2-02-2024, 17:08
Zelenski və Tokayev telefon danışığı apardı
Ukrayna Prezidenti Volodimir Zelenski qazaxıstanlı həmkarı Kasım-Jomart Tokayevlə telefon danışığı aparıb.
Bu barədə Zelenski “X”də yazıb.
Zelenski həmkarına Sülh Formulu görüşünün nəticələri və Qlobal Sülh Sammitinə hazırlıq barədə məlumat verib.
“Biz həmçinin ikitərəfli ticarəti və siyasi dialoqu inkişaf etdirmək yollarını müzakirə etdik”, - Zelenski yazıb.
O, həmçinin Ukraynaya göstərilən dəstəyə görə Tokayevə təşəkkür edib.
2-02-2024, 16:57
Xankəndidə Azərbaycan Ordusu gənclərinin forumu keçirildi
Xankəndi şəhərində Azərbaycan Ordusu gənclərinin forumu keçirilib.
2 Fevral – Azərbaycan Gəncləri Gününə həsr olunan bu forumda Müdafiə, Gənclər və İdman nazirliklərinin rəsmiləri, Azərbaycan Ordusunun qoşun növləri, birlik, birləşmə, hərbi hissə və xüsusi təyinatlı təhsil müəssisələrindən seçilən gənc zabit, gizir, çavuş, əsgər və kursantlar iştirak ediblər. Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani forum iştirakçılarını və qonaqları salamlayaraq, iki gün davam edən birinci forumda unudulmaz Heydər Əliyevin gənclərin fəaliyyət proqramına çevrilən tarixi nitqi barədə danışıb, Ulu Öndərlə bağlı xatirələrini bölüşüb. Ordu gənclərinə dahi liderin söylədiyi fikirlərlə müraciət edib.
Ordu gənclərinin Xankəndi forumunun proqramı və reqlamenti elan edildikdən sonra fəxri qarovul dəstəsi Şuşaya sancılan, Bakıda Azadlıq meydanında, ötən il noyabrın 8-də isə Xankəndi şəhərində keçirilən hərbi paradda nümayiş etdirilən Zəfər bayrağını salona gətirib. İştirakçılar Zəfər bayrağını ayaqda, alqışlarla qarşılayıblar. Gəncliyin böyük hamisi Ulu Öndər Heydər Əliyevin və respublikamızın suverenliyi, ərazi bütövlüyü uğrunda şəhidlik zirvəsinə ucalan Vətən övladlarının xatirəsi bir dəqiqəlik sükutla yad edilib, Dövlət Himni ifa olunub. Müdafiə Nazirliyi Şəxsi Heyət Baş İdarəsinin rəisi vəzifəsini icra edən general-mayor Elçin Xəlilov Müdafiə Nazirliyinin rəhbərliyi adından forum iştirakçılarına uğurlar arzulayıb. General-mayor E.Xəlilov müdafiə naziri general-polkovnik Zakir Həsənovun Azərbaycan Ordusu gənclərinin Xankəndi forumunun iştirakçılarına təbrikini çatdırıb.
Gənclər və İdman nazirinin müavini İndira Hacıyeva forum iştirakçılarını təmsil etdiyi nazirliyin rəhbərliyi adından 2 Fevral – Azərbaycan Gəncləri Günü münasibətilə təbrik edib, respublika gənclərinin mübariz dəstəsi olan ordu gənclərinin dünyanı heyrətə gətirmiş şücaət və igidliklərindən böyük iftixar hissi ilə söz açıb və Müdafiə Nazirliyinin ordu gənclərinə xüsusi diqqət və qayğı göstərdiyini, Xankəndi forumunun yüksək səviyyədə təşkil edildiyini məmnunluqla bildirib. Azərbaycan Ordusu gənclərinin Xankəndi forumu iştirakçılarının Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevə müraciəti səsləndirilib. “2 Fevral – Azərbaycan Gəncləri Günü” münasibətilə Azərbaycan Ordusunun hərbi qulluqçularının mükafatlandırılması haqqında Azərbaycan Respublikasının müdafiə nazirinin və müdafiə nazirinin birinci müavini – Azərbaycan Ordusunun Baş Qərargah rəisinin əmrləri forum iştirakçılarının nəzərinə çatdırılıb. Döyüş və ictimai-siyasi hazırlıqda əldə etdikləri uğurlara, hərbi hissələrin qarşısında qoyulmuş vəzifələrin həyata keçirilməsində fərqləndiklərinə və “2 Fevral – Azərbaycan Gəncləri Günü” münasibətilə ordu gənclərindən bir qrupuna Fəxri Fərman və qiymətli hədiyyələr təqdim olunub. Həzi Aslanov adına Ordu İdeoloji və Mədəniyyət Mərkəzinin yaradıcı kollektivinin ifa etdiyi vətənpərvərlik mahnı və rəqsləri forum iştirakçıları tərəfindən maraqla qarşılanıb. Forum iştirakçıları nahardan sonra Xankəndi şəhərinin mərkəzi meydanında olub, Müzəffər Ali Baş Komandanın ucaltdığı Azərbaycan Bayrağının dalğalanmasını fəxarət hissi ilə seyr edib, Xocalı və Əsgəran qalasını ziyarətdən xoş təəssüratlarla ayrılıblar.
