3-09-2024, 16:33
Parlament seçkiləri Azərbaycan Konstitusiyasına uyğun keçirilib - XİN
Azərbaycanda növbədənkənar parlament seçkiləri ölkənin Konstitusiyasına və milli qanunlara tam uyğun keçirilib.
Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə bunu Avropa İttifaqının seçkilərlə bağlı yaydığı məlumata cavab olaraq "X"də yazıb.
"Avropa İttifaqının xarici siyasət və təhlükəsizlik məsələləri üzrə mətbuat katibi Peter Stanonun bu cür subyektiv və qərəzli siyasi baxışı ATƏT DTİHB-nin Azərbaycandakı seçkilərlə bağlı mənfi münasibətini təkrarlayır və etibarsızdır. Seçkilər ölkənin Konstitusiyasına və milli qanunlarına tam uyğun şəkildə keçirilib", - XİN rəsmisi vurğulayıb.
3-09-2024, 16:21
Müdafiə Nazirliyi məlumat yaydı: Partlayış olacaq
Azərbaycan Ordusunun bölmələri tərəfindən istismar müddəti başa çatmış və istifadəyə yararsız olan döyüş sursatlarının təhlükəsizlik qaydalarına riayət olunmaqla planlı şəkildə məhv edilməsi davam etdirilir.
Bu barədə Müdafiə Nazirliyinin məlumatında qeyd edilib.
“Bildiririk ki, döyüş sursatlarının məhv edilməsi prosesi 3-6 sentyabr tarixlərində Seyfəli poliqonunda həyata keçiriləcək. Aparılan partlayış işləri ilə əlaqədar ictimaiyyətə mütəmadi olaraq məlumat veriləcək”, - məlumatda vurğulanıb.
3-09-2024, 16:14
Çörəklə bu qidaların qəbul olunması yolverilməzdir! - Ekspertdən xəbərdarlıq
Tam buğda unundan hazırlanan çörəyin insan orqazminə bir çox faydaları var. Xüsusilə orqanizmin formalaşmağa başladığı ilk dövrdən 8 yaşa qədər çörəkdən istifadə olunubsa, o zaman çörəyi qida rasionundan çıxarmaq yolverilməzdir.
Bunu açıqlamasında sağlam qida mütəxəssisi Məhsəti Hüseynova deyib.
O bildirib ki, çörəyin tərkibində olan "B" qrup vitaminlər və bir çox elementlər insanın orqanizminə faydalıdır və orqanizim bu vitaminləri genetik olaraq həmin qidadan almağı kodlaşır.
"Belə olduğu halda çörək qida rasionunda qəbul olunmalıdır. Mütləq şəkildə çörəyi alarkən diqqət etmək lazımdır ki, mənşəyi olan yerdən və kefiyyətli undan hazırlansın. Əksər hallarda bu gün sənaye üsulu ilə hazırlanan çörəklərdə kimyəvi tərkibdə olan mayadan istifadə olunur. Bu həzm prosesinin korlanmasına və eyni zamanda da bir çox insanlarda bağırsaq hərəkətliliyini aşağı düşməsinə səbəb olur. Nəticədə insan orqanizmində maddələr mübadiləsi pozulur və qəbzlik, qarında şişlik, ağrı baş verir. Ev üsulu maya ilə hazırlanmış çörəklərdən istifadə etmək daha sağlam hesab olunur. Çörək bişərkən şəkərdən, bəzən "proktoza"dan istifadə olunur. Bu da insan orqanizmində asılılığa gətirib çıxarır və nəticədə bir çox insanlar çörəksiz qida qəbul edə bilmir. Çörəyin qəbul edilmə miqdarı var ki, səhər yeməklərində 1-2 dilim şəklində qəbul olunmalıdır və axşam yeməklərində isə o qədər də tövsiyyə olunan məqam deyil".
