24-02-2024, 20:20
Navalnının nəşi anasına verildi
Bir neçə gün əvvəl vəfat edən rusiyalı müxalifətçi Aleksey Navalnının nəşi anasına verilib.
Bu barədə siyasətçinin komandası “Telegram” kanalında məlumat yayıb.
Onun harada dəfn ediləcəyi ilə bağlı məlumat verilməyib.
24-02-2024, 19:56
“Səbail” “Sabah” üzərində qələbə qazandı
Futbol üzrə Azərbaycan Premyer Liqasında XXIV turun daha bir oyunu keçirilib.
Günün ikinci matçında “Səbail” doğma meydanda “Sabah”ı qəbul edib. Görüş “Dənizçilər”in 2:0 hesablı qələbəsi ilə yekunlaşıb.
Hesabı 52-ci dəqiqədə Aleksandr Ramalinqom açıb. Samir Abdullayev 90+2-ci dəqiqədə fərqlənərək matçın yekun nəticəsini müəyyənləşdirib.
Günün ilk oyununda “Turan Tovuz” və “Neftçi” qollu heç-heçə edib – 1:1.
Bu nəticədən sonra xallarını 34-ə çatdıran “Səbail” 4-cü pilləyə yüksəlib. “Sabah” isə 31 xalla yeddinci yerdə qərarlaşıb.
Ötən gün keçirilmiş açılış matçında “Kəpəz” “Qəbələ”ni 2:1 hesabı ilə məğlub edib.
Tura fevralın 25-də keçiriləcək “Araz-Naxçıvan” – “Zirə” və “Qarabağ” – “Sumqayıt” oyunları ilə yekun vurulacaq.
24-02-2024, 19:41
Ermənistan növbəti dəfə təxribatı törətdi
Azərbaycan Müdafiə Nazirliyi fevralın 24-ü saat 12:45-də Ermənistan silahlı qüvvələrinin Basarkeçər rayonunun Yuxarı Şorca yaşayış məntəqəsi istiqamətində yerləşən mövqelərindən Ordumuzun Kəlbəcər rayonunun Yellicə yaşayış məntəqəsi istiqamətindəki mövqelərinin atıcı silahlardan atəşə tutulması barədə rəsmi məlumat verib.
Bu barədə Azərbaycan Müdafiə Nazirliyindən bildirilib.
Atəşin bu koordinatlarda (40° 05' 04" N; 45° 52' 28" E coğrafi koordinatlarda) yerləşən Ermənistan silahlı qüvvələrinin postundan açıldığı dəqiqliklə müvafiq müşahidə vasitələri ilə təsbit edilib.
Bundan bir müddət sonra Ermənistanın Müdafiə Nazirliyi törətdiyi silahlı təxribatı ört-basdır etmək məqsədilə guya atəşin bölmələrimiz tərəfindən açılması barədə məlumat yayıb və bu dezinformasiyanı inandırıcı etmək məqsədilə bölmələrimizin mövqelərinin koordinatlarını da qeyd edib.
Bildiririk ki, həmin istiqamətdən bölmələrimiz tərəfindən atəş açılmayıb və şərti sərhəddə sabitliyin davamlılığını təmin etmək üçün qarşı tərəfin təxribatı ilə bağlı cavab tədbiri görülməyib.
24-02-2024, 18:47
Ağdamda baş vermiş qətllə bağlı təfərrüatlar müəyyənləşib
Baş Prokurorluq və Daxili İşlər Nazirliyi əməkdaşlarının birgə fəaliyyəti nəticəsində 4 il əvvəl itkin düşmüş Ağdam rayon sakini, 1996-cı il təvəllüdlü Nərgiz Nəcəfovanın qəsdən öldürülməsi müəyyən edilib.
Bu barədə Baş Prokurorluq və Daxili İşlər Nazirliyinin birgə məlumatında deyilir.
Belə ki, Nərgiz Nəcəfovanın 2020-ci ilin aprel ayının 29-da itkin düşməsi faktı üzrə Ağdam rayon prokurorluğunda Cinayət Məcəlləsinin müvafiq maddəsi ilə başlanmış cinayət işi üzrə həyata keçirilmiş çoxsaylı istintaq və əməliyyat-axtarış tədbirləri nəticəsində onun yaşadığı evdə yatdığı zaman qisas məqsədilə 1965-ci il təvəllüdlü atası Şikar Nəcəfov və ögey anası 1983-cü il təvəllüdlü Ramilə Nəcəfova tərəfindən boğularaq və bədəninin müxtəlif nahiyələrinə dəmir parçası ilə vurularaq qəsdən öldürülməsinə əsaslı şübhələr müəyyən edilib.