2-02-2024, 13:27
Qurban Qurbanov AFFA-dan təzminat aldığına dair xəbərlərə münasibət bildirdi
“Belə bir informasiyanın çıxacağına inanmıram, çünki olmayıb. Müqavilə bağlanarkən də, pozularkən də orada hamı mənim tanıdıqlarım idi”.
Bu sözləri futbolinfo.az-a müsahibəsində “Qarabağ”ın baş məşqçisi Qurban Qurbanov deyib.
Təcrübəli mütəxəssis Azərbaycan milli komandasında işlədikdən sonra müqaviləsinin erkən pozulmasına görə AFFA-dan təzminat aldığına dair xəbərlərə münasibət bildirib:
“İlk növbədə prezident Rövnəq Abdullayev. Rövnəq müəllim və mən olan yerdə belə söhbət, ümumiyyətlə, ola bilməzdi. Abdullayevlə tanışlığımız hələ “Neftçi”dən başlayıb, bir yerdə işləmişik. İTV-dəki müsahibəmdə də demişəm, bəli, 6 illik danışılmışdı, rəsmi olaraq isə 3 illik müqavilə bağlanıldı. Bütün rəsmi müqavilələrdə bənd olur ki, əgər klub və ya federasiya tərəfindən əməkdaşlığa son qoyularsa, qalan dövrün təzminatı verilməlidir. Belə söhbətlərin yayılması xoş deyil, amma məndə də bu bənd var idi, işdən çıxarılacağım halda təzminatı almalıydım. Detallara girmək istəmirəm, amma işbirliyi başa çatanda mənə deyildi ki, təzminat da ödəniləcək. Mən həmən cavab verdim ki, narahat olmayın, mən təzminat məbləğini götürməyəcəm. AFFA-nın ovaxtkı baş katibi Elxan Məmmədovla təkbətək söhbətimiz oldu, o mənə bu barədə dedi. Daha sonra İcraiyyə Komitəsinin ümumi iclasında Rövnəq müəllim də bildirdi ki, təzminatı alacaqsan. Hər iki söhbətdə bildirdim ki, təzminat üçün yox, Azərbaycan futboluna müəyyən fayda vermək üçün gəlmişdim. İşləmədiyim dövr üçün haqq etmədiyim pulu istəmərəm və götürmədim də. O, federasiyanın, Azərbaycan futbolunun puludur, onu uşaq futboluna, stadionlara və s. xərcləmək daha məqsədəuyğundur. Bir il işləyib üç ilin pulunu almaq… Alsaydım, hansısa qanunu pozmazdım, müqavilədə göstərilmişdi, amma mən həmin məbləğdən imtina etdim”.
2-02-2024, 12:14
Sabahın havası
Fevralın 3-nə gözlənilən hava proqnozu açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə duman olacaq. Mülayim cənub-qərb küləyi gündüz şimal-qərb küləyi ilə əvəz olunacaq.
Havanın temperaturu gecə 1-4° isti, gündüz 6-9° isti olacaq. Atmosfer təzyiqi 763 mm civə sütunu olacaq. Nisbi rütubət 65-75 % olacaq.
Azərbaycanın rayonlarında havanın əsasən yağmursuz keçəcəyi gözlənilir. Arabir duman olacaq. Qərb küləyi əsəcək.