Məhsəti Hüseynova qeyd edir ki, dietada olan insanlar qara çörəyə üstünlük verir:
"Əgər hər ikisi təbii, kefiyyətli şəkildə hazırlanıbsa, onların kalori miqdarında çox az fərq var. Ağ çörəyin kalori miqdarını azaltmaq üçün qızardılıb nəmliyi alınmalıdır. Bu halda ağ çörək və qara çörək arasındakı fərq minimuma düşür. Müasir dünyada insanların bəzilərinin qarşılaşdığı problemlərdən biri də qlüten həssaslığıdır. Bu insanlarda bəzilərində allergik reaksiyalar kimi aşağı və yuxarı ətraflarda dəri altı ağ səpkilər özünün göstərsə də, bəzi insanlarda isə daha ağır nəticələrə yol açır. Bu da çölyak xəstəliyi və mədədə narahatlığa qədər gətirib çıxarır. Mütləq şəkildə qlüten həssaslığı olan insanlar bir mənalı şəkildə tərkibində qlüten olan qidalardan uzaq durmaları məsləhət görülür".
Onun sözlərinə əsasən, çörək karbohidrat tərkibli olduğu üçün birgə qəbul olunan qidaların tərkibində zülal, yağlar olmalıdır:
"Çörəklə digər dəyəri yüksək olan qidaların qəbul olunması yolverilməzdir. Bu cür qidaların həzmi çətinləşdiyi üçün insan orqanizmində ağrılara və narahatlığa səbəb olur. Bəzən insanlar az miqdarda belə qidalanarlarsa, köpmə və tez çəki almağa yol açır. Düzgün miqdarda qəbul olunan çörək insan orqanizmində yalnız enerji verməyə xidmət edir. Bu da 1-2 dilim şəklində günün birinci yarısında səhər yeməyində qəbul olunan çörəkdir. Əgər çörək sənaye üsulu hazırlanıbsa, bunun düzgün şəkildə qablaşması, bişirilmə tarixi, tərkibi haqqında tam məlumat verilməlidir. Bəzən olur ki, çörək kağızının üzərində 48 saat və ya 72 saat göstərilsə də, bunu son istifadə müddəti bitdikdən sonra da istifadə edirlər ki, bu yol verilməzdir. Gözlə görülməsə də, rəngi, qoxusu dəyişməsə də, tərkibində müəyyən dəyişikliklər olur. Həmin dəyişikliklər həzm sisteminin pozulmasına gətirib çıxarır. Çörəklərin uzun müddət qalması üçün istifadə olunan kimyəvi dərmanlar var ki, bunlar insan orqanizmində müəyyən fəsatlara gətirib çıxarır. Bu da birbaşa olaraq, həmin maddələrin insan orqanizmindən tamam sorvulmaması nəticəsində qaraciyər və böyrək çatışmazlığına gətirib çıxarır. Digər məqam isə polietilen paketlərdə uzun müddət saxanılmamalıdır. Çörəkləri daha çox kağız, parça torbalar və ya çörək üçün nəzərəd tutulmuş taxta qablarda saxlanılması daha sağlam hesab olunur".
3-09-2024, 16:08
Ləğv edilən Naxçıvan Universitetinin tələbələri hara köçürülüb? - Rəsmi
"Naxçıvan" Universiteti məhdud məsuliyyətli cəmiyyət (MMC) ləğv edildiyini elan edib.
Elm və Ali Təhsil üzrə Dövlət Agentliyi məsələylə bağlı açıqlama verib.
Qurumdan bildirilib ki, Naxçıvan Universitetinin tələbələrinin köçürülməsi prosesi 2024-cü ilin fevral ayından etibarən başlanıb:
“Artıq bütün tələbələrin köçürülməsi yekunlaşıb. Universitetdə təhsil alanların əksəriyyəti Naxçıvan Dövlət Universitetinə, digərləri isə başqa ali təhsilm müəssisələrinə köçürülüblər. Prosesin bu vaxta qədər davam etməsinin səbəbi isə sonuncu kurs tələbələri ilə bağlıdır. Belə ki, müəssisənin bağlanması üçün onlar təhsillərini başa vurmalı idilər”.
