18-09-2024, 16:08
ABŞ Rusiya və Çinlə əməkdaşlıq etməlidir - Tramp
ABŞ Rusiya və Çinlə əməkdaşlıqdan imtina etməməlidir.
Bunu Respublikaçılar partiyasının ABŞ prezidentliyinə namizədi Donald Tramp bildirib.
“Çin ilə iş görmək yaxşıdır, sadəcə ədalətli şərtlər lazımdır. Rusiyanın çoxlu mineral ehtiyatları var. Biz əməkdaşlıq edə bilərik”, - Tramp Miçiqan ştatının Flint şəhərində tərəfdarları ilə görüşü zamanı deyib.
Tramp əlavə edib ki, Rusiya prezidenti Vladimir Putin və Çin lideri Si Cinpinlə yaxşı münasibətləri var.
18-09-2024, 15:27
Leyla Əliyeva uşaq bağçasının açılışında - FOTO
Sentyabrın 18-də Bakının Nərimanov rayonunda yeni inşa edilən “Kəpənək” uşaq bağçasının açılışı olub.
Açılış mərasimində Heydər Əliyev Fondunun vitse-prezidenti Leyla Əliyeva iştirak edib.
"Kəpənək" məktəbəqədər təhsil müəssisəsinin direktoru Yuliya Əliyeva Heydər Əliyev Fondunun vitse-prezidenti Leyla Əliyevaya bağça barədə məlumat verib.
Bildirilib ki, məktəbəqədər təhsil müəssisəsinin əsas missiyası uşaqların həm akademik, həm də sosial-emosional inkişafı üçün geniş imkanlar yaratmaq və uşaqların məktəb mühitinə rahat inteqrasiyasına dəstək göstərməkdir.
“Kəpənək” uşaq bağçasında 3-6 yaşlı uşaqlar üçün məktəbəqədər təhsil və qayğı xidməti olacaq. Burada 3-4, 4-5 və 5-6 yaş arasında qruplar fəaliyyət göstərəcək. Məktəbəqədər təhsil müəssisəsi ilə tanışlıq zamanı bildirilib ki, yüksəkkeyfiyyətli təhsillə yanaşı, uşaqların hərtərəfli inkişafı və sosial tədbirlərdə fəal iştirakı da diqqət mərkəzində olacaq. “Kəpənək” bağçası uşaqlar üçün təhlükəsiz mühit olmaqla yanaşı, onların qayğı və sevgi ilə əhatə olunmasını hədəf götürüb. Həmçinin uşaqların həm əqli, həm də kreativ inkişafı üçün dərsdənkənar fəaliyyət nəzərdə tutulub.
Heydər Əliyev Fondunun vitse-prezidenti Leyla Əliyeva iki mərtəbədən ibarət bağçanın müxtəlif yaş qrupları üçün nəzərdə tutulmuş otaqları ilə tanış olub, tədris barədə vacib tövsiyələr verib.
Qeyd olunub ki, burada uşaqların təlim-tərbiyəsinə cəlb olunan heyətin davamlı peşəkar inkişafına, müxtəlif təlimlərdə iştirakına xüsusi önəm veriləcək. Bildirilib ki, məktəbəqədər təhsil müəssisəsi təhsildəki yeniliklər və yeni trendləri izləməyi, o cümlədən Kembric proqramını keyfiyyətli tədris etmək üçün onlayn təlimlərə qoşulmağı da planlaşdırır.
18-09-2024, 15:03
Prezidentin köməkçisi: “Ermənistana münasibətdə yeni Marşal planı hazırlanır”
“Ermənistana münasibətdə yeni Marşal planı hazırlanır”.
Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev jurnalistlərə açıqlamasında deyib.
O bildirib ki, işğal dövründə Ermənistan Azərbaycan ərazilərində kütləvi dağıntılar törədib, o cümlədən özəl və dövlət mülkiyyətlərini kütləvi şəkildə dağıdıb, saxtalaşdırıb: “İndi Azərbaycan hökuməti bərpa-quruculuq və yenidənqurma işlərinə, həmçinin ərazilərin minalardan təmizlənməsinə vəsait ayırır. Dağıntılar törədən Ermənistandır, dağıntılarla üzləşən isə Azərbaycandır. Amma vəsait Ermənistana ayrılır. Bu, paradoksdur”.
H.Hacıyevin sözlərinə görə, Azərbaycana və Ermənistana yanaşma eyni miqyasda deyil: “İşğal dövründə də heç kim Ermənistanı işğala son qoymağa çağırmırdı. Regionla bağlı belə ikili münasibətlər davam etməkdədir”.