Toplanmış sübutlar əsasında Şikar Nəcəfov və Ramilə Nəcəfova Cinayət Məcəlləsinin 120.2.1 (qabaqcadan əlbir olan bir qrup şəxs tərəfindən adam öldürmə) və 120.2.9-cu (təqsirkar üçün aşkar surətdə köməksiz vəziyyətdə olan adamı öldürmə) maddələri ilə təqsirləndirilən şəxs qismində cəlb olunaraq onlara həmin maddələrlə ittiham elan edilib, müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə onların hər ikisi barəsində həbs qətimkan tədbiri seçilib.
Hazırda iş üzrə ibtidai istintaq davam etdirilir.
İtkin düşmüş şəxslərin axtarışları daim diqqət mərkəzində saxlanılmaqla onların tapılması istiqamətində prokurorluq orqanları tərəfindən mütəmadi olaraq aidiyyəti dövlət qurumları ilə birgə kompleks tədbirlər həyata keçirilir.
24-02-2024, 17:49
Gürcüstan prezidentindən Ukraynaya dəstək
Gürcüstan prezidenti Salome Zurabişvili Rusiya-Ukrayna müharibəsinin 2-ci ilinin tamam olmasına münasibət bildirib.
Zurabişvili 2 il davam edən şiddətli döyüşlərdən sonra belə Rusiyanın qalib gələ bilmədiyini vurğulayaraq, onu qınayıb.
“İki il... İki il keçdi, amma Rusiya qalib gəlmədi.
Rusiya Ukraynanının qüdrətini qıra bilməzdi. Rusiya Ukraynanaı parçalayıb onu Avropadan ayıra bilməzdi. Sizinlə həmrəylik yekdildir, dəstək göz qabağındadır, uğur və qələbə sizindir”,, - Zurabişvili Ukraynaya videomüraciətində bildirib.
24-02-2024, 17:43
Saakaşvili əzab çəkdiyini bildirdi
Gürcüstanın keçmiş prezidenti Mixail Saakaşvili hazırda Ukraynada ola bilməməsi və onu qoruya bilməməsindən əzab çəkdiyini bildirib.
Eks-prezident sosial şəbəkə hesabında yazıb:
“Əziz Ukrayna,
Bu iki il ərzində mənə ən çox əzab verən odur ki, Ukraynada deyiləm və fəxr etdiyim və çox darıxdığım sevimli qəhrəman müdafiəçilərimlə çiyin-çiyinə sizi qorumaqdan məhrum olmuşam.
Tez, layiqli qələbə arzulayıram, buna bir dəqiqə belə şübhə etmirəm”.
24-02-2024, 17:24
Ermənistan Belarusda keçirilən seçkilərə müşahidəçi göndərmədi
Ermənistanın nümayəndələri Belarusda keçirilən parlament seçkilərinə müşahidəçi qismində gəlməyiblər.
Bunu “Ria Novosti”yə KTMT PA-nın seçkilər üzrə missiyasının koordinatoru Alişer Ebayev deyib.
“KTMT-dən Ermənistan istisna olmaqla, demək olar ki, bütün ölkələrdən müşahidəçilər var. Bildiyiniz kimi, KTMT PA kollegial orqandır və onlar belə bir ictimai-siyasi tədbirdə iştirak etməli idilər, lakin bu, onların seçimidir”.
Belarusda ilk dəfə olaraq parlamentin aşağı palatası və yerli deputat şuralarına seçkilər bir səsvermə günü - fevralın 25-də keçiriləcək.
Çərşənbə axşamı, fevralın 20-də erkən səsvermə başlayıb və fevralın 24-ü axşamadək davam edəcək.
24-02-2024, 17:23
Şəhidin ev muzeyi ziyarət olunub
Müvəkkil Hüquq Mərkəzinin sədri, hüquq müdafiəçisi Səməd Vəkilov, Qarabağ müharibəsi iştirakçıları Əhməd və Mobil Vəkilovlar Bərdə rayonunun İmirli kəndində Vətən müharibəsi şəhidi Murad Musayevin ev muzeyini ziyarət ediblər.