Qurum rəsmisi sonda qeyd edib ki, Naxçıvan Universiteti özəl ali təhsil müəssisəsi olsa da, tələbələri dövlət ali təhsil müəssisələrinə köçürülüblər.
3-09-2024, 15:53
Ukraynada faciə: Rusiya zərbə endirdi - 41 ölü, yüzlərlə yaralı var
Rusiya Silahlı Qüvvələri Poltavaya ballistik raketlə zərbə endirib.
Hücum bu gün səhər saatlarında baş verib.
Ukrayna Prezidenti Volodimir Zelenski zərbə nəticəsində 41 nəfərin öldüyünü, 180-dən çox insanın yaralandığını bildirib. Onun sözlərinə görə, şəhər ballistik raketlərlə atəşə tutulub və bu raketlər təhsil müəssisəsinə və yaxınlıqdakı xəstəxanaya düşüb.
“Rabitə İnstitutunun binalarından biri qismən dağılıb. İnsanlar dağıntılar altında qalıb. Çoxları xilas edilib. 180-dən çox insan yaralanıb. Təəssüf ki, çoxları həyatını itirib. İndiyədək 41 ölüm məlumdur", - Zelenski qeyd edib.
Onun sözlərinə görə, xilasetmə əməliyyatına bütün xidmətlər cəlb olunub.
Yerli mətbuat yazır ki, hücumdan əvvəl hava xəbərdarlığı edilib, lakin həyəcan siqnalı ilə zərbə arasındakı interval o qədər qısa olub ki, insanları bomba sığınacağına qaça bilməyib. Zərbə dalğası nəticəsində hündürmərtəbəli binaların şüşələri sıradan çıxıb, fasadları zədələnib.
3-09-2024, 15:25
Azərbaycan mühüm müqaviləyə imza atdı
Azərbaycan, Gürcüstan, Rumıniya və Macarıstan arasında Yaşıl Enerji Dəhlizinin yaradılması üzrə nazirlərin/Rəhbər Komitənin Buxarest görüşü dördtərəfli Sazişin icrası və Azərbaycanın Avropanın yaşıl enerji təchizatçısına çevrilməsi istiqamətində mühüm nəticələrlə yekunlaşıb.
Bunu energetika naziri Pərviz Şahbazov “X” sosial şəbəkəsindəki hesabında qeyd edib.
“Səhmdarlar Müqaviləsinin imzalanması ilə Buxarestdə Birgə Müəssisənin təsis edilməsinə nail olduq. Layihənin TİƏ-nin həyata keçirilməsinə məsul qurum kimi BM-Yaşıl Enerji Dəhlizi Enerji Şirkətinə liderliyin rotasiyaya əsaslanmasını, növbəti görüşədək Fəaliyyət Planının hazırlanmasını və proseslərin sürətləndirilməsini razılaşdırdıq. Həmçinin Fiber Optik Kabel Xətti ilə bağlı tapşırıqların, Bolqarıstanın inteqrasiyası üzrə məsələlərin TİƏ-yə daxil edilməsi barədə razılığa gəldik. COP29 İqlim Liderlərinin Sammiti zamanı Layihəyə həsr olunmuş yüksək səviyyəli tədbirə dəstək ifadə olundu”, - paylaşımda qeyd olunur.
3-09-2024, 14:51
Azərbaycan nümayəndələri Ərdoğanın qəbulunda - FOTO
Türkiyə Prezidenti Rəcəb Tayyib Ərdoğan prokurorluğun nümayəndə heyətinin rəhbəri Heydər Məmmədovu və eyni zamanda Ali Məhkəmənin nümayəndə heyətinin rəhbəri, həmin məhkəmənin sədr müavini Çingiz Əsgərovu qəbul edib.
Bu barədə Baş Prokurorluğun Mətbuat xidmətindən məlumat verilib.