H.Hacıyev əlavə edib ki, sülh müqaviləsinə nail olmaq üçün Ermənistan Konstitusiyasında edilməli olan dəyişikliklər referendum yolu ilə həyata keçirilməli və erməni xalqı da öz mövqeyini bildirməlidir:
“Erməni xalqı Qarabağın Ermənistana birləşdirilməsi kimi utopik iddialarına son qoyduğunu, Azərbaycanla sülh şəraitində yaşamaq niyyətini konstitusional əsasda ifadə etməlidir.
Bundan sonra proses irəliyə doğru daha da sürətli şəkildə gedə bilər. Sülh müqaviləsinin mətni üzrə Ermənistanın təklifləri bu yaxınlarda Azərbaycan tərəfinə təqdim olunub və həmin təkliflərin göndərilməsi 70 gündən çox vaxt alıb. Bu, çox böyük bir vaxtdır. Ermənistan əgər sülh müqaviləsinin irəli aparılmasında ciddidirsə və bu məsələdə maraqlıdırsa, 70 gün ərzində cavab göndərilməsi özlüyündə sual doğurur”.
Prezidentin köməkçisi vurğulayıb ki, sülh müqaviləsinin əksər hissələri üzrə müəyyən razılıqlar var, amma hələ də görülməli işlər var: "Bu ilk növbədə Ermənistan Konstitusiyası ilə bağlı olan məsələlərdir. Ermənistan Konstitusiyasında Azərbaycana qarşı ərazi iddialarına son qoyulmalıdır. Azərbaycana qarşı ərazi iddialarının olması Azərbaycanı narahat edən bir məsələdir. Sülh müqavilələri, adətən, təkcə hansısa hökumətlə yox, eyni zamanda xalqla da imzalanır. Gözləntimiz ondan ibarətdir ki, sülh müqaviləsinə nail olmaq üçün Ermənistan Konstitusiyasında edilməli olan dəyişikliklər referendum yolu ilə həyata keçirilsin və erməni xalqı da öz mövqeyini bildirsin".
H.Hacıyev, həmçinin bildirib ki, Minsk qrupunun və onunla əlaqədar olan institutların saxlanması cəhdləri Ermənistanın başqa niyyətlərinin olmasından da xəbər verə bilər:
“Belə bir institut mövcud deyil, hansısa formada fəaliyyətinin mümkünlüyü də reallıqdan tam kənardır. Ona görə də Minsk qrupu və onunla əlaqəli institutlarla bağlı fəaliyyətə də tam son qoyulmalıdır. Azərbaycan tərəfi də ATƏT çərçivəsində Ermənistan və Azərbaycanın bununla əlaqədar bigə mövqe nümayiş etdirməsini təklif edib. Amma Minsk qrupunun və onunla əlaqədar olan institutların saxlanması cəhdləri Ermənistanın başqa niyyətlərinin olmasından da xəbər verə bilər. Azərbaycan tərəfindən bu etimad yaradan bir məsələ deyil”.
18-09-2024, 14:58
Erməni xalqı utopik iddialarına son qoyduğunu konstitusion əsasda bildirməlidir - Hikmət Hacıyev
Sülh müqaviləsinə nail olmaq üçün Ermənistan
Konstitusiyasında edilməli olan dəyişikliklər referendum yolu ilə həyata keçirilməli və erməni xalqı da öz mövqeyini bildirməlidir. Erməni xalqı Qarabağın Ermənistana birləşdirilməsi kimi utopik iddialarına son qoyduğunu, Azərbaycanla sülh şəraitində yaşamaq niyyətini konstitusional əsasda ifadə etməlidir.
Bu fikirləri Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Kəlbəcərdə jurnalistlərə açıqlamasında deyib.
Onun sözlərinə görə, bundan sonra proses irəliyə doğru daha da sürətli şəkildə gedə bilər: "Sülh müqaviləsinin mətni üzrə Ermənistanın təklifləri bu yaxınlarda Azərbaycan tərəfinə təqdim olunub və həmin təkliflərin göndərilməsi 70 gündən çox vaxt alıb. Bu, çox böyük bir vaxtdır. Ermənistan əgər sülh müqaviləsinin irəli aparılmasında ciddidirsə və bu məsələdə maraqlıdırsa, 70 gün ərzində cavab göndərilməsi özlüyündə sual doğurur".