Havanın temperaturu gecə 3° şaxtadan 2°-dək isti, gündüz 7-12° isti, dağlarda gecə 5-10° şaxta, gündüz 0-5° şaxta olacaq.
Gecə bəzi dağlıq rayonlarda yolların buz bağlama ehtimalı var.
1-02-2024, 23:12
Sosial şəbəkələrdə gündəmə düşən yeniyetmənin atası üzr istədi
Sosial şəbəkələrdə çəkdiyi videolarla gündəmə gələn yeniyetmə Afiyəddin Cəlilovun atası Nihat Cəlilov oğlunun davranışılarına görə ictimaiyyətdən üzr istəyib.
O, bu barədə Baku TV-yə danışıb:
“Son zamanlarda olan bu hadisələr təbii ki, ailəmizi çox sarsıtdı. Oğlumun etdiyi hərəkətlər kiməsə mənəvi zərəri olubsa, hamıdan üzr istəyirəm. Bu hələ yeniyetmədir. Afiyyədin Bakıda tibb müəssisələrinin birində müalicəsini davam etdirir. Hər kəsə anlayışına görə təşəkkür edirəm”.
Qeyd edək ki, Azərbaycan Ali Sovetinin sədr müavini, daha sonra Prezidentin müşaviri olan mərhum Afiyəddin Cəlilovun nəvəsi 2009-cu il təvəllüdlü Əli-Afiyəddin metroda, avtobusda qeyri-adekvat hərəkətləri ilə gündəmə gəlib.
Yetkinlik yaşına çatmayan şəxsin sağlamlıq vəziyyəti nəzərə alınaraq müvafiq xəstəxanaya yerləşdirilməsi təmin olunub.
1-02-2024, 22:22
Sahibə Qafarova Fransanın davranışlarını kəskin tənqid etdi
Milli Məclisin sədri Sahibə Qafarova Azərbaycana rəsmi səfərə gələn Çex Respublikası Parlamenti Deputatlar Palatasının sədri Marketa Pekarova Adamovanın başçılıq etdiyi nümayəndə heyəti ilə görüşdə Fransanın Azərbaycana qarşı davranışlarını kəskin tənqid edib.
O, diqqətə çatdırıb ki, Fransa Cənubi Qafqazda sülhün əldə olunmasını istəmir və Ermənistanı silahla təmin edir. Bu, sülhə xidmət etməyən və yeni münaqişəni alovlandırmaq niyyətində olan yanaşmadır.
Spiker, həmçinin qarşı tərəfin diqqətinə çatdırıb ki, məhz Azərbaycan işğal siyasətinin qurbanı olmağına baxmayaraq Ermənistana beynəlxalq hüququn 5 prinsipi əsasında sülh sazişi imzalamağı təklif edib. Lakin münaqişənin başa çatmasından 3 il ötməsinə baxmayaraq, Ermənistan hələ də sülh müqaviləsini imzalamaqdan yayınır, üzərinə götürdüyü öhdəliklərinin icrasını ləngidir.
Milli Məclisin sədri Azərbaycanın bütün ölkələrin ərazi bütövlüyünə hörmətlə yanaşdığını, özünün də ərazi bütövlüyünə və suverenliyinə hörmətlə yanaşılmasını tələb etdiyini bildirib. Bununla belə o, diqqətə çatdırıb ki, Ermənistanın Konstitusiyasında və digər qanunvericilik aktlarında Azərbaycana qarşı ərazi iddiaları əksini tapır.
1-02-2024, 22:14
Zülfiyyə Xanbabayeva və Eldar Qasımov tanınmış şirkətin səfiri elan edildilər
İsveçrənin seçilmiş yüksək saat markası olan “Raymond Weil” Azərbaycanın Xalq artisti Zülfiyyə Xanbabayevanı və gənc müğənni, “Avroviziya-2011” Mahnı Müsabiqəsinin qalibi Eldar Qasımovu brendin 2024-cü il üzrə Azərbaycandakı səfirləri elan edib.
Bu barədə fevralın 1-də Bakıda “Raymond Weil” brendinin Azərbaycandakı rəsmi nümayəndəsi olan “VMF Company” MMC-nin təşkilatçılığı ilə keçirilən tədbirdə bildirilib.
Mərasimdə “Raymond Weil” Zülfiyyə Xanbabayeva və Eldar Qasımovla tərəfdaşlığını bəyan edib.