Bildirilib ki, Baş prokurorunun müavini Heydər Məmmədov və Baş Prokurorluğun Dövlət ittihamının müdafiəsi üzrə idarəsinin rəis müavini Anar Nəsibovdan ibarət nümayəndə heyəti qardaş Türkiyənin Ankara şəhərində “2024-2025 Yeni Ədliyyə İli Açılış Tədbiri”ndə iştirak ediblər. Mərasimdə Türkiyənin Prezidenti Rəcəb Tayyib Ərdoğan, Ali Məhkəmənin sədri Ömer Kerkez, Baş prokuroru Muhsin Şentürk, digər hakim və prokurorlar iştirak ediblər.
Daha sonra prokurorluğun nümayəndə heyəti Türkiyə Baş prokuroru Muhsin Şentürk və Ali Məhkəmənin sədri Ömer Kerkezlə rəsmi görüşlər keçirib, ölkələrimiz arasında hüquqi əməkdaşlığın daha da inkişaf etdirilməsi, təcrübə mübadiləsinin intensivləşdirilməsi, vətəndaşların hüquq və azadlıqlarının müdafiəsi sahəsində əməkdaşlıq, habelə qarşılıqlı maraq doğuran digər məsələlərə dair faydalı fikir mübadiləsi aparılıb.
Görüşlər zamanı 29 sentyabr – 2 oktyabr tarixlərində Bakı şəhərində keçiriləcək Beynəlxalq Prokurorlar Assosiasiyasının 29-cu illik konfransı və ümumi yığıncağı barədə həmkarlara məlumat verilib, tədbirə qatılacaq Türkiyə Respublikasının Baş prokuroru Muhsin Şentürklə konfrans barədə müzakirələr aparılıb. Həmçinin noyabr ayında Bakı şəhərində keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 tədbirinin müstəsna tarixi əhəmiyyəti və həmin mötəbər tədbir çərçivəsində Baş Prokurorluq tərəfindən İqlim dəyişikliyi ilə mübarizədə hüquq mühafizə orqanlarının səfərbər edilməsi mövzusunda yüksək səviyyəli plenar sessiyanın keçiriləcəyi barədə həmkarlara ətraflı məlumat verilib.
3-09-2024, 13:38
Kəlbəcərdən möhtəşəm görüntülər - Prezidentdən paylaşım
Xəbər verdiyimiz kimi, Prezident İlham Əliyev və birinci xanım Mehriban Əliyeva sentyabrın 2-də Kəlbəcər rayonuna səfər ediblər.
Dövlətimizin başçısı və birinci xanım Kəlbəcər şəhərində inzibati binanın, ikinci yaşayış kompleksinin təməlini qoyub, Toğanalı-Kəlbəcər-İstisu avtomobil yolundakı 4-cü tuneldə və bu yolun 15,2 kilometrlik hissəsində görülən işlərlə, Təhsil Kompleksində aparılan işlər və bu il açılacaq modul tipli məktəbin layihəsi ilə tanış olub, Tərtər çayı üzərindəki “Yuxarı Vəng” Su Elektrik Stansiyasının açılışında iştirak ediblər.
Prezident İlham Əliyev Kəlbəcər səfərindən möhtəşəm görüntülər paylaşıb.
3-09-2024, 13:09
Milli Məclisin ilk iclasına o sədrlik edəcək
Sentyabrın 1-i Milli Məclisə növbədənkənar parlament seçkiləri keçirilib. Parlament seçkilərində 125 deputat mandatı uğrunda 990 namizəd mübarizə aparıb. İlkin nəticələrə uyğun olaraq dairələr üzrə lider namizədlər müəyyənləşib.
Bundan sonra əsas məsələ Milli Məclisin formalaşması və iclasların keçirilməsidir.
Milli Məclisin 83 deputatının səlahiyyətləri təsdiq edildikdən sonra Milli Məclisin ilk iclası həmin gündən etibarən bir həftədən gec olmayaraq çağırılır.
Milli Məclisə seçkilərdən sonra martın 10-dək onun 83 deputatının səlahiyyətləri təsdiq edilməzsə, Azərbaycan Respublikasının Konstitusiya Məhkəməsi Milli Məclisin ilk iclasının keçirilmə vaxtını müəyyən edir.