Prezidentin köməkçisi vurğulayıb ki, sülh müqaviləsinin əksər hissələri üzrə müəyyən razılıqlar var, amma hələ də görülməli işlər var: "Bu ilk növbədə Ermənistan Konstitusiyası ilə bağlı olan məsələlərdir. Ermənistan Konstitusiyasında Azərbaycana qarşı ərazi iddialarına son qoyulmalıdır. Azərbaycana qarşı ərazi iddialarının olması Azərbaycanı narahat edən bir məsələdir. Sülh müqavilələri, adətən, təkcə hansısa hökumətlə yox, eyni zamanda xalqla da imzalanır. Gözləntimiz ondan ibarətdir ki, sülh müqaviləsinə nail olmaq üçün Ermənistan Konstitusiyasında edilməli olan dəyişikliklər referendum yolu ilə həyata keçirilsin və erməni xalqı da öz mövqeyini bildirsin".
18-09-2024, 14:21
Ərdoğan BMT-də çıxış edəcək
Türkiyə Prezidenti Rəcəb Tayyib Ərdoğan BMT Baş Assambleyasının 79-cu sessiyasında iştirak etmək üçün sentyabrın 21-də ABŞ-a yola düşəcək.
Türkiyə liderinin çıxışı sentyabrın 24-nə planlaşdırılır.
Prezident Ərdoğan həmin gün Braziliya və ABŞ dövlət başçılarından sonra BMT Baş Assambleyası tribunasından çıxış edəcək üçüncü lider olacaq. Bu, həmçinin Türkiyə Prezidentinin siyasi karyerasında BMT Baş Assambleyasında edəcəyi 14-cü çıxışdır.
Türkiyə Prezidentinin çıxışında əsas mövzular qlobal sistemin ədalətsizliyi və BMT-də islahatların aparılması zərurəti olacaq.
Sentyabrın 27-dək davam edəcək səfər çərçivəsində Ərdoğan dünya liderləri ilə də bir sıra ikitərəfli görüşlər keçirəcək, onlardan bəziləri Nyu-Yorkdakı Türkiyə Evində baş tutacaq.
Bundan əlavə, Türkiyənin dövlət başçısı dünyanın aparıcı şirkətlərinin nümayəndələri ilə də görüşəcək.
18-09-2024, 13:48
Zelenski Polşa XİN başçısı ilə mübahisə edib? - ŞOK DETALLAR
Polşanın xarici işlər naziri Vladislav Sikorski Kiyevə səfəri zamanı Ukrayna prezidenti Volodimir Zelenski ilə onun arasında mübahisə düşüb.
Məlumatı Polşanın "Onet" nəşrinin jurnalisti Vitold Juraş yayıb.
Onun sözlərinə görə, Polşa nümayəndə heyəti Ukrayna prezidentinin görüşdəki “ünsiyyət tərzinə təəccüblənib”.
Yuraş iddia edir ki, Zelenski Polşa tərəfini Aİ-yə üzvlük danışıqlarında Kiyevə yetərincə dəstək verməməkdə günahlandırıb, həmçinin Polşanın kifayət qədər hərbi texnika təmin etməməsindən və Ukrayna hava məkanında Rusiya raket və dronlarını vurmamasından qəzəblənib.
"Söhbət iştirakçılarının ifadələrinə görə, bir anda atmosfer o qədər gərgin idi ki, qalmaqaldan danışmaq olardı", - jurnalist deyir.
O əlavə edib ki, iclasda da iştirak edən xarici işlər naziri Landsbergisin rəhbərlik etdiyi Litva nümayəndə heyəti “polşalı naziri dəstəkləməyə çalışmayıb”.
18-09-2024, 13:36
Kreml Paşinyanla razılaşmır
Kreml Kollektiv Təhlükəsizlik Müqaviləsi Təşkilatını (KTMT) ölkəsi üçün təhlükə adlandıran Ermənistanın baş naziri Nikola Paşinyanla qəti şəkildə razılaşmır.
Bunu Rusiya prezidentinin mətbuat katibi Dmitri Peskov bildirib.
O, KTMT-dən heç bir təhlükənin olmadığını vurğulayıb.
“Biz cənab Paşinyanla qəti şəkildə razılaşmamalıyıq. KTMT-dən Ermənistanın suverenliyinə heç bir təhlükə gələ bilməz və gəlmir. Əksinə, bu təşkilat üzv dövlətlərin suverenliyinin keşiyində durur. Lakin biz səbirlə bu mövqeyi Ermənistan rəhbərliyinin diqqətinə çatdıracağıq”, - Kreml nümayəndəsi mətbuata açıqlamasında deyib.