Daha sonra Zülfiyyə Xanbabayeva “Raymond Weil” tərəfindən Freelancer Lady saat kolleksiyasının brilyant daşlarla işlənmiş xüsusi modeli üçün “Brendin Xanım Səfiri” nominasiyası ilə, Eldar Qasımov isə İsveçrədə bütün kateqoriyalar üzrə qalib seçilmiş Millesime Kişi Saatları kolleksiyası üçün “Brendin Bəy Səfiri” nominasiyası ilə təltif olunub.
“Raymond Weil” brendi yarım əsrdən çoxdur ki, öz adını mediada ən uğurlu musiqiçilərlə birgə işıqlandırır.
Bu gün dünyaca məşhur müğənnilərlə əməkdaşlıq edən “Raymond Weil” musiqiyə olan ehtiramını və sevgisini qlobal marketinq strategiyasında istifadə edərək bütün müstəvilərdə musiqiçiləri dəstəkləyir.
“Raymond Weil” uzun illərdir ki, isveçrəli saatsazın və onun ailəsinin adını daşıyaraq, saat modellərində bu ailənin köklü mədəniyyətini və musiqiyə olan sevgisini təcəssüm etdirir.
Müstəqil ailə şirkəti olaraq “Raymond Weil” kübar xanımlar və kişilər üçün təkrarolunmaz klassik və zərif saatların istehsalı ilə İsveçrə saat sənayesində xüsusi yer alır.
1976-cı ildə əsası qoyulan şirkət hal-hazırda markaya öz adını verən Raymond Weilin nəvəsi Elie Bernheim tərəfindən idarə edilir. Əsas mərkəzi Cenevrədə yerləşən şirkət ildən-ilə inkişafını davam etdirərək bu gün İsveçrədə lider mövqeyə malik saat şirkətlərindəndir.
VMF Şirkəti 1997-ci ildən Azərbaycan saat bazarında ən son dəb, texnoloji yeniliklərlə zənginləşdirilən brend saatlarını alıcılara təqdim edir.
VMF Şirkətlər Qrupunun rəhbəri Vahid Mustafayevdir. VMF bu gün dünya şöhrətli 22 saat markasını bir arada toplayaraq, 22 satış məntəqəsində təmsil olunur.
1-02-2024, 21:50
Heç bir dövlət Azərbaycana təzyiq göstərə bilməz - Sahibə Qafarova
Danışıqlar masası arxasında heç kim və heç bir dövlət Azərbaycana təzyiq göstərə bilməz.
Bunu Milli Məclisin sədri Sahibə Qafarova Çex Respublikası Parlamenti Deputatlar Palatasının sədri Marketa Pekarova Adamovanın başçılıq etdiyi nümayəndə heyəti ilə görüşü zamanı deyib.
O xatırladıb ki, məhz Azərbaycan sülh təşəbbüslərini irəli sürüb və sülh danışıqlarını davam etdirməkdə maraqlıdır. Spiker Sahibə Qafarova deyib ki, Azərbaycan sülh istəyir və sülh sazişinin tezliklə imzalanacağına ümid edir.
Münaqişədən sonra işğaldan azad edilmiş torpaqlarda Azərbaycan hökumətinin başlatdığı irimiqyaslı bərpa-quruculuq işləri barədə danışan Milli Məclisin sədri, deyib ki, bu gün Azərbaycan böyük investisiyalar hesabına işğaldan azad edilmiş ərazilərdə genişmiqyaslı bərpa və yenidənqurma işləri aparır. Keçmiş məcburi köçkünlər artıq öz evlərinə qayıtmağa başlayıblar. Bu, Azərbaycanın yeni müharibədə maraqlı olmadığının sübutudur. O, Azərbaycan xalqının sülh istədiyini bildirib, ölkəmizin bu regionda davamlı sülhün və sabitliyin təmin olunması istiqamətində göstərdiyi səylərini qeyd edib.
1-02-2024, 21:09
Bayrağını sevən millətini də sevər
Aylardır tibb müəssisələrində süründürməçiliyə, qaşqabaqlı tövrlə get gələ salınan birinin qəfildən xoş rəftarla qarşılanması doğrudan doğruya adamı heyrətləndirir. Məni heyrətləndirən 19 Saylı Şəhər Poliklinikasında bir həftədir düyünə düşmüş Dövlət tibb müəssisələrində ixtisaslaşdırılmış tibbi xidmətlərin göstərilməsi üçün Göndəriş Vərəqəsinin bir anda tilsiminin qırılması oldu.