Xatırladaq ki, Azərbaycan Ordusunun əsgəri Murad Musayev 27 sentyabr 2020-ci il tarixində Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan II Qarabağ müharibəsində iştirak etmişdir. Füzulinin azadlığı uğrunda gedən döyüşlərdə vuruşmuşdur. Murad Musayev 29 sentyabr 2020-ci ildə Füzuli rayonu istiqamətində döyüş tapşırığının yerinə yetirilməsi zamanı qəhrəmancasına şəhid olmuşdur. Şəhid olduğu gün nəşi doğulduğu Bərdə rayonunun İmirli kəndində dəfn edilmişdir.
Azərbaycan Respublikası Prezidenti İlham Əliyevin Sərəncamına əsasən Murad Musayev ölümündən sonra "Vətən uğrunda", "Füzulinin azad olunmasına görə", "Cəsur döyüşçü" medalları ilə təltif edilmişdir.
24-02-2024, 17:13
Ərdoğan Xocalıdan danışdı: “Dünya buna qarşı səsini çıxarmadı”
Azərbaycan torpaqları və onun bir parçası olan Qarabağ uzun illər işğal altında qaldı. Xocalı başda olmaqla torpaqlarda qırğınlar törədildi. Lakin dünya buna qarşı səsini çıxarmadı, heç bir görmədi.
Bunu Türkiyə Prezidenti Rəcəb Tayyib Ərdoğan Sakaryada keçirilən tədbirdə bildirib.
Ərdoğan deyib ki, türk milləti olaraq bu torpaqlarda sülh və əmin-amanlıq içində yaşamaq istəyiriksə, güclü ordumuz olmalıdır.
24-02-2024, 16:21
Xocalıdan bəhs edən “13” adlı filmin təqdimat mərasimi keçirildi
Fevralın 24-də Nizami Kino Mərkəzində “Obyektiv” Milli Dəyərlərin Təbliğinə Dəstək İctimai Birliyinin ərsəyə gətirdiyi “13” adlı bədii-sənədli filmin təqdimat mərasimi keçirilib. Xocalı itkinlərindən 13 nəfərin naməlum taleyini araşdıran film QHT-lərə Dövlət Dəstəyi Agentliyinin maliyyə dəstəyi ilə hazırlanıb.
Agentliyin icraçı direktoru Aygün Əliyeva qeyd edib ki, əsir, girov və itkinlər mövzusuna müvafiq QHT layihələrində geniş yer verilməsi əsas prioritetlərdən biridir.
Əsir və itkin düşmüş, girov götürülmüş vətəndaşlarla əlaqədar Dövlət Komissiyasının nümayəndəsi Eldar Səmədov itkinlərin axtarışı ilə əlaqədar işlərin son itkinin taleyi müəyyən edilənədək davam edəcəyini və artıq işğaldan azad edilən ərazilərdə 13 kütləvi məzarlığın aşkarlandığı bildirib.
Bədii-sənədli filmin müəllifi “Obyektiv” Milli Dəyərlərin Təbliğinə Dəstək İctimai Birliyinin sədri, telejurnalist və ssenarist Mübariz Əsgərov film üzərində peşəkar komandanın aylarla gərgin iş apardığını diqqətə çatdırıb.
Filmin rejissoru Elçin Elxanlı Xocalı soyqırımı mövzusunun ağırlığı və tarixi Zəfərin gətirdiyi təsəlli, ümid barədə danışıb.
Film 1992-ci ilin fevralında Xocalıda baş verən hadisələrə işıq salır. Belə ki, Xocalı soyqırımı zamanı 2 gün meşədə gizləndikdən sonra Dəhraz kəndi istiqamətində mühasirəyə düşərək girov götürülən bir qrup dinc əhali həmin kənddəki fermaya aparılır. Orada Ermənistanın müharibə cinayətkarları dinc insanlara amansız işgəncələr verir, fermada saxlanılan girovların içərisindən 13 nəfər gənc seçilərək naməlum istiqamətə aparılır. Həmin 13 nəfərdən bu günə qədər də xəbər yoxdur.
Təqdimat mərasimində çıxış edənlər itkinlər mövzusunda bu cür peşəkar işlənilmiş QHT layihələrinə, audiovizual əsərlərə, bədii və sənədli fimlərə böyük ehtiyac olmasından danışıblar.
Filmi fevralın 26-da saat 21:00-da AzTV-də izləmək mümkündür.
Bundan başqa, filmin ingilis dilindəki versiyası bu günlərdə xarici ölkələrdə də nümayiş olunacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!