üçün birləşməyə çağırırıq. Bu səbəbdən biz, Azərbaycanda fəaliyyət göstərən qeyri-hökumət təşkilatları dünya ictimaiyyətinə və beynəlxalq təşkilatlara üz tutaraq, Ermənistanın törətdiyi müharibə cinayətlərinin beynəlxalq qurumlar tərəfindən araşdırılmasını, ərazilərin minalanması və xəritələrin təqdim edilməməsinə hüquqi-siyasi qiymət verilməsini və beynəlxalq ictimaiyyətdən, beynəlxalq təşkilatlardan Ermənistanın insanlıq əleyhinə törətdiyi cinayətlərə görə cəzalandırılmasını tələb edirik”.
2-11-2022, 20:54
Ağdamda yeni istehsal sahələri yaradılır
İqtisadi Zonaların İnkişafı Agentliyinin (İZİA) idarəçiliyində olan Ağdam Sənaye Parkında daha 4 sahibkarlıq subyektinə rezidentlik statusu verilib, bununla da Sənaye Parkının rezidentlərinin sayı 11-ə çatıb. Butov.az xəbər verir ki, yeni rezident “Rail Trans Service” Məhdud Məsuliyyətli Cəmiyyəti Sənaye Parkının 1 hektar ərazisində “Avtomatlaşdırma və telemexanika sistemlərinin istehsalı” layihəsini həyata keçirəcək. Layihə çərçivəsində müxtəlif növ dəmir yolu avadanlıqları istehsal ediləcək. Məlumata görə, investisiya dəyəri 5,7 milyon manat olan müəssisədə 45 daimi iş yeri açılması nəzərdə tutulur. Ağdam Sənaye Parkının digər yeni rezidenti “Mister Decor” Məhdud Məsuliyyətli Cəmiyyəti tərəfindən Sənaye Parkının 1 hektarında divar kağızlarını istehsal edəcək müəssisə inşa olunacaq. İnvestisiya dəyəri 6,5 milyon manat olan müəssisədə 76 nəfər daimi işlə təmin olunacaq. Daha bir yeni rezident “Almet Holding” Qapalı Səhmdar Cəmiyyəti Sənaye Parkının 1 hektar ərazisində “Müxtəlif növ dəmir məmulatlarının istehsalı” layihəsini həyata keçirəcək. Layihə çərçivəsində polad həsir, mismar, bolt, məftil, eləcə də sinkli məftil istehsal ediləcək. Layihənin investisiya dəyəri 13 milyon manatdır. Layihə çərçivəsində 100 nəfər daimi işlə təmin ediləcək. Sənaye Parkının yeni rezidenti “Eel Electric” MMC “Elektrik paylayıcı avadanlıqların və elektrik yuvalarının istehsalı” layihəsi icra edəcək. Layihə çərçivəsində 10 və 35 kV-luq elektrik yuvalarının, eləcə də 0,4 kV-luq elektrik paylayıcı qurğu və idarəetmə lövhələrinin istehsalı planlaşdırılır. İnvestisiya dəyəri 1,4 milyon manat olan müəssisədə 30 nəfər daimi işlə təmin ediləcək. Müəssisələrdə istehsal olunan məhsullarin daxili bazarın tələbatını ödəməklə yanaşı, ixracı da nəzərdə tutulur.
2-11-2022, 15:22
Cəbrayıldakı mina partlayışının səbəbi açıqlandı
Daxili İşlər Nazirliyi (DİN) Cəbrayıl rayonunun Mehdili kəndində baş verən mina partlayışı barədə məlumat yayıb. DİN Mətbuat Xidmətindən verilən məlumata görə, 1972-ci il təvəllüdlü Əhmədov İlqar Heybət oğlu müəyyən olunan təhlükəsiz marşrutdan kənara çıxması səbəbindən piyada əleyhinə minaya düşüb. Tikinti işləri ilə əlaqəli daşınma-tədarük işləri həyata keçirən sürücü polis əməkdaşları tərəfindən təhlükəli ərazidən çıxarılaraq təxliyyə edilməklə xəstəxanaya çatdırılıb. Araşdırmalar davam etdirilir.
2-11-2022, 15:20
Köçəryan Paşinyana qarşı mitinqə çıxır
Ermənistanın ikinci prezidenti Robert Köçəryan müxalifətin “Müqavimət” hərəkatının mitinqində iştirak edəcək. Butov.az xəbər verir ki, məlumatı Sputnik Ermənistan-a eks-dövlət başçısının ofisinin koordinatoru Baqrat Mikoyan təsdiqləyib. Eyni zamanda o əlavə edib ki, Köçəryanın mitinq zamanı çıxışı planlaşdırılmayıb. Parlamentin “Hayastan” fraksiyasının üzvü İşxan Saqatelyan bir müddət əvvəl bildirmişdi ki, noyabrın 5-də müxalifət Dağlıq Qarabağın suverenliyi və Ermənistan Respublikasının ərazi bütövlüyünün müdafiəsi üçün birlik mitinqi keçirəcək. Saqatelyan qeyd edib ki, noyabrın 5-dən sonra mübarizə davam etdiriləcək və mitinqdə növbəti aksiyalar elan olunacaq.