18-09-2024, 13:03
Ermənistan Azərbaycandan da qaz ala bilər - Paşinyan
“Biz Rusiyadan, İrandan qaz idxal edirik və bir müddət əvvəl Azərbaycandan bəyanatlar səslənirdi ki, gələcəkdə sülh bərqərar olarsa, Ermənistan Azərbaycandan qaz idxal edə bilər”.
Bunu Ermənistanın baş naziri Nikol Paşinyan bu gün, sentyabrın 18-də Dünya Erməni Sammitində çıxışı zamanı deyib.
“Naxçıvan və ya Türkiyəyə tranzit qaz kəmərinin Ermənistan ərazisindən keçə biləcəyini təsəvvür etsək, Azərbaycandan qaz almaq variantını da istisna etmək olmaz”, - baş nazir bildirib.
18-09-2024, 12:55
Türkiyə-Azərbaycan Universiteti dünyada bir ilk olacaq!
“Türkiyə-Azərbaycan Universiteti yeni beynəlxalq universitet modeli xüsusiyyəti ilə dünyada bir ilk olacaq”.
Bunu Türkiyə Ali Təhsil Şurasının sədri professor Erol Özvar ölkənin tədqiqatyönümlü ali təhsil müəssisələrinin Qazi Universitetində keçirilən toplantısında deyib.
Erol Özvar çıxışında ali təhsildə beynəlmiləlləşmə istiqamətində atılan ən yeni addımlardan birinin Türkiyə-Azərbaycan Universiteti olduğunu bildirib: “Biz bu günlərdə ali təhsilimizin beynəlmiləlləşməsi istiqamətində ən yeni addımlardan birini atırıq. Sentyabrın 23-də Azərbaycanda, Bakıda Türkiyə-Azərbaycan Universitetinin açılışını edəcəyik. Bu, bizim üçün tarixi addımdır”.
Erol Özvar əlavə edib ki, biz 3 tədqiqat universitetimizin - İstanbul Texnik Universitetinin, Orta Doğu Texnik Universitetinin və Hacettepe Universitetinin mövcud proqramlarını Azərbaycanda qurulan universitetə köçürürük.
"Türkiyə-Azərbaycan Universitetinin yeni beynəlxalq universitet modeli xüsusiyyəti ilə dünyada bir ilk olacağını vurğulayan E.Özvar daha sonra qeyd edib: “Bu yeni modeldə Türkiyənin qabaqcıl universitetləri Türkiyə-Azərbaycan arasında ən yaxşı olduqları sahələr üzrə proqramlarını açacaqlar. Universitet və bu proqramların akademik məsuliyyətini üzərlərinə götürəcəklər. Ona görə də Türkiyə-Azərbaycan Universiteti Türkiyənin müxtəlif universitetlərindən proqramların keçiriləcəyi “çətir universitet” olacaq. Bu yeni ali təhsil modeli ilə ölkəmizin köklü ali təhsil müəssisələrinin, xüsusən də tədqiqat universitetlərimizin fərqli proqramlarını dünyanın müxtəlif coğrafiyalarına daşıyaraq bir növ ali təhsil xidməti ixrac etməyi planlaşdırırıq. Türkiyənin akademik biliklərini dünyaya açacaq bu modelin universitetlərimizə də yeni bir üfüq gətirəcəyinə inanırıq”.
18-09-2024, 12:46
İranın Livandakı səfiri barədə bəyanat yayıldı
İranın Livandakı səfirliyi kiberhücum zamanı yaralanmış səfirlə bağlı bəyanat yayıb.
Bəyanatda İranın Beyrutdakı səfiri Müctəba Amaninin müalicə prosesinin yaxşı getdiyi və gözlərində heç bir problem olmadığı vurğulanıb.
Livanda olan İran Qızıl Aypara Cəmiyyətinin prezidenti Pir Hüseyn Kulivend də səfir Müctəba Amaninin ümumi vəziyyətinin yaxşı olduğunu bildirib.
Daha əvvəl İsrailin Livandakı portativ peycerlərə hücumu nəticəsində İranın Beyrutdakı səfiri Müctəba Amaninin yaralandığı bildirilmişdi.
Livan Səhiyyə Nazirliyi kiberhücum nəticəsində ümumilikdə 3 min nəfərin yaralandığını bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!