Milli Məclisin növbəti çağırışının birinci iclasını Milli Məclisin ən qocaman deputatı açır, Milli Məclisə seçilmiş deputatların siyahısını oxuyur və Milli Məclisin Sədri seçilənədək birinci iclası aparır.
Qeyd edək ki, hazırda 84 yaşlı Ziyad Səmədzadə isə VII çağırışın ən qocaman deputatıdır. 23 saylı Nəsimi-Səbail seçki dairəsindən seçilən Ziyad Səmədzadə Ali Sovetin də deputatı olub.
Milli Məclisin birinci iclasına sədrlik edənin təklifi ilə Hesablayıcı komissiya seçilir və bu barədə qərar qəbul edildikdən sonra Milli Məclisin sədri və onun müavinləri seçilir, bununla da Milli Məclisin növbəti çağırışının birinci iclası işini bitirir.
Milli Məclisin Sədri vəzifəsinə isə namizədliyi Milli Məclisin deputatları irəli sürə bilərlər. Hər deputat yalnız bir namizəd göstərə bilər.
Öz namizədliyinə etiraz müzakirəsiz və səsvermə keçirilmədən qəbul edilir.
Səsverməyə azı 10 deputatın tərəfdar çıxdığı namizədlər buraxılır. Namizədlər çıxış edə və deputatların suallarına cavab verə bilərlər. Namizədlər üzrə müzakirələr keçirilir. Milli Məclisin sədrliyinə hər namizəd Hesablayıcı komissiyanın tərkibinə əlavə bir deputat daxil edə bilər.
Gizli səsvermə nəticəsində azı 63 deputatın səsini almış namizəd Milli Məclisin Sədri seçilir.
Namizədlərin heç biri azı 63 səs almadıqda, bu Daxili Nizamnamənin 27-ci maddəsində nəzərdə tutulmuş qaydada səsvermənin ikinci dövrəsi keçirilir. İkinci dövrədə heç bir namizəd 63 səs ala bilməzsə, Milli Məclisin Sədrinin birinci müavininin seçkiləri keçirilir.
Milli Məclisin Sədrinin seçilməsi Milli Məclisin qərarı ilə rəsmiləşdirilir. Bu qərarı Milli Məclisin iclasına sədrlik edən imzalayır.
3-09-2024, 12:56
Nəticələr açıqlandı: 1544 nəfər müəllim...
Müəllimlərin işə qəbulu üzrə müsabiqənin müddətli müqavilə ilə vakansiya seçimi mərhələsinin nəticələri elan edilib.
Bu barədə Təhsil İnstitutundan məlumat verilib.
Qeyd olunub ki, nəticələr namizədlərin şəxsi səhifələrinə göndərilib. Vakansiya seçimində 1 544 namizəd uğur qazanaraq müddətli müqavilə ilə çalışmaq imkanı əldə edib.
Müddətli müqavilə ilə vakansiya seçimində uğur qazanan namizədlər 6 sentyabr saat 18:00-dək zəruri sənədləri (şəxsiyyəti təsdiq edən sənədin, ali və ya orta ixtisas təhsili haqqında sənəd və ona əlavənin surəti, əmək kitabçasının əsli (olduğu təqdirdə), 4 ədəd 3x4 formatında fotoşəkil, sağlamlıq haqqında arayış, kadrlar uçotunun şəxsi vərəqəsi, şəxsi səhifədə işə qəbulun nəticəsinə dair çıxarış) aidiyyəti yerli təhsili idarəetmə orqanına təqdim etməlidirlər.
Çıxarışı aidiyyəti yerli təhsili idarəetmə orqanı tərəfindən təsdiq olunmuş namizədlərin işə qəbulu rəsmiləşəcək. Namizədlərə sənədlərini təqdim etdikdən sonra şəxsi səhifələrinə daxil olaraq çıxarışının təsdiq olunduğunu yoxlamaq tövsiyə olunur.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!