2-11-2022, 15:18
İtaliya Ukraynaya hərbi yardımı dayandırdı
İtaliya Kiyevə altıncı hərbi yardım paketinin göndərilməsini dondurmaq qərarına gəlib. Butov.az xəbər verir ki, hökumətdəki mənbələrin bildirdiyinə görə, Ukraynaya hərbi yardım əməliyyatı ilk növbədə NATO ilə razılaşdırılmalıdır. "Yalnız bundan sonra biz Kiyevin nəyə ehtiyacı olduğunu və hansı silahlarla təmin edə biləcəyimizi anlayacağıq", - deyə mənbə bildirib. İtaliyanın Ukrayna tərəfinə yardımı ilə bağlı digər təfərrüatlar hələlik verilməyib.
2-11-2022, 15:13
Cəbrayılda mina partlayışı - Sürücü yaralandı
Cəbrayıl rayonunda mina hadisəsi baş verib. Azərbaycan Respublikasının Minatəmizləmə Agentliyinin (ANAMA) Mətbuat Xidmətindən verilən məlumata görə hadisə 2022-ci 2 noyabr tarixində Cəbrayıl rayonunun Mehdili kəndində minalardan təmizlənməmiş ərazidə piyada-əleyhinə minanın partlayışı baş verib. Məlumata əsasən mina partlayışı nəticəsində “İmprotex Industries” şirkətinin sürücüsü, 1972-ci il təvəllüdlü Əhmədov İlqar Heybət oğlu xəsarət alıb. Zərərçəkən şəxsin sol əlində üç barmağı amputasiya edilib.
2-11-2022, 15:10
İlham Əliyevin posterləri İran küçələrinə vuruldu
Son zamanlar Azərbaycan-İran münasibətlərinin gərginləşməsi fonunda Cənubi Azərbaycanda yaşayan soydaşlarımız maraqlı aksiyaya başlayıblar. Butov.az xəbər verir ki, Təbriz, Ərdəbil və digər şəhərlərdə küçələrə Azərbaycan Prezidenti İlham Əliyevin fotosu olan posterlərin vurulması sosial şəbəkələrin Azərbaycan seqmentində müzakirələrə səbəb olub. Fotonun üzərində isə “Güney Azərbaycan sizin arxanızdadır, cənab Prezident” yazısı qeyd olunub. Diqqəti çəkən nüanslardan biri fotoda olan yazının farsca deyil, məhz əski Azərbaycan əlifbası ilə yazılması olub. Artıq Azərbaycan Televiziyasının rəsmi facebook hesabında da bununla bağlı paylaşım edilib. Qeyd edək ki, son aylar bütün müstəvilərdə Azərbaycan – İran arasında gərginlik yaşanır. Ötən gün isə DTX-nin keçirdiyi əməliyyat nəticəsində Azərbaycanda İran xüsusi xidmət orqanının nəzarəti altında yaradılmış qanunsuz silahlı birləşmə ifşa edilib.
2-11-2022, 15:07
İndiyədək 9 azərbaycanlı jurnalist şəhid olub
“Ermənistanın Azərbaycana qarşı hərbi təcavüzü nəticəsində 9 azərbaycanlı jurnalist şəhid olub”. Bu barədə Azərbaycan Xarici İşlər Nazirliyinin twitter - də etdiyi paylaşımda bildirilib. Qeyd edilib ki, bununla bağlı ədalət təmin olunmalıdır.
2-11-2022, 15:03
Polşa Rusiya ilə sərhəddə hasar çəkir
Polşa hakimiyyəti Rusiyanın Kalininqrad vilayəti ilə sərhəddə hasarın tikintisinə başlayıb. Bu barədə ölkənin Baş nazirinin müavini, Polşa Müdafiə Nazirliyinin rəhbəri Mariuş Blaşak bildirib. "Artıq bu gün Polşa ordusunun istehkamçılarının, əsgərlərinin Polşa-Rusiya sərhədində müvəqqəti səddin tikintisinə başlanılıb", - nazir bildirib. O, hasarın tikanlı məftillə tikiləcəyini, hündürlüyünün 2,5 metr, eninin isə üç metr olacağını bildirib. Blaşak izah edib ki, hasarın tikintisi ilə bağlı qərar Rusiya tərəfinin Kalininqrad vilayətində Yaxın Şərq və Şimali Afrikadan gələn təyyarələr üçün hava limanını açması ilə bağlıdır. Onun sözlərinə görə, bu, Polşaya miqrasiya axınının artması təhlükəsi yaradır.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!