Beləki Elmi Tibbi Bərpa Mərkəzinin sığorta məsləhətçisi bizi səmimiyyətlə, gülərüzlə qarşılayıb müşkülümüzü çözdü. Onun yardımı sayəsində Göndəriş Vərəqəsi təzələnərək sistemə daxil edildi, elə həmin an da təsdiqləndi. İşimiz bitəndən sonra həmin otağa qayıdıb məsləhətçinin ad, soyadını soruşdum. Behbudova Aynur Cavanşir qızı,-dedi. Şəklini çəkməyə icazə istədim. Səbəbini soruşdu. Təşəkkür yazacağımı bildirdim. Nə təşəkkürü deyə, təəccübləndi. “Vətəndaş məmnunluğu təşəkkürü”,- dedim. Mən öz işimi görürəm, vəzifə borcumu yerinə yetirirəm,-dedi. Ona görə də heç bir təmənnam yoxdur.
Hər kəs öz işini belə vicdanla, görmür. Öz vəzifə borcunu sizin kimi ləyaqətlə yerinə yetirmir, deyə fikrimi bildirdim. Aynur xanımın iş yoldaşı, Elmi Təqdiqat Tibbi Bərpa Mərkəzinin “Xəstə xidmətləri” şöbəsində I və II Qarabağ Müharibəsinin iştirakçiları,veteranları, qaziləri və şəhid ailələrinin məsələləri ilə məşqul olan
Sözün düzü, indiki qarışıq zəmanədə iş yoldaşının uğuruna, xoş halına belə ürəkdən sevinən, canfəşanlıqla onun haqqını tanıdan az-az tapılar. Təranə İbrahimova Aynur Behbudovanın bütün tərcümeyi halını danışdı:
Sumqayıtda yaşamasına baxmayaraq bu uzaq yolu çox həvəslə gedib gəlir. Səhər saat səkkizin yarısında, ən gec gələndə səkkizdə işinin başında olur. Artıq kifayət qədər iş təcrübəsi də var. 1997-ci ildə Şəki Tibb Kollecini bitirib. Elə həmin ildə Sumqayıt şəhər Uşaq xəstəxanasında tibb bacısı kimi əmək fəaliyyətinə başlayıb. Sonra Mərkəzi Neftcilər Xəstəxanasının Təcili Tibbi Yardım bölməsində əmək fəaliyyətini davam etdirib. 2017-ci ildə İcbari tibbi sığorta Pilot Layihəsi Yevlax Rayon Mərkəzi Xəstəxanasında Tibb bacıları şöbəsinin müdiri vəzifəsində işləyib. 2021-ci ildən bəri Elmi Tibbi Tədqiqat Bərpa Mərkəzində sığorta məsləhətçisi vəzifəsində çalışır.
Aynur Behbudovanın ən böyük və ən müqəddəs vəzifəsi ana olmasıdır. O, Vətən Müharibəsində döyüşən iki oğul böyüdüb. Elə taleyini də Birinci Qarabağ Müharibəsinin veteranı Behbudov Elşən Əkbər oğlunun taleyinə bağlaması da Vətən sevgisinin bir əlamətidir. Odur ki, iş masasının üstündə də Azərbaycan bayrağı cilvələnir. Aynur xanım isə bayrağımızı sevgidolu baxışlarıyla oxşayır.
Zənnimcə bayrağını sevən hər bir kəs, millətini də sevər dövlətini də və o dövlətin vətəndaşlarına vicdanla, ləyaqətlə xidmət edər. Aynur Behbudova kimi...
P.S. Süründürməçilər barədə növbəti buraxılışlarımızda
İşinə məsuliyyətlə, vətəndaşlara sayğı ilə yanaşanlara sayğıyla:
Tamxil ZİYƏDDİNOĞLU,
Hərbi Jurnalistlər Birliyinin sədri
1-02-2024, 21:03
Prezident gənclər günüylə bağlı paylaşım etdi
Prezident İlham Əliyev Gənclər Günü ilə bağlı paylaşım edib.
Paylaşımda deyilir:
"Bizim gənclər Müzəffər xalqın nümayəndələri kimi böyüyəcəklər".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!